གསར་འགྱུར་ཡིག་ཚགས།

རྒྱ་ནག་གཞུང་གིས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་དགོན་གྲོང་གཉིས་སུ་དགོངས་རྫོགས་མཆོད་འབུལ་མི་ཆོག་པ་སོགས་དམ་དྲག་ཤུགས་ཆེར་བྱེད་བཞིན་འདུག

རྒྱ་ནག་གཞུང་འབྲེལ་མགོ་ལོག་ཁུལ་དང་དགའ་བདེ་རྫོང་གི་ཉེན་རྟོག་པ་སོགས་མཉམ་འབྲེལ་ངང་དགོན་གྲོང་གཉིས་སུ་ཞིབ་བཤེར་དམ་དྲག་གིས་ལུང་སྔོན་དགོན་དུ་དགོངས་རྫོགས་མཆོད་འབུལ་མངོན་གསལ་དོད་པོས་བྱེད་བཅུག་གི་མེད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་འབྲེལ་ཡོད་ཁུངས་ལྡན་མི་སྣས་འགྲེལ་བརྗོད་གནང་བྱུང་།

བོད་རང་སྐྱོང་ལྗོངས་ཀྱི་ཚྭ་མཚོ་ཁར་ཞ་ཉེ་དཀར་པོའི་གཏེར་ཁ་སྔོག་འདོན་རྒྱ་ཆེར་བྱ་འཆར་གྱི་རིམ་པ་གཉིས་པར་སླེབས་པ་དེས། བོད་ཀྱི་ཁོར་ཡུག་ལ་གཏོར་སྐྱོན་ཚབས་ཆེན་ཐེབས་ངེས་ཡིན་པ་ཁོར་ཡུག་ཉམས་ཞིབ་པས་ངོས་འཛིན་གནང་གི་འདུག

བོད་རང་སྐྱོང་ལྗོངས་ཀྱི་ཚྭ་མཚོ་ཁར་ཞ་ཉེ་དཀར་པོའི་གཏེར་ཁ་སྔོག་འདོན་རྒྱ་ཆེར་བྱ་འཆར་གྱི་རིམ་པ་གཉིས་པར་སླེབས་པ་དེས་བོད་ཀྱི་ཁོར་ཡུག་དང་མི་མང་གི་བདེ་དོན་ཐོག་གཏོར་བཤིག་ཚབས་ཆེན་ཐེབས་ཉེན་ཆེ་ཞིང་། འདས་པའི་གནས་ཚུལ་ནང་བོད་ཀྱི་ས་ཆ་མི་ཉག་ལྷ་སྒང་དུ་ལི་ཐིམ་གྱི་གཏེར་ཁ་སྔོག་འདོན་གྱིས། གཏེར་རྫས་བཙག་འདོན་གྱི་བརྒྱུད་རིམ་ནང་ཆུ་ཧ་ཅང་མང་པོ་བེད་སྤྱོད་བཏང་བ་རྣམས་ལ་འབག་བཙོག་ཤོར་ཏེ་མི་ཕྱུགས་ལ་དུག་ཕོག་པའི་གནོད་འཚེ་ཐེབས་ཡོད་པ་ཁོར་ཡུག་ཉམས་ཞིབ་པས་ཉེན་བརྡ་བཏང་ཡོད།

སྤྲུལ་སྐུ་ཧཱུྃ་ཀར་རྡོ་རྗེ་མཆོག་གློ་བུར་ལྐོག་གྱུར་ངང་སྐུ་གྲོངས་རྐྱེན་ཐད་རྒྱ་ནག་དང་ཝི་ཏི་ནམ་གཞུང་ལ་འགན་ཡོད་པས་ཕྱི་གསལ་ནང་གསལ་བཟོ་དགོས་པའི་སྐོར། བོད་མིའི་སྒྲིག་འཛུགས་ཀྱིས་འབོད་སྐུལ་གནང་།

རྒྱ་ནག་གིས་བོད་ཀྱི་ས་ཁུལ་གང་སར་ཉི་ནུས་གློག་འདོན་ས་ཚིགས་ཆེད་འཛུགས་བྱེད་བཞིན་པ་དེས་རྩ་ཐང་དང་སྐྱེས་ཁམས་ཁོར་ཡུག་ལ་གནོད་སྐྱོན་ཡོང་གི་ཡོད་པ། བོད་ནང་གི་བོད་མིས་འགྲེལ་བརྗོད་གནང་གི་འདུག

