သံလွင်မြစ်ကော်မရှင်ဖွဲ့ဖို့ တရုတ်၊ ထိုင်းနဲ့ သံတမန်နည်းအရ ညှိနှိုင်းမယ်

တရုတ်၊ မြန်မာနဲ့ ထိုင်းတို့ပါဝင်မယ့် သံလွင်မြစ်ကော်မရှင်ကို ဖွဲ့စည်းဖို့အတွက် သံတမန်လမ်းကြောင်းက ဆက်သွယ်ဆောင်ရွက်ပေးဖို့ နိုင်ငံခြားရေးဝန်ကြီးဌာနကို တင်ပြထားတယ်လို့ ပို့ဆောင်ရေးနဲ့ ဆက်သွယ်ရေး ဝန်ကြီး ဦးသန့်စင်မောင်က ပြောပါတယ်။

ဒီကနေ့ အမျိုးသားလွှတ်တော်အစည်းအဝေးမှာ ကယားပြည်နယ် အမှတ် ၉ မဲဆန္ဒနယ်က အမျိုးသားလွှတ်တော် ကိုယ်စားလှယ် ဦးစိုးသိန်းရဲ့ သံလွင်မြစ်ကို ရေရှည်ပိုင်ပိုင်နိုင်နိုင် အသုံးပြုရေးအတွက် အနာဂတ်မှာ ကြုံတွေ့ရ ဖွယ်ရှိတဲ့ ပြဿနာ တွေ ကြိုတင်ကာကွယ်နိုင်ရန် တရုတ်နိုင်ငံနဲ့ ရေစီမံခန့်ခွဲမှု သဘောတူညီမှု ဆောင်ရွက်ဖို့ အစီအစဉ် ရှိ၊ မရှိမေးခွန်းကို ဖြေကြားရာမှာ အခုလို ထည့်သွင်းပြောကြားလိုက်တာပါ။