ཏ་མིལ་གྱེན་ལོག་པར་དྲག་རྒོལ་མཚམས་འཇོག་གནང་རྩིས་མེད་པ།

༄༅༎ཤི་རི་ལང་ཀའི་གཞུང་གིས་ཏ་མིལ་གྱི་གྱེན་ལོག་པར་དྲག་རྒོལ་མཚམས་འཇོག་གནང་རྩིས་མེད་པའི་གནས་ཚུལ་ཐོན་འདུག

བར་ལམ་ཤི་རི་ལང་ཀའི་གཞུང་གི་དམག་མི་དང་ཏ་མིལ་སྟག་གྱེན་ལོག་དབར་གྱི་འཐབ་རྩོད་ནང་ཞི་བའི་ཡུལ་མི་མང་པོ་ཚུད་ཡོད་པ་དེ་དག་ལ་སྲུང་སྐྱོབ་དང་སྐྱོབ་གསོ་དུས་ཐོག་འཁྱོལ་བའི་ཆེད་དུ་ཕྱོགས་གཉིས་ཀས་འཕྲལ་དུ་མེ་འཕེན་མཚམས་འཇོག་དགོས་ལུགས་ཨ་མི་རི་ཀ་དང་དབྱིན་ཡུལ།ཁེ་ན་ཌ་བཅས་ཀྱིས་འབོད་བསྐུལ་ཞུས་འདུག མཉམ་སྦྲེལ་རྒྱལ་ཚོགས་དང་རོགས་སྐྱོར་ཚོགས་པ་ཁག་གིས་འགྲེལ་བརྗོད་གནང་བར་གཞིགས་ན་འཐབ་རྩོད་ནང་ཞི་བའི་མི་མང་ཉིས་འབུམ་ལྔ་ཁྲི་ཚུད་དེ་མང་པོའི་ཚེ་སྲོག་ཤོར་བཞིན་པ་དང་རེས་གཟའ་མིག་དམར་ཉིན་མི་མང་༥༢རྐྱེན་ལམ་དུ་ཕྱིན་ཡོད་ལུགས་འགྲེལ་བརྗོད་གནང་འདུག འོན་ཀྱང་དངོས་སུ་ཡུལ་མི་བརྒྱ་ཕྲག་མང་པོ་རྐྱེན་ལམ་དུ་ཕྱིན་ཡོད་པ་ངོས་འཛིན་བྱེད་ཀྱི་ཡོད་འདུག གཞུང་གིས་ད་བར་མེ་འཕེན་མཚམས་འཇོག་བྱས་མེད་པ་མ་ཟད་གྱེན་ལོག་པ་ལྷག་འཕྲོས་རྣམས་རྩ་མེད་བཟོ་རྒྱུར་ངང་སྒུག་བྱེད་ཀྱི་ཡོད་ལུགས་སྲིད་བློན་རཐ་ན་ཤི་རི་ལྦིཀ་རེ་མ་ན་ཡ་ཀེ་ཡིས་གྲོས་ཚོགས་ནང་གཏམ་བཤད་གནང་འདུག ཏ་མིལ་གྱེན་ལོག་པས་ལོ་ཉི་ཤུ་རྩ་ལྔའི་གོང་ནས་སྤེལ་བའི་ཁ་བྲལ་གྱི་ལས་འགུལ་དེ་ད་ཆ་མཐའ་ལ་ཐུག་ཡོད་པའི་རྣམ་པ་གསལ་པོ་ཡོད་འདུག འཐབ་རྩོད་དེའི་ནང་ད་བར་ཡུལ་མི་ཁྲི་བདུན་ཙམ་གྱི་ཚེ་སྲོག་ཤོར་ཡོད་རེད༎