རྒྱ་ནག་གཞུང་གིས་བོད་ནང་ཉི་ནུས་གློག་འདོན་ས་ཚིགས་འབོར་ཆེན་ཆེད་འཛུགས་བྱེད་པར་བརྟེན་ཉེ་འཁོར་རྩ་ཐང་ཁག་ཏུ་རྩ་མི་སྐྱེས་བར་བྱེ་ཐང་ཅན་དུ་འགྱུར་བ་དང་། ལོ་གཅིག་གཉིས་རྗེས་མགྱིག་ཤེལ་གྱི་གད་སྙིགས་སོགས་ཀྱིས་ཁོར་ཡུག་ལ་གནོད་སྐྱོན་དང་། ཕྱུགས་ཟོག་སེམས་ཅན་འཚོ་གནས་མི་ཐུབ་པར་འབྲོག་པའི་འཚོ་བར་དོ་ཕོག་ཤུགས་ཆེར་འགྲོ་བཞིན་ཡོད་པ་རེད།

རྒྱ་ནག་གཞུང་གིས་བོད་ནང་རྒྱ་སྐད་སློབ་འཁྲིད་རྒྱ་བསྐྱེད་ཆེད་མི་བཟོས་རིག་ནུས་བེད་སྤྱོད་བྱེད་འགོ་བཙུགས་འདུག

རྒྱ་ནག་གཞུང་གིས་བོད་ནང་སློབ་གྲྭ་ཁག་ཏུ་མི་བཟོས་རིག་ནུས་བཀོལ་སྤྱོད་བྱས་ཏེ་རྒྱ་སྐད་སློབ་ཁྲིད་བྱེད་བཞིན་ཡོད་པ་ནི། རྒྱ་གཞུང་གིས་བོད་ནང་རྒྱ་སྐད་གོང་སྤེལ་དང་བོད་ཕྲུག་རྒྱ་སྒྱུར་གྱི་ལས་གཞི་ཤུགས་ཆེར་སྤེལ་བཞིན་པའི་བྱེད་ཐབས་གསར་ཤོས་ཤིག་ཆགས་འདུག

མགོ་ལོག་ལུང་སྔོན་དགོན་པའི་ངོས་ནས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝེ་ཐི་ནམ་རྒྱལ་ཁབ་དུ་འདས་གྲོངས་སུ་ཕྱིན་སྐོར་བསྒྲགས་འདུག་ན་ཡང་འབྲེལ་ཡོད་ནས་དེ་ནི་རྒྱ་ནག་གཞུང་གི་གཡོ་བྱུས་ཤིག་ཡིན་པར་ངོས་འཛིན་བྱེད་བཞིན་འདུག

ཟླ་ ༤ ཚེས་ ༢ ཉིན་རྒྱ་ནག་གཞུང་འབྲེལ་མི་སྣས་མགོ་ལོག་དགའ་བདེ་རྫོང་ལུང་སྔོན་དགོན་པའི་དགོན་བདག་སྤྲུལ་སྐུ་ཧཱུྃ་ཀར་རྡོ་རྗེ་མཆོག་འདས་གྲོངས་ཟིན་སྐོར་དགོན་པ་དེའི་དགེ་འདུན་པ་ཁག་ཅིག་བསྡུ་སྐོང་གིས་བརྡ་ཡིག་ཅིག་སྤྲད་ཡོད་པ་ནི། བོད་ཕྱི་ནང་གཉིས་ཀྱི་འབྲེལ་ཡོད་བོད་མི་གསུམ་ནས་གནས་ཚུལ་དེ་རྒྱ་ནག་གཞུང་འབྲེལ་གྱི་གཡོ་བྱུས་འཐེན་ནས་བཙན་ཐབས་ཀྱིས་བརྗོད་བཅུག་བཞིན་པ་ལས། ཁོང་ཝེ་ཐི་ནམ་སོགས་ཕྱིའི་རྒྱལ་ཁབ་དུ་མ་ཕེབས་པར་ཡུན་རིང་ཡིན་པ་འདི་ག་ཨེ་ཤི་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་གི་འདུག

མཆོག་སྤྲུལ་ཧཱུྃ་ཀར་རྡོ་རྗེ་མཆོག་སྐུ་གྲོངས་བའི་གནས་ཚུལ་དང་འབྲེལ་བོད་ཕྱི་ནང་གཉིས་ནས་ཕངས་སེམས་ཀྱིས་མྱ་ངན་དང་ཁོང་གི་འདས་རྐྱེན་ལ་དོགས་གཞི་བྱེད་བཞིན་འདུག

