གསར་འགྱུར་ཡིག་ཚགས།

༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་དང་བསྟུན་སྐུ་ཚེའི་ལོ་རྒྱུས་སྐོར་གྱི་གློག་བརྙན་སྐུ་མདུན་ཞེས་པ་ཨ་རིའི་ཊེ་བྷེ་ཀ་གློག་བརྙན་དུས་སྟོན་ཐོག་གཟིགས་འབུལ་ཞུ་རྒྱུ་རེད་འདུག

ཨ་རིའི་ (Tribeca Film Festival) གློག་བརྙན་དུས་སྟོན་ཚོགས་པས། སྐུ་མདུན་ཞེས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་ལོ་རྒྱུས་སྐོར་གྱི་གློག་བརྙན་དེ་བཞིན། འདི་ལོར་མགོན་པོ་མཆོག་གི་༸སྐུའི་གོ་སྟོན་དང་བསྟུན་ཊེ་བྷེ་ཀ་གློག་བརྙན་དུས་སྟོན་ཐོག་ནིའུ་ཡོག་ཏུ་གཟིགས་འབུལ་ཞུ་རྒྱུ་ཡིན་པའི་གསལ་བསྒྲགས་གནང་ཡོད་པ་རེད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཨ་རིར་གཞུང་འབྲེལ་ཕྱོགས་ཕེབས་དང་འབྲེལ་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པའི་འབོད་སྐུལ་ཞུས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཨ་རིར་གཞུང་འབྲེལ་ཕྱོགས་ཕེབས་དང་འབྲེལ་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཀྱིས། ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་དགོས་པ་སོགས་བོད་དོན་ཞུ་གཏུག་གནང་འདུག

ཌེ་ལྦེཌ་པར་ཌུ་ལགས་ཨ་རིའི་རྒྱ་ནག་གི་གཞུང་ཚབ་ཆེན་མོར་བསྐོ་གཞག་གནང་གཏན་འཁེལ་འདུག

ཨ་རྒྱ་གཉིས་ཀྱི་དབར་སྒོ་ཁྲལ་གྱི་འགྲན་རྩོད་ཤུགས་ཆེ་འབྱུང་བཞིན་པའི་དུས་སྐབས་འདིར། ཟླ་ ༤ ཚེས་ ༢༩ རེས་གཟའ་མིག་དམར་ཉིན་ཨ་རིའི་གྲོས་ཚོགས་གོང་མས་གྲོས་ཚོགས་འཐུས་མི་ཟུར་པ་ཌེ་ཝིཌ་པར་ཌུ་ (David Perdue) ལགས་ཨ་རིའི་རྒྱ་ནག་གི་གཞུང་ཚབ་ཆེན་མོར་བསྐོ་གཞག་གནང་རྒྱུ་གཏན་འཁེལ་བྱུང་ཡོད་པ་རེད་འདུག

ཡུ་རོབ་གྲོས་ཚོགས་ཀྱི་ཚོགས་ཆུང་གཉིས་ཀྱིས་རྒྱ་ནག་དང་ཝེཊ་ནམ་གཞུང་ལ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་འདས་རྐྱེན་ལ་རང་དབང་ལྡན་པའི་ཞིབ་འཇུག་གིས་གྲུབ་དོན་ཕྱི་གསལ་ནང་གསལ་བཟོ་དགོས་པ་བསྒྲགས་འདུག

ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་དང་། ཡུ་རོབ་གྲོས་ཚོགས་ཀྱི་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་འབྲེལ་བའི་སྐུ་ཚབ་ཚོགས་ཆུང་གཉིས་ཀྱིས། ཉེ་ལམ་རྒྱ་ནག་གཞུང་གི་ཤུགས་རྐྱེན་འོག་སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝེཊ་ནམ་དུ་དོགས་གཞི་ཆེན་པོའི་འོག་འདས་གྲོངས་གྱུར་བར། རྒྱ་ནག་དང་ཝེཊ་ནམ་གཞུང་གཉིས་ནས་ཞིབ་འཇུག་ཚད་ལྡན་གྱིས་གནད་དོན་གསལ་བཤད་དགོས་པ་བསྒྲགས་འདུག

