གནམ་གཤིས་འགྱུར་ལྡོག་གིས་དོ་ཕོག་ཆེ་ཤོས་བྱུང་བའི་ཡུལ་སྐོར།

༄༅༎བལ་ཡུལ་དང་སྦང་ལ་རྡེ་ཤེ་གཉིས་ནས་གནམ་གཤིས་འགྱུར་ལྡོག་གི་རྐྱེན་པས་དོ་ཕོག་ཆེ་ཤོས་ཐེབས་རྒྱུའི་ཉེན་བརྡ་བཏང་བ་དང་ཆབས་ཅིག་འཛམ་གླིང་ལ་སྔོན་འགོག་གི་ལས་དོན་སྤེལ་དགོས་པའི་འབོད་སྐུལ་ཞུས་གནང་ཡོད་འདུག

དྲེན་མཀ་ཀྱི་རྒྱལ་ས་ཀོ་པེན་ཧེ་གེན་ནང་དེང་སང་འཛམ་གླིང་གི་རྒྱལ་ཁབ་བརྒྱ་ལྷག་ཙམ་གྱི་དབུ་འཁྲིད་ཚོ་སའི་གོ་ལའི་གནམ་གཤིས་ཚ་དྲོད་འགྱུར་ལྡོག་གི་གནད་དོན་ཐོག་ཚོགས་འདུ་གནང་བཞིན་ཡོད་པ་དང་། སྐབས་དེར་སྦང་ལ་རྡེ་ཤེའི་སྲིད་བློན་མཆོག་གིས་འཛམ་གླིང་ནང་གནམ་གཤིས་འགྱུར་ལྡོག་འགྲོ་བཞིན་པ་དེས་གྱོང་གུན་ཆེ་ཤོས་ང་ཚོར་ཕོག་གི་ཡོད་པ་ནི་ལོ་ལྟར་རྒྱ་མཚོའི་མཐོ་ཚད་འགྱུར་བ་འགྲོ་གི་ཡོད་ཙང་ཉ་པ་ཚོའི་འཚོ་བའི་རྟེན་གཞིར་གནོད་སྐྱོན་བཟོ་གི་ཡོད་པས་མ་ཟད་ཆུ་ལོག་གི་ཉེན་ཁ་ཆགས་ཀྱི་ཡོད་ལུགས་གསུངས་ནས་ཡར་ཐོན་ཅན་གྱི་རྒྱལ་ཁབ་ཚོར་མཁའ་རླུང་སྦག་བཙོག་ཐོག་དོ་སྣང་ཆེ་ཙམ་བྱེད་དགོས་པའི་འབོད་སྐུལ་གནང་ཡོད་འདུག

དེ་དང་ཕྱོགས་མཚུངས་བལ་ཡུལ་གྱི་སྲིད་བློན་མཆོག་གིས་ཧི་མ་ལ་ཡའི་གངས་རིའི་འཁྱགས་རོམ་མྱུར་ཚད་ཆེན་པོའི་ཐོག་ནས་བཞུར་འགྲོ་གི་ཡོད་པ་དེས་མ་འོངས་པའི་མི་རབས་ཙམ་མ་ཡིན་པར་ཧི་མ་ལ་ཡའི་རི་བརྒྱུད་དུ་གནས་པའི་མི་མང་ཚོའི་འཚོ་བའི་རྟེན་གཞིར་ཡང་རང་བཞིན་གྱི་དཀའ་ངལ་ཆེན་པོ་ཞིག་འཕྲད་ཀྱི་རེད་ཅེས་གསུངས་ནས་ཉེན་བརྡ་བཏང་ཡོད་པ་བཅས་རྒྱལ་ཁབ་སྟོབས་ཆེ་བ་ཚོར་སྔོན་འགོག་གི་ལས་དོན་སྤེལ་དགོས་པའི་སྐུལ་མ་ཞུས་ཡོད་པ་རེད།