སྒོ་ཤེས་རབ་རྒྱ་མཚོའི་འཕྲོད་བསྟེན་གནས་བབ་ལ་བློ་འཚབ་དང་བཅས་གློད་གྲོལ་དགོས་པའི་ཞུ་འབོད་གནང་འདུག

རྒྱ་ནག་གཞུང་གིས་ཉེ་ལམ་བཙོན་འཇུག་ཁྲིམས་ཐག་བཅད་པའི་བོད་ཀྱི་རྩོམ་པ་པོ་གྲགས་ཅན་དང་ནང་བསྟན་ཤེས་ཡོན་པ་སྒོ་ཤེས་རབ་རྒྱ་མཚོ་ལགས་ཀྱི་སྐུ་གཟུགས་འཕྲོད་བསྟེན་གྱི་གནས་བབ་ཡག་པོ་མེད་པ་དང་། གློ་ནད་ཀྱི་ནད་གཞི་ཇེ་སྡུག་ཏུ་ཕྱིན་ཡོད་པ་མ་ཟད། ལྷག་པར་དུ་བཙོན་འཇུག་ཁྲོད་དགོས་ངེས་ཀྱི་སྨན་བཅོས་མཐུན་རྐྱེན་དུས་ཐོག་ཐོབ་ཀྱི་མེད་པ་འབྲེལ་ཡོད་བཙན་བྱོལ་དུ་ཡོད་པའི་བོད་མི་ཁག་ཅིག་གིས་ངོ་སྤྲོད་གནང་བ་ལུང་འདྲེན་དང་བཅས། ཨ་རིའི་ནང་གི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་(Sophie Richardson)་ལགས་ཀྱིས། རྒྱ་ནག་གཞུང་གིས་བསྐྱར་དུ་ཉེས་མེད་བོད་མི་ཞིག་བཙོན་བཅུག་བྱས་ནས། ད་ཆ་ཁོང་གི་འཕྲོད་བསྟེན་གནས་བབ་ཡག་པོ་མེད་པར་ཉེན་ཁའི་གནས་སུ་ཡོད་པར་སོང་། རྒྱ་ནག་གཞུང་གིས་བསམ་ཤེས་ཀྱིས་ཁོང་འཕྲལ་དུ་གློད་གྲོལ་གཏོང་དགོས་བ་དང་། དགོས་ངེས་ཀྱི་སྨན་བཅོས་ཀྱི་མཐུན་རྐྱེན་མཁོ་སྤྲོད་བྱ་དགོས་པའི་ཞུ་འབོད་གནང་འདུག སྒོ་ཤེས་རབ་རྒྱ་མཚོ་ལགས་ཀྱི་གྲོགས་པོ་ད་ལྟ་ཡོ་རོབ་ཏུ་གནས་སྡོད་རྩོམ་པ་པོ་སྐྱེས་སར་ཀླུ་སྒྲུབ་ལགས་སུ་ཨེ་ཤེ་ཡ་རང་རླུང་འཕྲིན་ཁང་གིས་བཅར་འདྲི་ཞུས་སྐབས། ཁོང་གིས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་སྔོན་མ་༡༩༩༨་ལོ་ནས་༢༠༠༡་ལོ་བར་ལོ་གསུམ་ལྷག་རིང་རྒྱ་ནག་གིས་བཙོན་འཇུག་བྱས་པའི་སྐབས་སུ། གློ་ནད་བྱུང་ཡོད་པའི་ཐོག མཁལ་མ་ཡང་ནད་པར་གྱུར་ཡོད་པ་དང་། ཁྲག་ཤེད་མཐོ་བ་སོཊ་ཀྱི་སྙུང་གཞི་སྣ་མང་ཕོག་ཡོད་པ་དང་། ཉེ་ལམ་ཁོང་རྒྱ་ནག་གཞུང་གིས་ཡང་བསྐྱར་བཙོན་འཇུག་བྱས་ཏེ་ལོ་གཅིག་ལྷག་ཕྱིན་པ་ཡོང་ཀྱང་ནང་མི་སུ་རུང་ལ་ཐུག་འཕྲད་བྱེད་དུ་བཅུག་མེད་པ་དང་། ཁོང་གི་སྙུང་གཞིར་དགོས་ངེས་ཀྱི་སྨན་བཅོས་མཐུན་རྐྱེན་མ་རག་པའི་དབང་གིས་དེང་སྐབས་གཟུགས་གཞིའི་གནས་སྟངས་ཧ་ཅང་སྐྱོ་བོར་གྱུར་ཡོད་པ་འབྲེལ་ཡོད་མི་སྣ་བརྒྱུད་ནས་ཤེས་རྟོགས་བྱུང་བ་འགྲེལ་བརྗོད་གནང་བྱུང་།
