བོད་ནང་རྒྱལ་ཁབ་བདེ་འཇགས་སློབ་གསོ་ཟེར་བ་སྤེལ་བཞིན་པ་ནི་བོད་མི་ཚོར་སྟངས་འཛིན་བྱེད་ཐབས་ཞིག་ཡིན་པ་ཉམས་ཞིབ་པས་ངོས་འཛིན་གནང་གི་འདུག

ལོ་ལྟར་ཕྱི་ཟླ་༤ཚེས་༡༥ཉིན་ནི་རྒྱ་ནག་གཞུང་གིས་རྒྱལ་ཁབ་བདེ་འཇགས་ཉིན་མོར་ཞེས། རྒྱ་ནག་རྒྱལ་ཡོངས་སུ་རྒྱལ་ཁབ་ཀྱི་བདེ་འཇགས་སློབ་གསོ་དྲིལ་བསྒྲགས་ལས་འགུལ་སྤེལ་བཞིན་ཡོད་པ་ལྟར། ཕྱི་ཚེས་༡༥ཉིན་བོད་ཀྱི་རྒྱལ་ས་ལྷ་ས་ཁུལ་དུ་དགོན་པ་ཁག་དང་སློབ་གྲྭ་ཁག དེ་བཞིན་གྲོང་ཁྱེར་དང་གྲོང་གསེབ་ཡོངས་སུ་ཚོགས་འདུ་འདྲ་མིན་གྱི་ལམ་ནས་རྒྱལ་ཁབ་བདེ་འཇགས་སློབ་གསོ་ཞེས་པ་སྤེལ་བཞིན་ཡོད་པ་དང་། ལྷ་ས་ཁུལ་དུ་ཚོགས་འདུའི་ནང་དོན་གཙོ་བོ་ཁ་བྲལ་བར་འབྲེལ་བ་བྱས་མི་ཆོག་སྐོར་དང་། རྒྱལ་ཁབ་ནང་ཁུལ་གྱི་གནས་ཚུལ་ཕྱི་ལ་མཁོ་སྤྲོད་མི་ཆོག་པ་སོགས་བསྒྲགས་བཞིན་ཡོད་སྐོར། བོད་ནང་གི་འབྲེལ་ཡོད་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
དེའི་ཐད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། རྒྱ་ནག་གཞུང་གིས་ཁྲིམས་དེ་རིགས་བཟོ་སྐབས་ཁྲིམས་དང་མཐུན་པའི་ངོས་འཛིན་དང་གོ་དོན་དམིགས་བསལ་བ་གང་ཡང་མེད་པར། བོད་གཙོས་གྲངས་ཉུང་མི་རིགས་ཁག་ཏུ་མགོ་གནོན་ཐབས་ཁོ་ན་ཞིག་ཏུ་བེད་སྤྱོད་གཏོང་གི་ཡོད་པ་བརྗོད་བྱུང་ལ། རྒྱ་ནག་གཞུང་གིས་རྒྱལ་ཁབ་བདེ་འཇགས་སློབ་གསོ་ཞེས་པ་དེ་ཕྱི་ལོ་༢༠༡༥ལོར་རྒྱ་ནག་གི་འགོ་ཁྲིད་ཞི་ཅིན་ཕིན་གྱིས་ལག་བསྟར་བྱས་ཡོད་པ་དང། རྒྱ་ནག་གཞུང་འབྲེལ་གྱི་འགྲེལ་བཤད་ཁག་ཏུ་རྒྱལ་ཁབ་བདེ་འཇགས་སློབ་གསོ་ཞེས་པ་ནི་རྒྱལ་ཁབ་ཀྱི་སྲིད་དབང་དང་། བདག་དབང་གཅིག་གྱུར། མངའ་ཁོངས་ཆ་ཚང་། གསང་བ་སྲུང་དགོས་པ་སོགས་བཤད་ཡོད་ཀྱང་། བོད་ནང་དུ་ལག་བསྟར་བྱེད་སྐབས་གཙོ་བོ་༧གོང་ས་མཆོག་དང་ཁ་བྲལ་བར་འབྲེལ་བ་བྱེད་མི་ཆོག་པ་ཤུགས་ཆེར་གླེང་བཞིན་ཡོད་པ་རེད།

