ལོ་གསར་ཉིན་ཆོས་ཕྱོཌ་ཐོག་ནས་གསོལ་བ་སྨོན་ལམ་འདེབས་རྒྱུ།

༄༅༎བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་ལོ་གསར་ཉིན་ཆོས་ཕྱོགས་ཐོག་ནས་གསོལ་བ་སྨོན་ལམ་འདེབས་རྒྱུ་ལས་དགའ་དགའ་སྐྱིད་སྐྱིད་བྱེད་མི་དགོས་སྐོར་ཁ་ས་ལོ་གསར་ཚེས་གཅིག་ཉིན་བོད་མི་མང་ཚོགས་ལ་བཀའ་སློབ་སྩལ་གནང་མཛད་འདུག

ཁ་ས་ལོ་གསར་ཚེས་༡སྔ་དྲོར་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཕྱི་ནང་གཉིས་སུ་འཁོད་པའི་བོད་མི་དང་བོད་དང་ཆོས་གཙོས་པའི་རིག་གཞུང་གཅིག་མཚུངས་ཡིན་པའི་ཧི་མ་ལ་ཡའི་རི་རྒྱུད་ཀྱི་མི་མང་ སོག་པོ་ ནུབ་ཕྱོགས་པའི་ཆོས་གྲོགས་རྣམས་ དེ་བཞིན་བོད་ཀྱི་བདེན་དོན་ལ་རྒྱབ་སྐྱོར་གནང་མཁན་གྲོགས་པོ་རྣམས་ལ་ལོ་གསར་གྱི་འཚམས་འདྲི་གནང་བའི་རྗེས་སུ་ཐེག་ཆེན་ཆོས་གླིང་གཙུག་ལག་ཁང་གི་གསུངས་ཆོས་ར་བའི་ནང་ཆེད་བཅར་ཞུས་པའི་བོད་མི་གཙོས་པའི་ཕྱི་ནང་མི་མང་རྣམས་ལ་བཀའ་སློབ་སྩལ་བ་དང་ ཕྱི་ལོ་༢༠༠༨་ལོའི་སུམ་ཅུའི་དུས་དྲན་ཉིན་ནས་བཟུང་བོད་ནང་བོད་མིའི་ཞི་རྒོལ་ཆེན་མོའི་ནང་བོད་མི་མང་པོ་རྐྱེན་ལམ་དུ་ཕྱིན་པ་དང་གར་སོང་ཆ་མེད་དུ་འགྱུར་བ་ རྒྱ་མིའི་འཛིན་བཟུང་དོ་དམ་དང་བཙོན་འཇུག་འོག་སྡུག་བསྡལ་ཚབས་ཆེ་མྱོང་བཞིན་པ་རྣམས་ལ་གདུང་སེམས་མཉམ་སྐྱེད་ཞུ་ཕྱིར་ཕྱི་ལོ་༢༠༠༩་ལོར་ཡང་བོད་ཕྱི་ནང་གཉིས་སུ་འཁོད་པའི་བོད་མི་རྣམས་ཀྱིས་ལོ་གསར་སྲུང་བརྩི་ཞུས་མེད་སྟབས་ གཞུང་འབྲེལ་སྒོ་ནས་ལོ་གསར་སྲུང་བརྩི་མ་ཞུས་པ་ད་ལོ་ལོ་གཉིས་པ་དེ་ཡིན་པ་རེད་ ཡང་ཁ་ས་བཞུགས་སྒར་རྡ་རམ་ས་ལར་བོད་མི་བརྒྱ་ཕྲག་མང་པོས་ང་བོད་ལ་དགའ་ཡི་ཡོད་ཅེས་འཁོད་པའི་ཁ་ཌི་ཐོག་ཨ་རིའི་སྲིད་འཛིན་ཨོ་སྦ་མ་མཆོག་ལ་བོད་ལུགས་ལྟར་འཚམས་འདྲིའི་མཚན་རྟགས་བཀོད་པ་མ་ཟད་རིང་མིང་༸གོང་ས་མཆོག་དང་སྲིད་འཛིན་ཨོ་སྦ་མ་རྣམ་གཉིས་ཀྱི་མཇལ་འཕྲད་ནས་དོན་ཕན་ལྡན་པའི་རྗེས་འབྲས་སོན་པའི་ཐུགས་རེ་ཡང་གནང་འདུག།