Ukra'ina hökümiti qolida xitayning rusiyege qoral-yaraq teminligenlikining delili barliqini bildürdi

Ukra'ina hökümiti özining qolida xitayning rusiyege qoral-yaraq teminligenliki toghrisida istiqbaratning barliqini bildürdi. Ukra'ina prézidénti wolodimir zéléniski peyshenbe küni bayanat élan qilip, özining qolida xitayning rusiyege zembirek we oq-dorisi teminligenliki toghrisida istiqbaratning barliqini bildürdi. Prézidént zéléniski sözide, “Biz axiri xitayning rusiye fédératsiyesige qoral-yaraq teminligenliki toghrisidiki uchurgha ige bolduq. Biz xitay wekillirining rusiyening térritoriyeside bezi qoral-yaraqlarni ishlepchiqarghanliqigha ishinimiz” dégen.

Zéléniski sözide yene, “Bizning qolimizda xitay bilen rusiyening dölet mudapiye qabiliyitini küchlendürüsh üchün bu meqsette ish birliki élip barghan pakitimiz bar” dep, özining xitay re'isi shi jinping ilgiri rusiyege qoral-yaraq bermeymiz dégen wedisige xilapliq qilghinidin epsuslan'ghan.

Jenubiy xitay ettigenlik gézitining bu toghrisida bergen xewirige qarighanda, ukra'inaning xitayni bu mesile üstide eyiblishi xitay bilen ukra'ina arisidiki munasiwetni téximu murekkepleshtüriwétidiken. Chünki ukra'ina téxi yéqindila xitay eskerlirining rusiyege yan bésip ukra'inagha qarshi urush qilghan eskerlirini esirge chüshürgenlikini élan qilghan idi. Mezkur gézitte éytilishiche, xitay terep seyshenbe küni ukra'inada tutulghan ikki xitay eskiri mesilisidin paydilinip uni köptürgenlikini bildürgen iken.

Ukra'ina hökümiti düshenbe küni özining ikki xitay eskirini aldinqi septe esirge chüshürgenlikini bildürüp, bu ikki eskernimu muxbirlarni kütüwélish yighinigha élip kelgen idi. Bu muxbirlarni kütüwélish yighinida jang rénba we wang gu'angjün dep atilidighan bu ikki esker özlirining yalghan wediler we tordiki esker qubul qilish élanliri arqiliq bu urushqa qatnashqanliqini éytish bilen bir waqitta, “Rusiye bizni aldidi” dep bildürgen.

Bu yighinda xitay esker jang rénba ilgiri xitayda ot öchürgüchi bolup xizmet qilghan bolup, u “Méning pul tapqim bar idi. Emma men urushqa qatniship qalimen dep oylimighan” dégen. Xitay esker wang gu'angjün aldinqi sepke kélip üch kün bolmayla esirge chüshken bolup, u “Ré'al urush dégen biz kino bilen téléwizorlarda körgen'ge peqetla oxshimaydiken. Eng yaxshisi urushqa qatnashmasliq kérek” dégen. Bu ikkeylen yene rusiyege kélip aldan'ghanliqini bildürüp, ulargha ros terepning köp pul béridighanliqi we urushtin xali wezipe öteydighanliqigha wede bergen iken. Emma rusiyege kélishi bilen qolidiki téléfon we banka kartlirini musadire qilip uzun qalmay aldinqi sepke ewetken iken.

Bu muxbirlarni kütüwélish yighinida bu ikki xitay eskiri rusiyeni qattiq eyiblep, bashqa xitaylarning kélip bu urushqa qatnashmasliqini tewsiye qilip, özlirining urushta héch kimni öltürmigenlikini bildürgen. Ular yene özlirining rusiyege esker bolup kélishide xitay hökümitining héch qandaq rol oynimighanliqini bildürgen.

Ukra'ina prézidénti zéléniski ötken jüme küni rusiye terepte turup ukra'inagha qarshi urush qiliwatqan bir qanche yüz xitay eskiri barliqini bildürgen idi.