ရပ်စောက်မြို့နယ်မှာ စစ်ကောင်စီနဲ့ DPLA တိုက်ပွဲဖြစ်နေ

ရှမ်းပြည်နယ်တောင်ပိုင်း ရပ်စောက်မြို့နယ် ကျောက်ဂူဒေသမှာ စစ်ကောင်စီတပ်နဲ့ ဓနုပြည်သူ့လွတ်မြောက်ရေးတပ်တော် (DPLA) တို့ ဒီရက်ပိုင်းအတွင်း တိုက်ပွဲတွေဖြစ်နေကြောင်း DPLA က ဇန်နဝါရီ ၆ ရက်နေ့ညမှာ သတင်းထုတ်ပြန်ပါတယ်။

စစ်ကောင်စီတပ်က စစ်ကြောင်းထိုးတာကြောင့် တိုက်ပွဲဖြစ်နေတာလို့ ဓနုပြည်သူ့လွတ်မြောက်ရေးတပ်တော် ပြောရေးဆိုခွင့်ရှိသူ ကိုအမောင်က RFA ကို ပြောပါတယ်။

"ကျွန်တော်တို့နေတဲ့နေရာကို စစ်ကောင်စီက စစ်ကြောင်းထိုးလို့ တိုက်ပွဲဖြစ်တာ၊ ကျောက်ဂူနဲ့ တောင်ခမ်းဘက်မှာက စစ်ကောင်စီက အင်အားဖြည့်တာရှိတယ်။ အဲဒါကြောင့် တိုက်ပွဲဖြစ်တာ"

ဇန်နဝါရီ ၄ ရက်နေ့က ကျောက်ဂူရဲစခန်းနဲ့ ကျောက်ဂူအမြောက်တပ် (အမတ ၃၄၉)မှာ တိုက်ပွဲဖြစ်ခဲ့ပြီး ဇန်နဝါရီ ၅ ရက်နေ့က တောင်ထိပ်ရွာနဲ့ အင်တောမြို့ကြားမှာ တိုက်ပွဲဖြစ်ခဲ့တာလို့ DPLA ထုတ်ပြန်ချက်မှာ ပြောထားပါတယ်။

ဇန်နဝါရီ ၆ ရက်နေ့အထိ တိုက်ပွဲတွေဆက်ရှိနေကြောင်း DPLA ပြောရေးဆိုခွင့်ရှိသူက ပြောပါတယ်။ တိုက်ပွဲအတွင်း DPLA ဘက်က ထိခိုက်မှုမရှိဘဲ စစ်ကောင်စီဘက်က ထိခိုက်မှုအခြေအနေကို စုံစမ်းနေဆဲဖြစ်ကြောင်းလည်း ပြောပါတယ်။

စစ်ကောင်စီတပ်က အရပ်သားတွေနေထိုင်တဲ့ ရွာတွေကို လက်နက်ကြီတွေနဲ့ ရမ်းသန်းပစ်ခတ်ခဲ့တာကြောင့် ခဲကြားရွာနဲ့ ဖက်ရင်းကုန်ရွာထဲကို ကျရောက်ပေါက်ကွဲပြီး အဆောက်အဦတွေ ပျက်စီးဆုံးရှုံးမှုရှိတယ်လို့ ဆိုပါတယ်။

ဒီကိစ္စနဲ့ ပတ်သက်ပြီး စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကို RFA က မေးမြန်းဖို့ ဖုန်းဆက်ခဲ့ပေမဲ့ လက်ခံဖြေဆိုတာ မရှိပါဘူး။

တိုက်ပွဲအတွင်း စစ်ကောင်စီတပ်ရဲ့ ဒရုန်းတစ်စီးကို သိမ်းဆည်းရရှိခဲ့တယ်လို့ DPLA က ထုတ်ပြန်ထားပါတယ်။