Xitay hökümiti taylandning yéngi yilini tebriklesh teshwiqat filimida Uyghurdin paydilan'ghan

Tayland xelqi songkran dep ataydighan en'eniwiy yéngi yilini her yili 13-aprél tebrikleydighan bolup, xitayning tayland paytexti bangkoktiki elchixanisi bu bayramda mexsus bir qisqa filim ishligen we uningda bir Uyghur qizni bash pérsonazh qilghan.

Xitay elchixanisi mezkur filimni feysbuk hésabida hembehirligen bolup, uningda taylanda oquwatqan bir Uyghur qiz oqughuchi bash rol oynighan. Filimda bu qiz bashqa oqughuchilar bilen bangkoktiki bazarlarni aylinip xitay elchixanisigha baridu. Ular taylandning yerlik usulida yéngi yilni tebrikleydu. Uningdin kéyin, ular xitay bash elchisi xen jichyang bilen yéngi yilliq tilek tiliship, uninggha hörmet bildüridu. Filim “Tayland bilen xitay xelqi qolni qolgha tutashturup özliri arzu qilidighan jem'iyetni yaritidu. Songkran künige mubarek bolsun” dégen xet bilen axirlashqan.

Bu yil 27-féwral, tayland hökümiti 10 nechche yildin béri tutup turuluwatqan Uyghurlardin 40 nepirini mexpiy halda xitaygha qayturup bergen bolup, taylandning bu qilmishi xelq'ara jem'iyetning qattiq eyiblishige uchrighan idi. Netijide, amérika taylandtiki bu ishqa mes'ul bolghan barliq emeldarlarni jazalighan idi. Uningdin kéyin, bu ishqa mes'ul bolghan tayland emeldarliri özining qilmishini aqlash üchün xitaygha qayturulghan Uyghurlarni ziyaret qilip, ularning xushal-xuram yashawatqanliqini bildürgen. Emma ular yenila kishilik hoquq teshkilatliri we gherb elliri teripidin küchlük tenqidke uchrighan.

Taylandiki xitay elchixanisining yéngi yilni tebriklesh bahaniside ishligen bu filimda bir Uyghur qizni bash pérsonazh qilishi xitay hökümitining yéqinda taylandin mejburiy qayturulghan 40 Uyghurning paji'esi we ularning hazirqi weziyitini untuldurush üchün élip barghan bir urunushi dep qaralmaqta.