မော်လမြိုင်ကျွန်းက လူငယ် ခုနစ်ဆယ်ခန့် စစ်သားစုဆောင်းခံရ

ဧရာ၀တီတိုင်း မော်လမြိုင်ကျွန်းမြို့နယ်မှာ စစ်ကောင်စီရဲ့ စစ်မှုထမ်းသင်တန်း အမှတ်စဥ် (၁၁) အတွက် လူငယ် ခုနစ်ဆယ်ခန့် စစ်မှုထမ်းဖို့ စုဆောင်းခံရပြီး မတ် ၁၄ ရက်နေ့မှာ ရန်ကုန်တိုင်းအတွင်းက စစ်သင်တန်းကျောင်းတွေကို ပို့ဆောင်ခံခဲ့ရတယ်လို့ ဒေသခံတွေက ပြောပါတယ်။

မော်လမြိုင်းကျွန်းမြို့နယ်အခြေစိုက် စစ်ကောင်စီရဲ့ ခမရ (၅၃၄) တပ်ရင်းကနေ စစ်မှုထမ်း မဲပေါက်တယ်ဆိုပြီး အသက် ၁၈ နှစ်နဲ့ ၃၅ နှစ်ကြား လူငယ်တွေကို နေအိမ်တွေထဲထိ လိုက်လံဖမ်းဆီး ခေါ်ဆောင်စုဆောင်းပြီးနောက် စစ်သင်သန်းကျောင်းတွေဆီ ပို့လိုက်တာလို့ ဒေသခံတစ်ဦးက ပြောပါတယ်။

“အဓမ္မ စုစောင်းခံရတယ်ဆိုတာ ရွာတွေမှာက ကလေးတွေက အိမ်မှာ မအိပ်ရဲဘူး။ အဲဒါကို တွေ့တဲ့သူကို ဂုတ်ဆွဲခေါ်တာပေါ့။ တပ်ရင်းကလည်း ရှိနေတော့ ပိုဆိုးတာပေါ့။ တစ်ခါတလေကျရင် မိဘတွေက ဘယ်လိုက်လို့ လိုက်ရမှန်း မသိတဲ့အဖြစ်တွေ”

ဖမ်းဆီးခေါ်ဆောင်ခံရသူတွေထဲမှာ အသက်မပြည့်သေးတဲ့ ၁၇ နှစ်အရွယ် လူငယ်တချို့လည်း ပါဝင်တယ်လို့ သူက ပြောပါတယ်။ ဖမ်းဆီးစုဆောင်းခံရသူ လူငယ် ခုနစ်ဆယ်ကျော်ရဲ့ အသေးစိတ် အချက်အလက်တွေကိုတော့ မသိရသေးပါဘူး။

ဒီအခြေအနေတွေနဲ့ပတ်သက်လို့ တုံ့ပြန်ချက်ရဖို့ စစ်ကောင်စီရဲ့ ဧရာဝတီတိုင်းပြောခွင့်ရသူ တိုင်းလူမှုရေးဝန်ကြီး ဦးခင်မောင်ကြည်ကို RFA က ဆက်သွယ်ခဲ့ပေမဲ့ လက်ခံဖြေဆိုတာမရှိပါဘူး။

ဖေဖော်ဝါရီအတွင်းကလည်း ဧရာဝတီတိုင်း ဟင်္သာတ၊ လပွတ္တာနဲ့ ကန်ကြီးထောင့်မြို့နယ်တွေမှာ စစ်မှုထမ်းစာရင်းပါသူတွေကို မဲနှိုက်ရွေးချယ်တာ မရှိတော့ဘဲ နာမည်စာရင်းနဲ့ တိုက်ရိုက်ခေါ်ယူမှုတွေ ရှိတာကြောင့် လူငယ်တွေ ထွက်ပြေးတိမ်းရှောင်နေကြတယ်လို့ ဒေသခံတွေက ပြောပါတယ်။