မြန်မာဒုက္ခသည်နောက်ဆုံး အသုတ် ဂျပန် ရောက်ရှိ

ထိုင်း မြန်မာနယ်စပ် ဒုက္ခသည်စခန်းတွေက လူဦးရေ ၂၃ ယောက်ပါဝင်တဲ့  မိသားစုငါးစုဟာ တတိယနိုင်ငံမှာ အခြေချနေထိုင်ရေးအစီအစဉ်အရ ဂျပန်နိုင်ငံ တိုကျိုမြို့ ကို သောကြာနေ့ညနေပိုင်းက ရောက်ရှိခဲ့ကြပါတယ်။

ကရင်တိုင်းရင်းသားတွေ အများစုပါဝင်တဲ့ အဲဒီ ၂၃ ယောက် အသုတ်ဟာ ဂျပန်နိုင်ငံ အစီအစဉ် အတွက် နောက်ဆုံးအသုတ်ဖြစ်တယ်လို့ သိရပါတယ်။

မြန်မာနိုင်ငံသား ဒုက္ခသည်တွေ ဂျပန်နိုင်ငံ ကို ရွှေ့ပြောင်းနေထိုင်ရေးအစီအစဉ်ကို ၂ဝ၁ဝ ပြည့်နှစ် က စတင်ခဲ့တာပါ။ နှစ်စဉ် ဒုက္ခသည်အရေအတွက် ၃ဝ လက်ခံဖို့ဖြစ်ပေမဲ့၊ အဲဒီအရေအတွက်မပြည့်မီခဲ့ဘူးလို့ ဆိုပါတယ်။

၂ဝ၁၄ ခုနှစ်အထိ အစီအစဉ်တစ်ခုလုံးအတွက် ဒုက္ခသည် စုစုပေါင်း ၈၆ ယောက်သာ ဂျပန်ကိုရောက်ရှိလာခဲ့ကြ တာပါ။ ၂ဝ၁၂ ခုနှစ်ကဆိုရင် တစ်ယောက်မှရောက်မလာကြဘူးလို့ သိရပါတယ်။

လာမယ့်နှစ်ကစပြီး ဂျပန်အစိုးရဟာ မလေးရှားမှ မြန်မာနိုင်ငံသားဒုက္ခသည်တွေကို ခေါ်ယူမှာဖြစ်ပါတယ်။
ရောက်ရှိလာကြတဲ့ မြန်မာနိုင်ငံသားဒုက္ခသည်တွေဟာ ဂျပန်ဘာသာစကားနဲ့ လုပ်ငန်းခွင်ဆိုင်ရာ သင်တန်းတွေ တက်ရောက်သင်ယူကြရမှာဖြစ်ပါတယ်။