རྒྱ་ནག་གིས་ཡུ་རོབ་གྲོས་ཚོགས་ཀྱི་འཐུས་མི་ཁག་ཅིག་སྟེང་བཀལ་བའི་སྲིད་དོན་བཀའ་བཅད་ཕྱིར་འཐེན་བྱས་པ་ཙམ་གྱིས་ཡུ་རོབ་ཀྱིས་རྒྱ་ནག་ལྷན་འབྲེལ་ལམ་འཇམ་དུ་གཏོང་དགོས་པའི་ཁྱབ་པ་མེད་ཅེས་གྲོས་ཚོགས་འཐུས་མིའི་ཚོགས་པས་བསྒྲགས་འདུག

རྒྱ་ནག་དང་ཨ་རི་དབར་ཚོང་དམག་འགྲོ་བཞིན་པའི་སྐབས་འདིར། རྒྱ་གཞུང་གིས་ཡུ་རོབ་དང་ལྷན་འབྲེལ་ལམ་བཟང་དུ་གཏོང་ཆེད། དེ་སྔ་ཡུ་རོབ་གྲོས་ཚོགས་ཀྱི་འཐུས་མི་དང་དཔོན་རིགས་ཁག་ལ་བཀལ་བའི་སྲིད་དོན་བཀའ་བཅད་རྣམས་ཕྱིར་འཐེན་བྱས་པར། ཡུ་རོབ་ཀྱིས་དགའ་བསུ་བྱས་ཡོད་ཀྱང་རྒྱ་ནག་གི་བཀའ་བཅད་དེ་དག་ཐོག་མ་ཉིད་ནས་གཞི་རྩ་མེད་པ་ཡིན་སྟབས། དེ་མེད་པ་བཟོས་པའི་རྐྱེན་གྱིས་རྒྱ་ནག་ཐད་ལངས་ཕྱོགས་འཇམ་དུ་གཏོང་དགོས་པའི་ཁྱབ་པ་མེད་ཅེས་ཡུ་རོབ་རྒྱལ་ཁབ་ ༢༢ ནས་གྲོས་ཚོགས་འཐུས་མི་ ༥༥ ཡིས་མཚན་རྟགས་བཀོད་པའི་བསྒྲགས་གཏམ་ཞིག་སྤེལ་འདུག

རྒྱ་ནག་གིས་ནང་ཆོས་ཕྱི་འབྲེལ་སྲིད་བྱུས་སུ་བཀོལ་སྤྱོད་ཀྱིས་ནང་པའི་རྒྱལ་ཁབ་ཁག་ཏུ་ཤུགས་རྐྱེན་སྤྲོད་བཞིན་པའི་ཁྲོད། རྒྱ་གར་གྱིས་སངས་རྒྱས་ཀྱི་རིང་བསྲེལ་ཝེཊ་ནམ་དུ་གདན་ཞུ་གནང་རྒྱུ།

རྒྱ་ནག་གཞུང་གིས་ལྷོ་ཤར་ཨེ་ཤེ་ཡའི་ནང་པའི་རྒྱལ་ཁབ་ཁག་དང་འབྲེལ་བ་གོང་མཐོར་གཏོང་སླད་ནང་ཆོས་བཀོལ་སྤྱོད་བྱེད་བཞིན་པའི་སྐབས་དང་བསྟུན། རྒྱ་གར་གཞུང་གིས་སྟོན་པ་བཅོམ་ལྡན་འདས་ཀྱི་རིང་བསྲེལ་ཝེཊ་ནམ་དུ་གདན་ཞུ་གནང་རྒྱུ་རེད་འདུག

རྒྱ་ནག་གིས་ཀཤ་མིར་དོན་རྐྱེན་དང་འབྲེལ་ཞིབ་འཇུག་ཚད་ལྡན་དགོས་སྐོར་བརྗོད་བཞིན་པ་ནི་རྒྱ་ནག་གིས་གཉེར་བཞིན་པའི་བྱ་གཞག་དང་འགལ་ཟླར་འགྲོ་བཞིན་ཡོད་པ། ཉམས་ཞིབ་པས་གསུངས་འདུག

