བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཐེ་ཝན་དུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་པ་རེད་འདུག

བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་གིས་རྒྱ་གར་གྱི་རྒྱལ་ས་ལྡི་ལིར་བཅའ་སྡོད་ཐེ་ཝན་དོན་གཅོད་དང་མཇལ་འཕྲད་གནང་ཡོད་པ་དང་ཐེ་ཝན་དུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་པ་རེད་འདུག
ཐེ་ཝན་གྱི་གྲོས་ཚོགས་སྐབས་བཅུ་གཅིག་པའི་གྲོས་ཚོགས་འཐུས་མི་གསར་འདེམས་གནང་བའི་རྗེས། ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆུང་གི་འཐུས་མི་སྐུ་ཞབས་(Hung Sun Han)་ལགས་ཀྱིས་ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆུང་གསར་འཛུགས་ཀྱི་དབུ་འབྱེད་མཛད་སྒོར་གདན་ཞུས་གནང་བ་ལྟར། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས་ཀྱིས་སྣེ་ཁྲིད་པའི་ཚོགས་ཆུང་ཞིག་གིས་འདི་ཟླའི་ཚེས་༡༤་ནས་༢༡་བར་ལྡི་ལིར་ཡོད་པའི་ཐེ་ཝན་དོན་གཅོད་ཁང་དང་དེ་ནས་ཐེ་ཝན་དུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་རེད། ཚོགས་ཆུང་དེའི་ནང་སྤྱི་འཐུས་བསྟན་པ་ཡར་འཕེལ་ལགས་དང་། བཀྲ་ཤིས་དོན་གྲུབ་ལགས་བཅས་ཡོད་འདུག
སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ཕྱི་ཚེས་༡༤་ཉིན་ཁོང་རྣམ་པས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ཐེ་ཝན་གྱི་དོན་གཅོད་སྐུ་ཞབས་(Buashuan Ger)་ལགས་དང་མཇལ་འཕྲད་གནང་ཡོད་པ་དང་། སྐབས་དེར་ཐེ་ཝན་དང་བོད་མིའི་སྒྲིག་འཛུགས་ཀྱི་མང་གཙོའི་འཕེལ་རིམ་དང་། ཐེ་ཝན་དང་བོད་བར་གྱི་འབྲེལ་ལམ་དམ་ཟབ་གནང་ཕྱོགས་ཐད་བཀའ་མོལ་ལྷུག་པོ་བྱུང་གནང་ཡོད་པ་གསུངས་བྱུང་།
ཐེངས་འདིར་ཐེ་ཝན་གཞུང་གི་སྐུ་ཚབ་དང་ཐུག་འཕྲད་གནང་བའི་སྐབས་ལྡི་ལི་བོད་ཀྱི་སྐུ་ཚབ་དོན་གཅོད་ལས་ཁང་གི་དྲུང་ཆེ་དོན་གྲུབ་རྒྱལ་པོ་ལགས་ཀྱང་མཉམ་བཅར་གནང་འདུག

གསར་འགོད་པ། དབྱངས་སྒྲོན།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།