མཆོག་སྤྲུལ་ཧཱུྃ་ཀར་རྡོ་རྗེ་མཆོག་སྐུ་གྲོངས་བའི་གནས་ཚུལ་ཐོན་པར་ཕངས་མེས་དང་ཡིད་གདུང་གིས་མྱ་ངན་ཞུ་མཁན་མང་དག་ཅིག་ཡོང་བཞིན་འདུག་ལ། བོད་ནང་གི་བོད་མི་ཞིག་ནས་བོད་ཀྱི་བྱས་པ་ཅན་གྱི་མི་བུ་ཤུགས་རྐྱེན་ཅན་དག་གློ་བུར་འདས་གྲོངས་སུ་འགྲོ་བཞིན་པ་ནི། སྙུང་གཞི་ཁོ་ནར་འབྲེལ་བ་ཞིག་མ་ཡིན་པར་གནད་དོན་ཅན་ཞིག་ཡིན་སྐོར་གྱི་དོགས་གཞི་བསླངས་ཡོད་པ་སོགས་བཀོད་འདུག

རྒྱ་ནག་གཞུང་གིས་བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་འདས་གྲོངས་ཟིན་སྐོར་གྱི་བརྡ་ཡིག་ཅིག་སྤྲད་པ་མ་གཏོགས་སྐུ་ཕུང་རྩིས་སྤྲད་མི་འདུག

མགོ་ལོག་དགའ་བདེ་རྫོང་ལུང་སྔོན་དགོན་པའི་དགོན་བདག་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གར་སོང་ཆ་མེད་དུ་གྱུར་ནས་ཟླ་བ་ ༨ ཙམ་གྱི་རྗེས། དེ་རིང་ཕྱི་ཚེས་ ༢ ཉིན་རྒྱ་ནག་གཞུང་འབྲེལ་མི་སྣས་ཁོང་འདས་གྲོངས་སུ་གྱུར་ཡོད་སྐོར་བསྒྲགས་འདུག་ལ། ཁོང་ད་ལོ་དགུང་ལོ་ ༥༦ རེད་འདུག

རྒྱ་ནག་གཞུང་གིས་རྔ་བ་དང་མཛོད་དགེ་ཕྱོགས་སུ་དུད་ཚང་རེ་རེའི་རྒྱུ་ནོར་གྲངས་ཐོ་རྩིས་ལེན་གྱིས། མ་འོངས་རྒྱལ་ཁབ་ཀྱི་དཔལ་འབྱོར་ལ་དཀའ་ངལ་འཕྲད་ཚེ་རྒྱུ་ནོར་གཞུང་ལ་རྩིས་སྤྲོད་ཀྱིས་མཉམ་ལས་ཁང་འཛུགས་སྲིད་པའི་འཇིག་སྣང་སྐུལ་བཞིན་ཡོད་པ།

ཟླ་ ༣ མགོ་སྟོད་ནས་བཟུང་། རྒྱ་ནག་གཞུང་གིས་རྔ་བ་དང་མཛོད་དགེ་ཕྱོགས་སུ་རོང་འབྲོག་མང་ཚོགས་ཁྱིམ་ཚང་རེ་རེ་བཞིན་ཞིབ་བཤེར་གྱིས། མ་འོངས་པར་རྒྱལ་ཁབ་ཀྱི་དཔལ་འབྱོར་ལ་དཀའ་ངལ་བྱུང་ཚེ། མི་མང་གི་དཔལ་འབྱོར་ཟླ་སྒྲིལ་གྱིས་མཉམ་ལས་ཁང་འཛུགས་སྲིད་ཅེས་བཤད་བཞིན་ཡོད་སྐོར། བོད་ནང་གི་འབྲེལ་ཡོད་བོད་མི་གསུམ་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

རྒྱ་ནག་གཞུང་གིས་རྒྱབ་ཤ་དཀར་པོའི་དེབ་ནང་བོད་ཡིག་ཡར་རྒྱས་བཏང་སྐོར་བཤད་པར་བོད་མི་ཚོས་དྲ་ལམ་ཁག་ཏུ་སློབ་གྲྭ་ཁག་ཏུ་བོད་ཡིག་སློབ་འཁྲིད་དགོས་པའི་ཡ་ལན་སློག་བཞིན་འདུག