(JNU) གཙུག་ལག་སློབ་གཉེར་ཁང་གི་རྒྱ་ནག་རིག་པའི་སློབ་དཔོན་དང་ཤར་ཨེ་ཤེ་ཡའི་ཞིབ་འཇུག་ལྟེ་གནས་ཁང་གི་ཚོགས་གཙོ་ (Srikanth Kondapalli) ལགས་ཀྱིས། རྒྱ་ནག་གིས་རྒྱ་གར་གྱི་སྲིད་བློན་མོ་དྷིའི་ཀཤ་མིར་གྱི་དོན་རྐྱེན་ལ་ཞིབ་འཇུག་ཚད་ལྡན་དགོས་སྐོར་བརྗོད་ཡོད་ཀྱང་། དོན་དངོས་ཐོག་རྒྱ་ནག་གཞུང་ངོས་ནས་ཏོག་དབྱིབས་གཉེན་རིམས་ཀྱི་འབྱུང་ཁུངས་ཐད་རྒྱལ་སྤྱིའི་ཞིབ་འཇུག་མི་སྣར་ཞིབ་འཇུག་ཚད་ལྡན་གྱི་ཆོག་མཆན་སྤྲད་མེད་པ་ནི། རྒྱ་ནག་གཞུང་ནས་གཉེར་བཞིན་པའི་ལས་དོན་དང་འགལ་ཟླར་འགྲོ་བཞིན་ཡོད་པ་གསལ་སྟོན་གནང་འདུག

བོད་ཀྱི་འགྲེམས་སྟོན་ཁང་ལོ་ཉེར་ལྔ་འཁོར་བའི་དུས་སྟོན་དང་བསྟུན་བོད་ཀྱི་བུད་མེད་ཅེས་པའི་དམིགས་བསལ་དུས་ཐུང་འགྲེམས་སྟོན་ཞིག་དབུ་འབྱེད་གནང་ཡོད་པ།

བོད་ཀྱི་འགྲེམས་སྟོན་ཁང་བཙུགས་ནས་ལོ་ ༢༥ འཁོར་བའི་དུས་སྟོན་དང་བསྟུན་བོད་ཀྱི་བུད་མེད་བྱས་རྗེས་ཅན་ཚོའི་སྐོར་གྱི་དམིགས་བསལ་དུས་ཐུང་འགྲེམས་སྟོན་ཞིག་བཀའ་ཟུར་རིན་ཆེན་མཁའ་འགྲོ་ལགས་ནས་དབུ་འབྱེད་གནང་ཡོད་ཅིང་། འགྲེམས་སྟོན་དེའི་ནང་གཙོ་ཆེ་ཤོས་སྤྱི་ལོ་༡༩༥༡ ནས་ད་བར་འདས་གྲོངས་ཕྱིན་ཟིན་པའི་བོད་དོན་འཐབ་རྩོད་པ་དང་ཤེས་ཡོན་སློབ་གསོ། སྨན་བཅོས་ཀྱི་ལམ་ནས་གཞན་ཕན་གྱི་བྱ་བ་སྒྲུབ་མཁན་དང་ནང་ཆོས་ཉམས་ལེན་གྱི་མཁའ་འགྲོ་མ། བོད་ཀྱི་བླ་ཆེན་བསྟན་པ་ལ་མཛད་རྗེས་ཆེན་པོ་འཇོག་མཁན་གྲས་ཀྱི་གསང་ཡུམ་སོགས། བོད་མིའི་སྤྱི་ཚོགས་སུ་བོད་བསྟན་སྲིད་མི་རིགས་དང་བཅས་པའི་ཐོག་བྱས་རྗེས་ཡོད་པའི་བུད་མེད་མང་དག་ཅིག་གི་སྐུ་པར་དང་ལོ་རྒྱུས་འགྲེམས་སྟོན་གནང་ཡོད་པ།

༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་སྦྲེལ་པོ་རྣམ་གཉིས་ལ་མཇལ་ཁ་སྩལ་བ།

