ལོ་གསར་ཉིན་ལྷ་སར་བོད་མི་ཁྲི་ཕྲག་མང་པོས་ཆོས་མཇལ་ཞུས།

༄༅༎བོད་ནས་འདི་ག་རླུང་འཕྲིན་ཁང་ལ་གནས་ཚུལ་འགྲེལ་བརྗོད་གནང་དོན་ལྟར་ན་ ད་ལོ་བོད་ནང་ལྕགས་སྟག་གནམ་ལོ་གསར་དུ་བཞད་པའི་ལོ་གསར་ཚེས་གཅིག་ཉིན་ཆོས་ཕྱོགས་ཐོག་ནས་ལོ་གསར་ལ་བསུ་བ་ཞུ་བའི་རྣམ་པ་ཞིག་ཐོན་ཡོད་པ་དང་ ལྷག་པར་དུ་བོད་ཀྱི་རྒྱལ་ས་ལྷ་སའི་ཁུལ་དུ་ཆོས་མཇལ་དུ་ཕེབས་མཁན་བོད་མི་ཧ་ཅང་མང་པོ་ཡོད་པ་མ་ཟད་ ལྷ་སའི་གཙུག་ལག་ཁང་ལ་ཆོས་མཇལ་ཞུ་མཁན་ཁྲི་ཚོ་བརྒལ་བའི་གནས་ཚུལ་གསུངས་འདུག

བོད་ཀྱི་ས་ཁུལ་ཁག་ཅིག་ནང་བོད་མི་ཚོས་ད་ལོ་ཡང་ན་ནིང་གི་མཇུག་མཐུད་ནས་ལོ་གསར་གཏོང་རྒྱུ་མིན་པའི་ཐག་གཅོད་གནང་ཡོད་པ་བཞིན་ བོད་ཀྱི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ལྕགས་སྟག་ལོའི་ལོ་གསར་ཉིན་དགའ་དགའ་སྐྱིད་སྐྱིད་བྱེད་མི་དགོས་པའི་སྐོར་བོད་མི་མང་ཚོགས་ལ་བཀའ་སློབ་སྩལ་གནང་མཛད་ཡོད་ཅིང་ ཁ་ས་ལོ་གསར་ཚེས་གཅིག་གི་སྔ་འདྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྡ་རམ་ས་ལའི་ཐེགས་ཆེན་ཆོས་གླིངགཙུག་ལག་ཁང་དུ་བོད་མི་གཙོས་པའི་ཕྱི་ནང་མི་མང་ལ་བཀའ་སློབ་སྩལ་བའི་ནང་ལ་ཡང་ ཕྱི་ལོ་ཉིས་སྟོང་བརྒྱད་ལོའི་སུམ་ཅུའི་དུས་དྲན་ཉིན་ནས་བཟུང་ བོད་ནང་བོད་མིའི་ཞི་རྒོལ་ཆེན་མོའི་ནང་བོད་མི་མང་པོ་རྐྱེན་ལམ་དུ་ཕྱིན་པ་དང་གར་སོང་ཆ་མེད་དུ་གྱུར་བ་ རྒྱ་མིའི་འཛིན་བཟུང་དོ་དམ་དང་  བཙོན་འཇུག་འོག་སྡུག་བསྔལ་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་ཞུ་ཕྱིར་བོད་ཕྱི་ནང་གཉིས་སུ་གནས་པའི་བོད་མི་རྣམས་ཀྱིས་ས་གླང་གནམ་ལོ་གསར་པར་སྲུང་བརྩི་ཞུས་མེད་སྟབས་གཞུང་འབྲེལ་གྱི་སྒོ་ནས་ལོ་གསར་སྲུང་བརྩི་མ་ཞུས་པ་ད་ལོ་ལོ་གཉིས་པ་དེ་ཡིན་པ་བཀའ་བསྩལ་གནང་མཛད་ཡོད་པ་རེད་ བོད་ནས་འདི་ག་རླུང་འཕྲིན་ཁང་ལ་གནས་ཚུལ་འགྲེལ་བརྗོད་གནང་མཁན་གྱིས་མུ་མཐུད་གསུང་དོན་ལ་ བོད་ཀྱི་རྒྱལ་ས་ལྷ་ས་ཁུལ་གྱི་ས་གནས་འཐབ་ཕྱོགས་གཅིག་འགྱུར་ལས་ཁང་གིས་ལས་བྱེད་ཆེད་གཏོང་བྱས་ནས་བོད་མི་ཚོས་ལོ་གསར་ལ་སྲུང་བརྩི་བྱེད་ཀྱི་ཡོད་མེད་དཔར་དང་བརྙན་འཕྲིན་རྒྱབ་ནས་བརྟག་དཔྱད་བྱེད་ཀྱི་ཡོད་པ་ངོ་སྤྲོད་གནང་འདུག དེ་དང་འབྲེལ་རྒྱ་ནག་གཞུང་འབྲེལ་ཤིན་ཧའ་གསར་འགྱུར་བརྒྱུད་ལམ་གྱི་དབྱིན་ཡིག་ཐོག་ནས་ཕྱི་ཚེས་༡༤ཉིན་གནས་ཚུལ་སྤེལ་བའི་ནང་ལ་ཡང་བོད་ནང་བོད་མི་སྟོང་ཕྲག་མང་པོས་བོད་ལྕགས་སྟག་ལོའི་ལོ་གསར་ཉིན་ཟབ་ཆོར་རྒྱས་པོ་སྤྲད་ནས་སྲོལ་རྒྱུན་གྱི་རྣམ་པ་བཞིན་དགོན་སྡེ་ཁག་ལ་ཆོས་མཇལ་སོགས་ལ་ཕེབས་པའི་ཐོག་ནས་ལོ་གསར་ལ་སྲུང་བརྩི་ཟབ་རྒྱས་ཞུས་ཡོད་ལུགས་གནས་ཚུལ་སྤེལ་འདུག