དགུང་ལོ་༤༥་ལ་སོན་པའི་སྒོ་ཤེས་རབ་རྒྱ་མཚོ་ལགས། ༢༠༢༠་ལོའི་ཕྱི་ཟླ་༡༠་བའི་ཚེས་༢༦་ཉིན་རྒྱ་ནག་ཁྲིན་ཏུའུ་གྲོང་ཁྱེར་ནས་ལྷ་སའི་རྒྱ་ནག་གི་གསང་བའི་མི་སྣ་དང་རྒྱ་ནག་གི་སྤྱི་བདེ་ཉེན་རྟོག་པས་གློ་བུར་འཛིན་བཟུང་རྗེས། ཡུན་རིང་གང་དུ་ཁྲིད་ཡོད་མེད་སོགས་ཀྱི་གནས་ཚུལ་ཁ་གསལ་མེད་པར་གར་སོང་ཆ་མེད་དུ་གྱུར་ཡོད་པ་རེད། རྗེས་སུ་༢༠༢༡་ལོའི་ཟླ་༡༢་བའི་ཚེས་༡༠་ཉིན་ཨེ་ཤ་ཡ་རང་དབང་རླུང་འཕྲིན་ཁང་གིས་ཁུངས་ལྡན་གནས་ཚུལ་ཤེས་རྟོགས་བྱུང་བ་ལྟར། ལྷ་སའི་རྒྱ་ནག་གི་འབྲེལ་ཡོད་ཚན་པས་ཁོང་ལ་མི་ལོ་བཅུའི་དུས་བཀག་བཙོན་འཇུག་གི་ཁྲིམས་ཐག་བཅད་ནས་བཙོན་འཇུག་བྱས་ཡོད་པ་རེད།
ད་ལྟ་ཁོང་ལྷ་ས་ནས་རྒྱང་ཐག་སྤྱི་ལེ་༢༠་ཙམ་ཀྱི་སར་ཡོད་པའི་ཆུ་ཤུལ་བཙོན་ཁང་དུ་ཡོད་པ་དང་། ད་བར་ཁོང་ཕྱི་མི་སུ་ཞིག་ལའང་ཐུག་འཕྲད་བྱ་རུ་བཅུག་ཀྱི་མེད་པ་དང་། ཁོང་གི་སྐུ་གཟུགས་གནས་སྟངས་ཧ་ཅང་སྐྱོ་པོ་ཡོད་འདུག ཁོང་དེ་སྔ་༡༩༩༨་ལོ་ནས་༢༠༠༡་ལོ་བར་ལོ་གསུམ་རིང་རྒྱ་ནག་གིས་བཙོན་འཇུག་བྱས་སྐབས་གློ་བའི་ནད་གཞི་ཕོག་ཡོད་པ་དང་། ད་ཆ་གློ་ནད་དེ་བཞིན་ཚབས་ཆེ་རུ་ཕྱིན་ནས་ཧ་ཅང་ཛ་དྲག་ངང་གནས་ཡོད་ལུགས་གནས་ཚུལ་ནང་གསལ་འདུག
ད་ལྟ་དགུང་ལོ་༤༦་ཡིན་པའི་སྒོ་ཤེས་རབ་རྒྱ་མཚོ་ལགས་བོད་ཕྱི་ནང་གཉིས་སུ་ཤུགས་རྐྱེན་ཆེ་བའི་རྩོམ་པ་པོ་གྲགས་ཅན་ཞིག་ཡིན་པ་དང་། ཁོང་གིས་ད་བར་རྒྱུན་ཤེས་དང་ལམ། བླང་དོར་ལྟ་ཚུལ། རང་ལམ་རང་འཚོལ། ང་ཚོ་སད་རན། དཔྱད་འཚོལ་དང་ལྟ་ཚུལ། སྐྱེས་ཆེན་གྱི་བཞུད་ལམ་སོགས་རྩོམ་དེབ་མང་པོ་ཞིག་བརྩམས་ཡོད་པ་རེད།

གསར་འགོད་པ། ཚེ་དབང་དངོས་གྲུབ། རྡོ་རྗེ་འཚོ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།