Түркийәниң истанбулда чоң йәр тәврәш йүз берип, аһалиләр арисида өлүш келип чиқмиған

Түркийәниң әң чоң шәһири вә сода мәркизи болған истанбулда чаршәнбә күни көп қетим йәр тәврәш йүз бәргән болуп, бу йәр тәврәшниң тәсир күчи һәтта пайтәхт әнқәрәгиму йетип барған. Чаршәнбә күни истанбулда чүштики йәр тәврәш әң күчлүк болуп, униң дәриҗиси 6.2 Дәриҗигә йетип барған. Истанбулдики егиз биналар бу йәр тәврәштә қаттиқ силкингән болсиму, әмма биналарда өрүлүш болмиған.

Әнгилийә BBC телевизийәсиниң хәвиридә қариғанда, бу қетимқи йәр тәврәшниң мәргизи түркийәниң мармара деңизиға тоғра кәлгән болуп, у истанбулға пәқәт 80 километр келидикән. Истанбул һөкүмитиниң билдүрүшичә, мәзкур шәһәрдә чаршәнбә күни алди-кәйни болуп 50 қетимдин артуқ йәр тәвригән. Истанбул һөкүмәт даирлири һазирчә бу йәр тәврәштә һеч кимниң қаза тапмиғанлиқини билдүрүп, пәқәт 151 кишиниң биналардин сәкрәп зәхимиләнгәнликини дегән.

Әнгилийә BBC телевизийәсиниң хәвиридә ейтилишичә, истанбулдики пуқралар бу 6.2 Дәриҗидики йәр тәврәшни йеқинқи йиллардин буянқи әң чоң йәр тәврәш дәп һес қилғанлиқини ейтип, бундин кейин техиму чоң йәр тәврәш мумкинчилики барлиқидин әндишә қилидиғанлиқини ипадилигән.

Хәвәрдә ейтилишичә, истанбулдики аһалиләр йәр тәврәш йүз бәргәндин кейинла биналардин қечип чиқип өзини далдиға алған. Селим устаоглу дегән бир оқуғучи BBC гә өзиниң пәқәт бир қанчә муһим нәрсилирини елипла бинадин қечип чиққанлиқи вә таки кәчкичә қайтмайдиғанлиқини билдүргән. Коч университетиниң иқтисадий пәнләр профессори селва демиралпниң ейтишичә, улар егиз бинада туридиғанлиқи үчүн йәр тәвригәндә бәкла чөчүп кәткән, әмма һазир бихәтәр икән.

Истанбул һөкүмәт даирлири бу қетимқи йәр тәврәштә биналарниң көзгә көрүнәрлик дәриҗидә зиянға учримиғанлиқини билдүрсиму, әмма яврупа тәрәптики фатиһ районидики бир ташландуқ бинаниң өрүлүп чүшкәнликини ейтқан. Истанбул түркийәдики нопуси әң көп шәһәр болуп, түркийә нопусиниң 5 тин 1 и болған 16 милйон аһалә бу тарихий шәһәрдә яшайду. Түркийәниң җуғрапийиси йәр тәврәш бәлвеғида җайлашқанлиқи үчүн чоң йәр тәврәшләр давамлиқ болуп туриду. 2023 - Йили түркийәниң җәнубий қисмида йүз бәргән чоң йәр тәврәштә 55000 дин артуқ адәм қаза тапқан иди.