དཔལ་དུས་ཀྱི་འཁོར་ལོའི་དབང་ཆེན་གྱི་དྲ་རྒྱ་ཤར་གཏོང་གནང་བ།

དཔལ་དུས་ཀྱི་འཁོར་ལོའི་དབང་ཆེན་ཐེངས་སུམ་བཅུ་སོ་བཞི་བ་དང་འབྲེལ་བའི་གཞུང་འབྲེལ་དྲ་རྒྱ་དབུ་འབྱེད་གནང་འདུག
དེ་ཡང་ཕྱི་ཟླ་༩་ཚེས་༡༦་གཟའ་པ་སངས་ཉིན་གཞུང་འབྲེལ་དྲ་རྒྱ་དེ་དབུ་འབྱེད་གནང་ཡོད་པ་དང་། དེ་ནི་བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འཆར་ལོའི་ཕྱི་ཟླ་དང་པོའི་ནང་། དཔལ་དུས་ཀྱི་འཁོར་ལོའི་དབང་ཆེན་ཐེངས་༣༤་བ་དེ་བཞིན་རྒྱ་གར་གྱི་གནས་མཆོག་རྡོ་རྗེ་གདན་དུ་སྩལ་གནང་མཛད་རྒྱུའི་ཐུགས་གཏན་འཁེལ་བ་ལྟར། དཔལ་དུས་ཀྱི་འཁོར་ལོའི་དབང་ཆེན་ཐེངས་སོ་བཞི་པའི་གོ་སྒྲིག་ཚོགས་ཆུང་གིས་གཞུང་འབྲེལ་དྲ་རྒྱ་www.kalachakra2017.net་དང་www.kalachakra2017.org་ཞེས་པའི་དྲ་རྒྱ་དབུ་འབྱེད་གནང་འདུག
དྲ་རྒྱ་འདིར་དབུས་བོད་མིའི་སྒྲིག་འཛུགས་ཀྱིས་ཇི་ལྟར་གསོལ་འདེབས་ཞུས་བ་ལྟར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བཀའ་བཞེས་ཟབ་མོ་ཕེབས་པ་དང་། ༧མགོན་པོ་གང་ཉིད་ནས་ཕྱི་ལོ་༢༠༡༧་ཕྱི་ཟླ་༡་ཚེས་༡་ནས་༡༤་བར་རྒྱ་གར་འཕགས་ཡུལ་གནས་མཆོག་རྡོ་རྗེ་གདན་དུ་བཀའ་འདྲིན་ཆེ་རྒྱུའི་དཔལ་དུས་ཀྱི་འཁོར་ལོའི་དབང་ཆེན་དང་འབྲེལ་བའི་ ཚོགས་ཆུང་ནས་གྲ་སྒྲིག་ཞུ་ཕྱོགས་དང་། མི་མང་ཀྱི་དབུ་གུར་དང་སྨན་བཅོས། གཙང་ཕྲ་འཕྲོད་བསྟེན་སྐོར་གྱི་གནས་ཚུལ་ཡོད་པ་མ་ཟད། ཕྱི་རྒྱལ་བ་དང་དགེ་འདུན་པ། ཧི་མ་ལ་ཡའི་རི་རྒྱུད་ནས་ཡིན་པའི་མི་མང་རྣམས་ཀྱིས་དྲ་རྒྱ་དེ་བརྒྱུད་ནས་ཐོ་འགོད་དེབ་སྐྱེལ་ཡང་གནང་ཆོག་ཀྱི་ཡོད་པ་རེད།

གསར་འགོད་པ་ཀརྨ་རྒྱ་མཚོ།