Uyghur kishilik hoquq qurulushi xelq'araliq méhmanxana zenjirlirining Uyghur rayonida kéngiyiwatqanliqini eyiblep doklat élan qildi

Uyghur kishilik hoquq qurulushi (UHRP) 17-aprél “Qeyerde turishingizning ehmiyiti bar: sherqiy türkistandiki xelq'araliq méhmanxana zenjirliri” namliq bir doklat élan qilip, xelq'aradiki chong méhmanxana zenjirlirining Uyghur rayonida zor kölemde kéngiyiwatqanliqini ashkarilighan.

Doklatta, Uyghur rayonida insaniyetke qarshi jinayetler we irqiy qirghinchiliq dawamlishiwatqan bir waqitta, akkor (Accor), xilton (Hilton), IHG, marri'ot (Marriott) we windham (Wyndham) qatarliq xelq'araliq méhmanxana zenjirlirining mewjutliqi we téximu köp méhmanxana qurush pilanliri bildürülgen. Doklatta éytilishiche, 2025-yili aprélda Uyghur rayonida az dégende 115 xelq'araliq méhmanxana tijaret qilmaqta, yene 74 méhmanxana quruluwatqan yaki pilanliniwatqan iken.

Doklatta eng éghir mesililerning biri – xilton (Hilton),IHG  we windham (Wyndham) qatarliq üch xelq'araliq méhmanxana zenjirining shinjang ishlepchiqirish we qurulush bingtu'eni (XPCC) bashquridighan rayonlargha jaylashqanliqi bolup, amérika, kanada we yawropa ittipaqi bu bingtu'en'ge kishilik hoquqqa éghir xilapliq qilghanliqi üchün jaza yürgüzgen idi.

Doklatta, xilton (Hilton) shirkitining bir wasite shirket arqiliq xotende weyran qilin'ghan meschitning ornida hampton xilton (Hilton) méhmanxanisini qurghanliqi yene bir chong mesile dep atalghan bolup, bu, xitay hökümiti pütün rayonda 10 mingdin artuq meschitni chaqqandin kéyin wujudqa chiqqan.

Akkor (Accor) shirkiti bolsa, mejburiy “Emgek yötkesh” programmisigha chétishliq bir wasitichi xitay shirkiti bilen “Shinjanggha yardem” programmilirigha qatnashqan H World Group Limited  namliq xitaydiki shériki arqiliq Uyghur mejburiy emgikige biwasite munasiwetlik dep qaralghan.

Uyghur kishilik hoquq qurulushining tekshürüshige asaslan'ghanda, hazir ürümchi, qeshqer, ghulja we altay qatarliq sheherlerde qurulushqa pilanliniwatqan méhmanxanilar marri'ot (Marriott) ning ritz-karlton (Ritz_Carlton), IHG  ning interkontinéntal (InterContinental) we xilton (Hilton) ning konrad (Conrad) qatarliq yuqiri derijilik markiliridin bolup, Uyghurlarning yashawatqan ré'alliqliri bilen keskin zitlishidiken.

Doklatta, xelq'araliq méhmanxana zenjirlirining Uyghur rayonidiki pa'aliyetlirining – birleshken döletler teshkilatining tijaret we kishilik hoquqlar toghrisidiki yétekchi prinsipliri, shundaqla xelq'araliq emgek teshkilatining mejburiy emgek toghrisidiki nizamliri qatarliq muhim xelq'araliq ölchemlerge xilapliq qilish éhtimalliqi barliqi tekitlen'gen.

Doklatta yene  Booking, Expedia we Tripadvisor qatarliq yataq zakas qilish supilirining Uyghur rayonidiki méhmanxanilar bilen ishlesh arqiliq, kishilik hoquq depsendichilikige chétishliq karxanilarni wasitilik qollighanliqi körsitip bérilgen.

Uyghur kishilik hoquq qurulushi bu xelq'araliq méhmanxana zenjirlirining derhal Uyghur rayonidiki barliq pa'aliyetlirini we kéngiyishini toxtitip, tijaret alaqilirini üzüshi kéreklikini telep qilghan. Shundaqla, zakas qilish supilirining Uyghur rayonidiki barliq méhmanxanilarni tizimlikliridin chiqiriwétishini we jazalan'ghan teshkilatlargha baghlan'ghan méhmanxanilarni tekshürüshini telep qilghan.