སྟག་ལུང་རྩེ་སྤྲུལ་རིན་པོ་ཆེ་མཆོག་དགོངས་པ་རྫོགས་འདུག

རྡོ་རྗེ་བྲག་རྒྱུན་ལས་ཚོགས་ཆུང་ནས་གནང་བའི་གསལ་བསྒྲགས།

སྟག་ལུང་རྩེ་སྤྲུལ་རིན་པོ་ཆེ་མཆོག་དགོངས་པ་རྫོཊ་པར་བོད་མིའི་སྒྲིག་འཛུགས་ཀྱི་འགོ་ལས་ཡོངས་ནས་མྱ་ངན་ཞུས་བ།
དེ་ཡང་རྒྱ་གར་སིམ་ལར་རྟེན་གཞི་བྱེད་པའི་རྡོ་རྗེ་བྲག་རྒྱུན་ལས་ཚོགས་ཆུང་ནས་གནང་བའི་གསལ་བསྒྲགས་ལྟར་ན། སྔ་འགྱུར་རྙིང་མའི་དབུ་འཛིན་༧སྟག་ལུང་རྩེ་སྤྲུལ་རིན་པོ་ཆེ་མཆོག སྤྱི་ཚེས་༢༣ཉིན་གྱི་ཐོ་རེངས་ཆུ་ཚོད་གཉིས་དང་ཕྱེད་ཀ་ཙམ་ལ། གནས་མཆོག་རྡོ་རྗེ་གདན་དུ་སྐུར་སྙུང་གཞི་སོགས་ཀྱི་རྟགས་མཚན་ཆེན་པོ་གང་ཡང་མེད་པར་དགོངས་པ་ཆོས་དབྱིངས་སུ་འཐིམ་ཡོད་པ་དང་། ད་ལྟ་སྐུ་ཐུགས་དམ་དུ་བཞུགས་ཡོད་འདུག
སྟག་ལུང་རྩེ་སྤྲུལ་རིན་པོ་ཆེ་མཆོག་དགོངས་པ་རྫོགས་པའི་གནས་ཚུལ་ཐོན་པ་དང་། བོད་མིའི་སྒྲིག་འཛུགས་ཀྱི་འགོ་ལས་ཡོངས་ནས་མྱ་ངན་གུས་བཏུད་ཞུ་ཕྱིར། ཕྱི་ལོ་༢༠༡༥ཟླ་༡༢ཚེས་༢༥ཉིན་གཉའ་ཁྲི་ཚོགས་ཁང་དུ་ཚང་འཛོམས་ཀྱིས་སྨོན་ལམ་གསུང་འདོན་གནང་རྗེས་དབུས་ལས་ཁུངས་ཁག་ལས་མཚམས་འཇོག་རྒྱུ་ཡིན་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས། སྟག་ལུང་རྩེ་སྤྲུལ་རིན་པོ་མཆོག་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་ཐོན་པར་ངོས་རང་ཧ་ཅང་བློ་ཕམ་བྱུང་།    སྐུའི་ཡང་སྲིད་མཆོག་སྤྲུལ་མྱུར་དུ་བྱོན་པའི་གསོལ་འདེབས་ཞུ་རྒྱུ་ཡིན་ཞེས་སོགས་གསུངས་འདུག
སྔ་འགྱུར་བའི་ཁྲི་འཛིན་༧སྟག་ལུང་རྩེ་སྤྲུལ་རིན་པོ་ཆེ་མཆོག་ནི། ལྷོ་ཁ་ས་ཁུལ་ཡར་འབྲོག་སྣ་དཀར་རྩེའི་ཕུན་དཀྱིལ་ཞེས་པའི་ཁྱིམ་དུ་ཡབ་རྣམ་རྒྱལ་རྡོ་རྗེ་དང་། ཡུམ་རྡོ་རྗེ་སྒྲོལ་མ་གཉིས་ཀྱི་སྲས་སུ་ཕྱི་ལོ་༡༩༢༦ལོར་སྐུ་འཁྲུངས་ཤིང། རྡོ་བྲག་རིག་འཛིན་ཆེན་པོ་སྐུ་ཕྲེང་དགུ་པ། ཐུབ་བསྟན་ཆོས་དབང་མཉམ་ཉིད་རྡོ་རྗེ་མཆོག་གིས་རིན་པོ་ཆེ་མཆོག་ལ་སྟག་ལུང་རྩེ་སྤྲུལ་སྐུ་ཕྲེང་གསུམ་པ་ངོས་འཛིན་གནང་པ་ཡོད་འདུག