རྒྱ་ནག་གིས་བཏོན་པའི་རྒྱབ་ཤ་དཀར་པོའི་དེབ་ནང་དུ་བོད་ཡིག་དེ་བཞིན་རྒྱལ་སྤྱིའི་སྟེང་ངོས་ལེན་ཡོད་པའི་རྒྱ་ནག་གི་གྲངས་ཉུང་མི་རིགས་ཀྱི་སྐད་ཡིག་ཨང་དང་པོ་དེ་ཡིན་སྐོར་བརྗོད་པར། བོད་མི་ཚོས་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་བོད་སྐད་ཡིག་སློབ་གྲྭ་ཁག་ཚང་མས་ནང་སློབ་འཁྲིད་དགོས་པ་དང་། རྒྱ་ནག་གི་ལོ་རེའི་མཐོ་རྒྱུགས་ཡིག་ཚད་ནང་བོད་ཡིག་དགོས་པ། སྲིད་གཞུང་གིས་བོད་སྐད་ཡིག་ཡག་པོ་ཡོད་པ་བཤད་པ་ཙམ་མ་ཡིན་པར་དོན་དངོས་ལག་ལེན་ཁྲོད་བོད་སྐད་ཡིག་བཀོལ་སྤྱོད་ཁྱབ་རྒྱ་ཆེ་རུ་གཏོང་དགོས་པ་སོགས་ཀྱི་མཆན་བཏབ་སྟེ་ཡ་ལན་སློག་བཞིན་འདུག

རྒྱ་ནག་དཔོན་རིགས་ཁག་གཅིག་ལ་ཨ་རིའི་མཐོང་མཆན་བཀག་སྡོམ་ཐག་གཅོད་གནང་ཡོད་པ་ནི་གནད་འགག་ཅན་དང་དུས་དང་འཚམ་པ་ཞིག་ཡིན་པ། བོད་མིའི་སྒྲིག་འཛུགས་ཀྱི་མགྲིན་ཚབ་པས་ངོས་འཛིན་གནང་གི་འདུག

ཨ་རིའི་ཕྱི་སྲིད་དྲུང་ཆེས་རྒྱ་ནག་གཞུང་གི་དཔོན་རིགས་ཁག་ཅིག་ལ་ཨ་རིའི་མཐོང་མཆན་བཀག་སྡོམ་འཕར་མ་བྱ་རྒྱུ་ཐག་གཅོད་གནང་ཡོད་པའི་ཐད་བོད་མིའི་སྒྲིག་འཛུགས་ཀྱི་མགྲིན་ཚབ་པས། ཐེངས་འདིར་ཨ་མི་རི་ཀའི་ཕྱི་སྲིད་དྲུང་ཆེ་ཡིས་རྒྱ་ནག་གི་འགོ་ཁྲིད་ཁག་ཅིག་ལ་མཐོང་མཆན་བཀག་སྡོམ་གནང་འཆར་ཡོད་པ་ནི། གནད་འགག་ཆེན་པོ་དང་དུས་དང་འཚམས་་ཞིག་ཡིན་པ་འགྲེལ་བརྗོད་གནང་གི་འདུག

བོད་ཀྱི་རྒྱལ་ས་ལྷ་ས་ནས་བལ་ཡུལ་བར་གྱི་ཐད་ཀར་གནམ་གྲུ་གཉིས་པ་དེ་འགོ་བཙུགས་འདུག

བོད་དང་བལ་ཡུལ་བར་ཐད་ཀར་གནམ་གྲུའི་ལས་གཞི་སྤེལ་བཞིན་པ་དེ་ནི་རྒྱ་ནག་གིས་ལྷོ་ཨེ་ཤེ་ཡའི་ནང་དུ་དབང་ཤུགས་རྒྱ་སྐྱེད་བྱ་ཆེད་ཡིན་པ་གནད་དོན་དབྱེ་ཞིབ་པས་འགྲེལ་བརྗོད་གནང་གི་འདུག

བོད་རང་སྐྱོང་ལྗོངས་ཟེར་བའི་ནང་རྒྱ་ནག་གིས་འོད་གསོག་གློག་གཏོང་མ་ལག་ཆེ་ཤོས་སྒོ་འབྱེད་བྱས་པ་དེ་རྒྱ་ནག་དང་རྒྱ་རིགས་ཚོང་པའི་ཁེ་ཕན་ཆེད་དམིགས་པ་ཡིན་སྐོར་ཉམས་ཞིབ་པས་གསུང་གི་འདུག