བོད་མི་མང་སྤྱི་འཐུས་ཚོགས་གཙོ་མཁན་པོ་གསོད་ནམས་བསྟན་འཕེལ་ལགས་དང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས་རྣམ་གཉིས་ལ་མགོན་པོ་མཆོག་གིས་མཇལ་ཁ་སྩལ་གནང་མཛད་ཡོད་པ་དངཚོགས་གཙོ་སྦྲེལ་པོ་རྣམས་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་ཁག་སྙན་སེང་ཞུས་གནང་ཡོད་པ་རེད་འདུག

ས་ཁམས་རིག་པ་བ་ཚོར་བོད་མཐོ་སྒང་ནས་ཟངས་ཊོན་ས་ཡ་ ༢༠ ལྷག་རྙེད་སོན་བྱུང་འདུག

རྫས་སྦྱོར་དང་རྡོ་སྣུམ་རྫས་སྦྱོར་རིག་པའི་ཆེད་མཁས་པས་སྙན་ཐོ་ཞིག་འདོན་སྤེལ་གནང་བའི་ནང་། ས་ཁམས་རིག་པ་བ་ཚོས་བོད་མཐོ་སྒང་ནས་ཨ་སྒོར་དུང་ཕྱུར་ཆིག་སྟོང་གི་རིན་ཐང་ལྡན་པའི་ཟངས་ཊོན་ས་ཡ་ ༢༠ ལྷག་རྙེད་ཡོད་པ་དང་། ཟངས་རྙེད་སོན་བྱུང་བ་འདིས་འཛམ་གླིང་གི་དཔལ་འབྱོར་ལ་ཤུགས་རྐྱེན་ཐེབས་ཏེ། རྒྱལ་སྤྱིའི་ཟངས་ཀྱི་ཚོང་རའི་དབང་ཚད་དང་རྒྱ་ནག་གི་ནུས་པ་གོང་འཕེལ་གཏོང་སྲིད་པ་རེད་ཅེས་བཀོད་འདུག

ཧོང་ཀོང་གིས་ཕྱི་ལོ་ ༢༠༢༠ ལོར་མང་གཙོའི་རྒྱབ་སྐྱོར་དུ་འོས་བསྡུའི་ལས་འགུལ་སྤེལ་མཁན་མི་སྣ་བཞི་བཙོན་གྲོལ་བཏང་འདུག

༸གོང་ས་༸སྐྱབས་མགོན་ཆེན་པོ་མཆོག་གིས། ཁེ་ན་ཌའི་སྲིད་བློན་ (Mark Carney) ལགས་སུ་ཁོང་གི་ཆབ་སྲིད་ཚོགས་པར་འོས་བསྡུའི་རྒྱལ་ཁ་ཐོབ་པར་འཚམས་འདྲི་མཛད་འདུག

༸གོང་ས་༸སྐྱབས་མགོན་ཆེན་པོ་མཆོག་གིས། ཁེ་ན་ཌའི་གཞུང་མང་གཉིས་ནས་བོད་མི་རྣམས་ལ་མཐུན་འགྱུར་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞེས་བཀའ་སྩལ་ཞིང་། སྲིད་བློན་གསར་པའི་དབུ་ཁྲིད་འོག་ཁྱབ་ཁོངས་མི་མང་གི་མངོན་འདོད་བསྒྲུབ་རྒྱུ་དང་། ཞི་བདེ་ལྡན་པའི་གོ་ལ་བསྐྲུན་རྒྱུར་ཞབས་འདེགས་བསྒྲུབ་ཐུབ་པའི་ཐུགས་སྨོན་མཛད་འདུག

བོད་རང་བཙན་སློབ་ཕྲུག་ཚོགས་པས་རྒྱལ་སྤྱིའི་གསར་འགྱུར་བརྒྱུད་ལམ་གལ་ཆེན་ཁག་དང་ཕྱག་སྦྲེལ་གྱིས། རྒྱ་ནག་གཞུང་གིས་རྒྱལ་མཚམས་བརྒལ་བའི་དྲག་གནོན་གྱི་བྱ་སྤྱོད་སྤེལ་བཞིན་པ་ཐེར་འདོན།