སྤྱི་ལོ་༢༠༡༢ལོར་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པར་མངའ་གསོལ་མཛད་ཡོད་ཅིང་། རྗེ་འདི་ཉིད་ཀྱིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་བླ་ན་མ་མཆིས་པ་སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་ལ་མངའ་དབང་རིན་ཆེན་འབར་བས་གཙོས་བཀའ་དབང་མང་པོ་ཞིག་ཕུལ་ཡོད་པ་སོགས་ཀྱིས་གཙོས་རིས་མེད་ཀྱི་རྒྱལ་བསྟན་འཛིན་པ་མང་པོ་ཞིག་གང་ཉིད་ཀྱི་ཞལ་སློབ་ཏུ་གྱུར་ཡོད། དེ་བཞིན་སྤྱི་༢༠༠༩ལོ་ཟླ་༣་ཚེས་༢༦་ནས་༢༩་བར་ཉིན་བཞིའི་རིང་གནས་ཆུང་གྲ་ཚང་དུ་ཆེས་མཐོའི་སྨན་པའི་ལྷན་ཚོགས་ཀྱིས་ཇི་ལྟར་གསོལ་བ་བཏབ་པ་བཞིན་བོད་གཞུང་མཐའ་དབུས་ཀྱི་སྨན་པ་ཡོངས་རྫོགས་ལ་གཡུ་ཐོག་སྙིང་ཐིག་གི་དབང་ལུང་སྨིན་རྒྱས་བསྩལ་བ་དང་། རྗེ་འདི་ཉིད་ཕྱི་སོ་ཐར་གྱི་འདུལ་ཁྲིམས་ལག་ལེན་ལ་ཞིབ་ཆ་ཆེ་ཞིང་། རྒྱ་བལ་འབྲུག་གསུམ་གྱི་དགོན་སྡེ་ཁག་མང་པོར་བྱོན་ནས་དགེ་ཚུལ་དང་དགེ་སློང་གི་སྡོམ་པ་ཞུ་མཁན་དག་ལ་འདུལ་བའི་སྡོམ་རྒྱུན་སྤེལ་ཏེ་བསྟན་རྩ་འདུལ་བ་ལ་བཀའ་དྲིན་ཆེ་བ་དང་། འདུལ་བ་དང་མི་མཐུན་པའི་ཕྱག་ལས་རྩ་བ་ཉིད་ནས་གནང་སྲོལ་མེད་པས་དེང་གི་དུས་སུ་ཤིན་ཏུ་དཀོན་པའི་གནས་བརྟན་འདུལ་བ་འཛིན་པ་ཆེན་པོ་ཞིག་ཡིན། ནང་བྱང་ཆུབ་སེམས་དཔའི་སྤྱོད་པ་ཉམས་སུ་བཞེས་ཤིང་། རྟག་ཏུ་གཞན་ཕན་བྱང་ཆུབ་ཀྱི་སེམས་ལ་མངའ་དབང་འབྱོར་བ། གསང་སྔགས་ཀྱི་ཉམས་བཞེས་སྐུ་ཚེ་གང་པོ་གནང་སྟེ་སྔ་འགྱུར་བཀའ་གཏེར་གྱི་དབང་ལུང་ཁྲིད་གསུམ་གྱི་བསྟན་པའི་རྩ་ལག་གཅིག་ཏུ་གྱུར་པ་དང་ལྷག་པར་དུ་བྱང་གཏེར་རིག་འཛིན་རྒོད་ལྡེམ་ཅན་གྱི་གཏེར་ཆོས་ཉམས་བཞེས་དང་དབང་ལུང་མན་ངག་གི་རྒྱུད་པ་སྤེལ་ནས་སྔ་འགྱུར་བཀའ་གཏེར་གྱི་བསྟན་པའི་བདག་པོར་གྱུར་ཡོད་པ་རེད།

གསར་འགོད་པ་འཇམ་དཔལ་ཕུན་ཚོགས།