Türkiyening istanbulda chong yer tewresh yüz bérip, ahaliler arisida ölüsh kélip chiqmighan

Türkiyening eng chong shehiri we soda merkizi bolghan istanbulda charshenbe küni köp qétim yer tewresh yüz bergen bolup, bu yer tewreshning tesir küchi hetta paytext enqeregimu yétip barghan. Charshenbe küni istanbulda chüshtiki yer tewresh eng küchlük bolup, uning derijisi 6.2 Derijige yétip barghan. Istanbuldiki égiz binalar bu yer tewreshte qattiq silkin'gen bolsimu, emma binalarda örülüsh bolmighan.

En'giliye BBC téléwiziyesining xewiride qarighanda, bu qétimqi yer tewreshning mergizi türkiyening marmara déngizigha toghra kelgen bolup, u istanbulgha peqet 80 kilométr kélidiken. Istanbul hökümitining bildürüshiche, mezkur sheherde charshenbe küni aldi-keyni bolup 50 qétimdin artuq yer tewrigen. Istanbul hökümet da'irliri hazirche bu yer tewreshte héch kimning qaza tapmighanliqini bildürüp, peqet 151 kishining binalardin sekrep zeximilen'genlikini dégen.

En'giliye BBC téléwiziyesining xewiride éytilishiche, istanbuldiki puqralar bu 6.2 Derijidiki yer tewreshni yéqinqi yillardin buyanqi eng chong yer tewresh dep hés qilghanliqini éytip, bundin kéyin téximu chong yer tewresh mumkinchiliki barliqidin endishe qilidighanliqini ipadiligen.

Xewerde éytilishiche, istanbuldiki ahaliler yer tewresh yüz bergendin kéyinla binalardin qéchip chiqip özini daldigha alghan. Sélim usta'oglu dégen bir oqughuchi BBC ge özining peqet bir qanche muhim nersilirini élipla binadin qéchip chiqqanliqi we taki kechkiche qaytmaydighanliqini bildürgen. Koch uniwérsitétining iqtisadiy penler proféssori sélwa démir'alpning éytishiche, ular égiz binada turidighanliqi üchün yer tewrigende bekla chöchüp ketken, emma hazir bixeter iken.

Istanbul hökümet da'irliri bu qétimqi yer tewreshte binalarning közge körünerlik derijide ziyan'gha uchrimighanliqini bildürsimu, emma yawrupa tereptiki fatih rayonidiki bir tashlanduq binaning örülüp chüshkenlikini éytqan. Istanbul türkiyediki nopusi eng köp sheher bolup, türkiye nopusining 5 tin 1 i bolghan 16 milyon ahale bu tarixiy sheherde yashaydu. Türkiyening jughrapiyisi yer tewresh belwéghida jaylashqanliqi üchün chong yer tewreshler dawamliq bolup turidu. 2023 - Yili türkiyening jenubiy qismida yüz bergen chong yer tewreshte 55000 din artuq adem qaza tapqan idi.