ကလေးမြို့ဒေသခံတစ်ဦး စစ်ကောင်စီရဲ့ စစ်ကြောရေးမှာ သေဆုံးခဲ့ရ

စစ်ကိုင်းတိုင်း ကလေးမြို့မှာ မေလ ၂၄ ရက်နေ့က စစ်ကောင်စီတပ်ဖွဲ့ဝင်တွေရဲ့ ဖမ်းဆီးခံခဲ့ရတဲ့ ကလေးမြို့ ဒေသခံ ကိုမင်းမင်းဆိုသူဟာ နောက်နေ့ မေလ ၂၅ ရက်နေ့မနက်မှာ သေဆုံးခဲ့ရပါတယ်။

နောက်တစ်နေ့ ၂၅ ရက်နေ့မနက် ၉ နာရီကျော်မှာတော့ ကိုမင်းမင်း သေဆုံးကြောင်း မိသားစုကသိခဲ့ရပြီး အလောင်းကို စစ်ဆေးရုံက ရင်ခွဲရုံကို လာထုတ်ဖို့ ဆက်သွယ်အကြောင်းကြားခဲ့တယ်လို့ ကိုမင်းမင်းနဲ့ ဆွေမျိုးနီးစပ်တော်သူ တစ်ယောက်က ပြောပါတယ်။

“အလောင်းသွားထုတ်တော့ ငါးသိန်းပေးလိုက်တယ်။ စိတ်မကောင်းကြောင်းနဲ့ တောင်းပန်ကြောင်း ပြောတယ်။ ဘာလို့သေတာလဲဆိုတာတောင် မမေးရဲခဲ့ပါဘူး။ အလောင်းပြန်ယူလာ အိမ်မှာရေချိုးပေးမှာ တစ်ကိုယ်လုံးမှာ ဒဏ်ရာတွေ တွေ့ရတယ်။ စာသင်ကျောင်း ဗုံးကွဲတဲ့တရားခံကို အထက်က ဖိအားပေး တရားခံရှာခိုင်းတော့ အသကုန်နှိပ်စက်၊ ရိုက်နှက်မေးတာ လက်လွန်သွားတာနေမှာပါ။ ကိုမင်းမင်းက လူအေးပါ။ NLD ထောက်ခံသူဖြစ်တယ်။ သံပုံးတီးပေမယ့် ဆန္ဒပြပွဲတွေလည်း လိုက်လေ့မရှိပါဘူး။ ဒလန်ကြောင့် ဖြစ်သွားတာ”

ကိုမင်းမင်းဟာ ကလေးမြို့ နန်းကလိန်တံတားအနီးမှာ စိတ်ထားမဏ္ဍိုင်ဆိုတဲ့နာမည်နဲ့ ဆိုင်ကယ်ပြင် ဆိုင်ဖွင့်လှစ်ထားပြီး မေလ ၂၄ ရက်နေ့ နေ့လယ်မှာ စစ်သားတွေနဲ့ ရဲတွေရောက်ရှိလာပြီး စစ်မေးစရာရှိလို့ လိုက်ခဲ့ဖို့ ချိုချိူသာသာနဲ့ပြောဆိုခဲ့ပြီး ဒေသကွပ်ကွဲရေး စစ်ဌာနချုပ်ကို ခေါ်သွားခဲ့ပါတယ်။

ကိုမင်းမင်းမှာ သားနဲ့သမီး နှစ်ယောက်ကျန်ခဲ့ပြီး သူရဲ့ဈာပနကိုတော့ မနက်ဖြန် မေ ၂၇ ရက်နေ့ မှာ သာစည်ရွာ သုသာန်မှာ ဂူသွင်းသင်္ဂြိုဟ်မယ်လို့ သိရပါတယ်။

မေလ ၈ ရက်နေ့တုံးကလည်း ရွှေဘိုမြို့မှာ ကဗျာဆရာခက်သီကို စစ်ကောင်စီတပ်တွေက ဖမ်းဆီးသွားပြီး နောက်ရက်မှာ အသက်မဲ့နေတဲ့ အလောင်းကိုသာ မိသားစုဝင်တွေက လက်ခံရရှိခဲ့တဲ့ ဖြစ်စဉ်လည်း ရှိခဲ့ဖူးပါတယ်။