Украина һөкүмити қолида хитайниң русийәгә қорал-ярақ тәминлигәнликиниң дәлили барлиқини билдүрди

Украина һөкүмити өзиниң қолида хитайниң русийәгә қорал-ярақ тәминлигәнлики тоғрисида истиқбаратниң барлиқини билдүрди. Украина президенти володимир зелениски пәйшәнбә күни баянат елан қилип, өзиниң қолида хитайниң русийәгә зәмбирәк вә оқ-дориси тәминлигәнлики тоғрисида истиқбаратниң барлиқини билдүрди. Президент зелениски сөзидә, “биз ахири хитайниң русийә федератсийәсигә қорал-ярақ тәминлигәнлики тоғрисидики учурға игә болдуқ. Биз хитай вәкиллириниң русийәниң территорийәсидә бәзи қорал-ярақларни ишләпчиқарғанлиқиға ишинимиз” дегән.

Зелениски сөзидә йәнә, “бизниң қолимизда хитай билән русийәниң дөләт мудапийә қабилийитини күчләндүрүш үчүн бу мәқсәттә иш бирлики елип барған пакитимиз бар” дәп, өзиниң хитай рәиси ши җинпиң илгири русийәгә қорал-ярақ бәрмәймиз дегән вәдисигә хилаплиқ қилғинидин әпсусланған.

Җәнубий хитай әттигәнлик гезитиниң бу тоғрисида бәргән хәвиригә қариғанда, украинаниң хитайни бу мәсилә үстидә әйиблиши хитай билән украина арисидики мунасивәтни техиму мурәккәпләштүриветидикән. Чүнки украина техи йеқиндила хитай әскәрлириниң русийәгә ян бесип украинаға қарши уруш қилған әскәрлирини әсиргә чүшүргәнликини елан қилған иди. Мәзкур гезиттә ейтилишичә, хитай тәрәп сәйшәнбә күни украинада тутулған икки хитай әскири мәсилисидин пайдилинип уни көптүргәнликини билдүргән икән.

Украина һөкүмити дүшәнбә күни өзиниң икки хитай әскирини алдинқи сәптә әсиргә чүшүргәнликини билдүрүп, бу икки әскәрниму мухбирларни күтүвелиш йиғиниға елип кәлгән иди. Бу мухбирларни күтүвелиш йиғинида җаң ренба вә ваң гуаңҗүн дәп атилидиған бу икки әскәр өзлириниң ялған вәдиләр вә тордики әскәр қубул қилиш еланлири арқилиқ бу урушқа қатнашқанлиқини ейтиш билән бир вақитта, “русийә бизни алдиди” дәп билдүргән.

Бу йиғинда хитай әскәр җаң ренба илгири хитайда от өчүргүчи болуп хизмәт қилған болуп, у “мениң пул тапқим бар иди. Әмма мән урушқа қатнишип қалимән дәп ойлимиған” дегән. Хитай әскәр ваң гуаңҗүн алдинқи сәпкә келип үч күн болмайла әсиргә чүшкән болуп, у “реал уруш дегән биз кино билән телевизорларда көргәнгә пәқәтла охшимайдикән. Әң яхшиси урушқа қатнашмаслиқ керәк” дегән. Бу иккәйлән йәнә русийәгә келип алданғанлиқини билдүрүп, уларға рос тәрәпниң көп пул беридиғанлиқи вә уруштин хали вәзипә өтәйдиғанлиқиға вәдә бәргән икән. Әмма русийәгә келиши билән қолидики телефон вә банка картлирини мусадирә қилип узун қалмай алдинқи сәпкә әвәткән икән.

Бу мухбирларни күтүвелиш йиғинида бу икки хитай әскири русийәни қаттиқ әйибләп, башқа хитайларниң келип бу урушқа қатнашмаслиқини тәвсийә қилип, өзлириниң урушта һеч кимни өлтүрмигәнликини билдүргән. Улар йәнә өзлириниң русийәгә әскәр болуп келишидә хитай һөкүмитиниң һеч қандақ рол ойнимиғанлиқини билдүргән.

Украина президенти зелениски өткән җүмә күни русийә тәрәптә туруп украинаға қарши уруш қиливатқан бир қанчә йүз хитай әскири барлиқини билдүргән иди.