རྒྱ་ནག་གཞུང་གིས་རྒྱལ་ཁབ་བདེ་འཇགས་སློབ་གསོ་ཞེས་པའི་ནང་གཙོ་བོ་རྒྱལ་ཁབ་ཀྱི་གསང་བ་ཤེས་རྟོགས་བྱུང་བ་རྣམས་དམ་སྲུང་བྱ་དགོས། རྒྱལ་ཁབ་ཀྱི་བདེ་འཇགས་ལ་གནོད་པའི་བྱ་འགུལ་གྱི་ཁུངས་སྣེ་དུས་ཐོག་ཏུ་སྙན་སེང་ཞུ་དགོས་པ། མེས་རྒྱལ་ལ་སྲུང་སྐྱོང་དང་། བཙན་འཛུལ་ལ་འགོག་རྒོལ་བྱ་དགོས་པ་སོགས་ཤུགས་ཆེར་བསྒྲགས་བཞིན་ཡོད་འདུག་ལ། ཡང་ཟླ་བ་ཚེ་རིང་ལགས་ནས་མུ་མཐུད་དུ། རྒྱ་ནག་གཞུང་གིས་རྒྱལ་ཁབ་བདེ་འཇགས་ཀྱི་སློབ་གསོ་ཟེར་བ་དེ་རིགས་རྒྱ་ནག་དམར་ཤོག་ཚོགས་པའི་དབང་ཆ་གཅིག་སྡུད་རིང་ལུགས་ཀྱི་ནུས་ཤུགས་སྲ་བརྟན་གཏོང་ཐབས་ཤིག་ཡིན་པ་མ་ཟད། དམར་ཤོག་གི་ཁེ་ཕན་ཆེད་ཁོ་རང་ཚོའི་འདོད་པ་བཞིན་འགྲེལ་བཤད་བརྒྱབ་སྟེ་རྒྱལ་ཁབ་བདེ་འཇགས་དང་ཁྲིམས་ལ་འགལ་ཡོད་པའི་ཉེས་མིང་སྣ་ཚོགས་འོག་བོད་མི་ཚོར་བཙན་གནོན་བྱེད་ཀྱི་ཡོད་པས། དེ་ནི་བོད་ནང་ལ་མཚོན་ན་བཙན་གནོན་བྱེད་ཐབས་ཀྱི་གྲི་ལྟ་བུ་ཞིག་ཡིན་པ་རེད་ཅེས་འགྲེལ་བརྗོད་གནང་བྱུང་།
རྒྱ་ནག་གཞུང་གིས་ལོ་ལྟར་བོད་ནང་གི་རྒྱལ་ཁབ་བདེ་འཇགས་ལ་གཏོར་བཤིག་བཏང་སྐོར་བརྗོད་ནས་མི་མང་དག་ཅིག་འཛིན་བཟུང་དང་། བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་གནས་ཚུལ་བྱུང་ཡོད་པ་རེད་ལ། ཕྱི་ལོ་༢༠༢༣ལོར་མགོ་ལོག་གསེར་རྟ་ནས་ཡིན་པའི་རྩོམ་པ་པོ་གངས་སྐྱེས་སྒྲུབ་པ་སྐྱབས་ལགས་དང་། གངས་བུ་གཡུ་བྷུམ། བསམ་འགྲུབ་སྲས་རྣམ་། གངས་ཚེ་རིང་སྒྲོལ་མ་བཅས་མི་ལྔ་དང་། བྲག་མགོ་ནས་ཡིན་པའི་པདྨ་རིན་ཆེན་བཅས་ཁྱོན་བོད་མི་དྲུག་ལ་རྒྱལ་ཁབ་ཁ་བྲལ་གྱི་ངན་སྐུལ་དང་རྒྱལ་ཁབ་བདེ་འཇགས་ལ་གནོད་སྐྱོན་བཏང་བའི་ཉེས་མིང་འོག་ལོ་༤ནས་༡༤བར་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།

གསར་འགོད་པ། དཔལ་འབར། ཨེ་ཤེ་ཡ་རང་དབང་རླུང་འཕྲིན་ཁང་།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།