ဂန့်ဂေါမှာ စစ်ကောင်စီယာဉ်တန်း မိုင်းဆွဲခံရပြီး ၁၁ ယောက် သေဆုံး

မကွေးတိုင်း ဂန့်ဂေါမြို့နယ်မှာ နိုဝင်ဘာ ၂၁ ရက် မနေ့နေ့လယ်ပိုင်းက စစ်ကောင်စီယာဉ်တန်း မိုင်းဆွဲတိုက် ခိုက်ခံရလို့ ဗိုလ်အဆင့် အပါအဝင် ၁၁ ယောက် သေဆုံးခဲ့တယ်လို့ ယောဒေသကာကွယ်ရေးအဖွဲ့ (YDF) က နိုဝင်ဘာ ၂၂ ရက် ဒီကနေ့ သတင်းထုတ်ပြန်ပါတယ်။

နိုဝင်ဘာလ ၂၁ ရက် နေ့လယ် ၁ နာရီဝန်းကျင်လောက်က ဂန်ဂေါမြို့ကိုသွားတဲ့ စစ်ကောင်စီတပ်ရဲ့ ကား ၅ စီးကို YDF နဲ့ CDF Kalay Kabaw Gangaw (CDF-KKG) ပူးပေါင်းအဖွဲ့တို့က ခေါက်ခူရွာအနီး မိုင်းဆွဲတိုက် ခိုက်ခဲ့တာလို့ ဖော်ပြထားပါတယ်။

မိုင်း ၁၂ လုံးနဲ့ ဖောက်ခွဲတိုက်ခိုက်ခဲ့တာဖြစ်ပြီး စစ်ကားနှစ်စီးလည်း ပျက်စီးသွားတယ်လို့ YDF အဖွဲ့က ထုတ်ပြန်ပါတယ်။

MA သေနတ် ကျည် 400 ကျော်၊ ယူနီဖောင်း ၂ စုံ၊ ကျည်ဘောက် ၂ ခု၊ ဘေးအိတ် ၁ စုံ၊ အပူချိန်တိုင်းစက် ၁ ခု၊ တီရှပ် ၁ ထည်၊ ဖိနပ် ၁ ရံတို့ကိုလည်း သိမ်းဆည်းရခဲ့ရာ ယူနီဖောင်းမှာပါတဲ့ လက်မောင်းတံဆိပ်မှာ တပ်မ ၁၁ လို့ တွေ့ရပြီး ခမရ ၂၁၇ အမှတ်တံဆိပ်တွေကိုလည်း တွေ့ရပါတယ်။

ဒီတိုက်ခိုက်မှုနဲ့ ပတ်သက်လို့ RFA အနေနဲ့သီးခြား အတည်မပြုနိုင်သေးသလို စစ်ကောင်စီဘက်က တစ်စုံတစ်ရာ ထုတ်ပြန်တာမျိုး မတွေ့ရသေးပါဘူး။