བོད་རང་སྐྱོང་ལྗོངས་ཞེས་པའི་ལྷོ་ཁ་གྲོང་ཁྱེར་ཆུ་གསུམ་རྫོང་སྐྱ་བ་གྲོང་ཚོར་རྒྱ་ནག་གཞུང་དང་འབྲེལ་བ་ཡོད་པའི་ཧྭ་ནེང་ཞེས་པའི་ནུས་གསོག་བཟོ་ལས་ཁང་གིས་འོད་གསོག་གློག་གཏོང་མ་ལག་ཆེ་ཤོས་འཛུགས་སྐྲུན་གྱིས་གློག་གཏོང་འགོ་བཙུགས་ནའང་། ནུས་ཤུགས་དེའི་ཁེ་ཕན་གཙོ་བོ་རྒྱ་ནག་དང་རྒྱ་རིགས་ཆེད་ཡིན་པ་ཉམས་ཞིབ་པས་གསུང་གི་འདུག

རྡང་ཆུ་གཙང་པོའི་ཁོར་ཡུག་སྲུང་སྐྱོབ་མཁན་མཚོ་སྔོན་ཚེ་རིང་ལགས་སུ་ནག་ཉེས་ངོས་ལེན་དགོས་པའི་མནར་གཅོད་དང་འདྲི་རྩད་ཤུགས་ཆེར་བྱེད་བཞིན་ཡོད་འདུག

ཕྱི་ལོ་ ༢༠༢༥ ཟླ་ ༣ ཚེས་ ༣༡ ཉིན། འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན། རྒྱ་ནག་གཞུང་གིས་བོད་མི་ཁོར་ཡུག་ཐོབ་ཐང་འཐབ་རྩོད་པ་མཚོ་སྔོན་ཚེ་རིང་ལགས་སུ། དྲ་ལམ་དུ་ཡུལ་དེའི་རྡང་ཆུ་གཙང་བོའི་བྱེ་སྡོ་སྔོག་འདོན་ཐེར་འདོན་བྱས་པ་ནག་ཉེས་སུ་ངོས་ལེན་དགོས་པའི་བཙན་ཐབས་འོག མནར་གཅོད་དང་འདྲི་རྩད་ཤུགས་ཆེར་བྱེད་བཞིན་པ་མ་ཟད། ཁོང་གི་ནང་མི་དང་འབྲེལ་ཡོད་ཚོར་དམ་དྲག་སུན་བཙེར་འོག་སྡོད་བཟོད་མི་ཐུབ་པའི་གནས་སུ་སྐྱེལ་བཞིན་ཡོད་པ། བོད་ཕྱི་ནང་གཉིས་ཀྱི་འབྲེལ་ཡོད་བོད་མི་གཉིས་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་གནས་ཚུལ་མཁོ་སྤྲོད་གནང་བྱུང་།

རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གནས་བབ་ཡར་རྒྱས་ཕྱིན་སྐོར་གྱི་རྒྱབ་ཤ་དཀར་པོའི་དེབ་བཏོན་པར་བོད་མིའི་སྒྲིག་འཛུགས་ཀྱིས། དེ་ནི་རྒྱ་ནག་གིས་རྫུན་བསྒྲགས་བསྐྱར་བཤད་ཙམ་ཡིན་པ་འགྲེལ་བརྗོད་གནང་གི་འདུག

ཕྱི་ལོ་ ༢༠༢༥ ཟླ་ ༣ ཚེས་ ༢༨ ཉིན་རྒྱ་ནག་དམར་ཤོག་ཚོགས་པའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་ཟེར་བས། དུས་རབས་གསར་པའི་བོད་ཀྱི་འགྲོ་བ་མིའི་ཐོབ་ཐང་བྱ་གཞག་གི་འཕེལ་རྒྱས་དང་ཡར་ཐོན་ཞེས་པའི་རྒྱབ་ཤ་དཀར་པོའི་དེབ་ (‘White Paper on Human Rights in Tibet in the New Era’) བཏོན་ཏེ། རྒྱ་ནག་གི་འགོ་ཁྲིད་ཞི་ཅིན་ཕིང་གི་འགོ་ཁྲིད་འོག་བོད་ནང་གི་འགྲོ་བ་མིའི་ཐོབ་ཐང་དང་མི་མང་བདེ་སྐྱིད་ཡར་རྒྱས་ཕྱིན་སྐོར་སོགས་ཤུགས་ཆེར་བསྒྲགས་འདུག