ညောင်လေးပင်မှာ လက်နက်ကြီးကြောင့် နှစ်ဦးသေဆုံးကြောင်း KNU ထုတ်ပြန်

ပဲခူးတိုင်း ညောင်လေးပင်ခရိုင်အတွင်း ကျေးရွာတွေကို စစ်ကောင်စီက လက်နက်ကြီး ပစ်ခတ်မှုကြောင့် ဒေသခံ ပြည်သူနှစ်ဦး သေဆုံးပြီး နှစ်ဦးဒဏ်ရာရရှိခဲ့တယ်လို့ ကရင် အမျိုးသား အစည်းအရုံး (KNU) က စက်တင်ဘာ ၄ ရက်နေ့မှာ ထုတ်ပြန်လိုက်ပါတယ်။

လယ်ဒို (ကျောက်ကြီး) မြို့နယ်အတွင်းက နတ်သံကွင်းမှာ အခြေချထားတဲ့ ခြေလျင် တပ်ရင်း ခလရ ၂၆၄ ကနေ စက်တင်ဘာ ၂ ရက်နေ့က တရေးစီလော (နရွဲပင်) ရွာကို ၁၂၀ မမ၊ ၈၀ မမ တို့နဲ့ ပစ်ခတ်တာ ကြောင့် အစိုင်း (ခေါ်) စိုင်းသူရထွန်း ၂၇ နှစ် သေဆုံးခဲ့တယ်လို့ ဆိုပါတယ်။

စက်တင်ဘာ ၄ ရက်နေ့မှာတော့ နွားရေချောင်းကျေးရွာကို ၈၁ မမ လက်နက်ကြီး ၁၅ လုံး လောက် ပစ်ခတ်ခဲ့တာကြောင့် ကိုစောထွန်းနိုင် ၄၅ နှစ် သေဆုံးခဲ့တယ်လို့ ထုတ်ပြန် ပါတယ်။

စက်တင်ဘာ ၃ ရက်နေ့မှာလည်း သမင်အင်းကုန်းကျေးရွာသား နှစ်ဦး မိုင်းနင်းမိပြီး ထိခိုက်ဒဏ်ရာ ရရှိခဲ့တယ်လို့ ပြောပါတယ်။

ဒါ့အပြင် စက်တင်ဘာ ၂ ရက်နေ့က ရွှေကျင်မြို့ပေါ် စျေးဝယ်သွားတဲ့ အင်းကနီနဲ့ ကျောက်တန်း ရွာသား လေးဦးကို ဖမ်းဆီးပြီး ငွေ ၁၀ သိန်းပေးပြီး ဝန်ခံကတိနဲ့ ပြန်လွှတ်ပေးလိုက်တယ်လို့ ထုတ်ပြန်ချက်မှာ ပါရှိပါတယ်။

အရပ်သားထိခိုက်သေဆုံးမှုတွေနဲ့ ပတ်သက်ပြီး RFA အနေနဲ့ သီးခြား အတည်မပြုနိုင်သေးသလို၊ စစ်ကောင်စီရဲ့ ပဲခူးတိုင်း ပြောရေးဆိုခွင့် ရှိသူတိုင်းစီးပွားရေး ဝန်ကြီး ဦးတင်ဦးကို RFA က ဆက်သွယ်ခဲ့ပေ မယ့် ဖုန်းလက်ခံ ဖြေကြားတာမရှိပါဘူး။

RFA က ပြုစုထားတဲ့စာရင်းတွေအရ ၂၀၂၃ ခုနှစ် သြဂုတ်လတုန်းကလည်း ပဲခူးတိုင်း၊ ညောင်လေးပင် ခရိုင်အတွင်း လက်နက်ကြီးနဲ့ လေကြောင်းတိုက်ခိုက်မှုကြောင့် အရပ်သား ၁၂ ဦး သေဆုံးပြီး ၃၅ ဦး ဒဏ်ရာရရှိခဲ့ပါတယ်။