འདས་པའི་ལོ་གཅིག་རིང་བོད་རང་བཙན་སློབ་ཕྲུག་ཚོགས་པས་རྒྱལ་སྤྱིའི་རྟོག་དཔྱོད་ཞིབ་འཇུག་གནང་མཁན་གྱི་གསར་འགོད་པ་ཁག་ཅིག་དང་ཕྱག་སྦྲེལ་གྱིས། རྒྱ་ནག་གཞུང་གིས་ཐབས་ཇུས་མཁས་པོའི་ལམ་ནས་རྒྱལ་མཚམས་བརྒལ་བའི་དྲག་གནོན་གྱི་བྱ་སྤྱོད་སྤེལ་ཏེ། ཕྱི་རྒྱལ་ཁག་ནང་གནས་སྡོད་ཀྱི་བོད་དོན་ལས་འགུལ་བ་དང་ཡུ་གུར་བ། ཧོང་ཀོང་དང་རྒྱ་རིགས་མང་གཙོ་དོན་གཉེར་བ་སོགས་གྲགས་འགུལ་མེད་པར་བཟོ་བཞིན་པའི་གནས་ཚུལ་གསར་དུ་འདོན་སྤེལ་གནང་ཡོད་པ།

རྒྱ་ནག་གཞུང་གི་བཀོད་བྱུས་འོག་གཞུང་འབྲེལ་མིན་པའི་ཚོགས་པས་མཉམ་འབྲེལ་རྒྱལ་ཚོགས་སུ་འགྲོ་བ་མིའི་ཐོབ་ཐང་གི་གནད་དོན་ཐད་ཐེ་བྱུས་བྱེད་བཞིན་ཡོད་སྐོར་སྙན་ཐོའི་གསར་པའི་ནང་གསལ་སྟོན།

རྒྱ་ནག་གཞུང་གི་བཀོད་བྱུས་འོག་ཡོད་པའི་གཞུང་འབྲེལ་མིན་པའི་ཚོགས་ཁག་གིས་བརྒྱུད་མཉམ་འབྲེལ་རྒྱལ་ཚོགས་སུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནད་དོན་ཐད་ཐེ་བྱུས་བྱེད་བཞིན་ཡོད་པ་མ་ཟད། བོད་དང་། ཡུ་གུར་། ཧོང་ཀོང་གི་འཐབ་རྩོད་པས་རྒྱལ་ཚོགས་སུ་འགྲོ་བ་མིའི་ཐོང་ཐང་སྐོར་ཞུ་གཏུག་ལས་འགུལ་ལ་འགོག་རྐྱེན་བཟོ་བཞིན་ཡོད་པ་རྒྱལ་སྤྱིའི་འགྲོ་བ་མིའི་ཐོབ་ཐང་ཆེད་ཞབས་ཞུ་ཞེས་པའི་ཚོགས་པའི་སྙན་ཐོ་གསར་པའི་ནང་གསལ་སྟོན་བྱས་འདུག

ཡོ་རོབ་གྲོས་ཚོགས་འཐུས་མི་ཁག་གཅིག་གིས་ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་མཆོག་གློད་བཀྲོལ་དགོས་པའི་རེ་སྐུལ་ཞུས་འདུག

ཟླ་ ༠༤ ཚེས་ ༢༥ རེས་གཟའ་པ་སངས་ཉིན་ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༦ ལ་ཕེབས་པའི་འཁྲུངས་སྐར་ཉིན་མོ་དང་བསྟུན། ཡོ་རོབ་གྲོས་ཚོགས་འཐུས་མི་རྣམས་ཀྱིས་རིན་པོ་ཆེ་མཆོག་མྱུར་དུ་གློད་བཀྲོལ་གཏོང་དགོས་པ་དང་།  རྒྱ་ནག་གཞུང་གིས་རིན་པོ་ཆེ་མཆོག་གར་ཡོད་ཀྱི་གནས་སྟངས་ཐད་ཡོངས་ཁྱབ་དགོས་པའི་ནན་བརྗོད་གནང་ཡོད་པ་རེད་འདུག