ရမည်းသင်းမှာ ချောင်းကမ်းပါးပြိုပြီး အမျိုးသမီးတစ်ဦး သေဆုံး၊ ၁၁ ဦး ဒဏ်ရာရ

မန္တလေးတိုင်း၊ ရမည်းသင်းမြို့နယ်၊ ကင်းရွာမှာ စက်တင်ဘာလ ၂၁ ရက်နေ့က ချောင်းကမ်းပါး ပြိုကျတာကြောင့် အမျိုးသမီးတစ်ဦး သေဆုံးပြီး နောက်ထပ် ၁၁ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

ဒေသခံတွေ ချောင်းအတွင်း တစ်နိုင်တစ်ပိုင် ရွှေကျင်နေစဉ် ကမ်းပါးပြိုကျလာတာကြောင့် လူအုပ်လိုက် ပိမိပြီး သေဆုံး၊ ထိခိုက်မှုတွေ ဖြစ်ခဲ့တာလို့ အဲဒီဖြစ်ရပ်ကို သိရှိတဲ့ ရမည်းသင်း ဒေသခံတစ်ဦးက RFA ကို ပြောပါတယ်။

"မနေ့က ၃ နာရီလောက်မှာ ဖြစ်သွားတာ။ သူတို့က ချောင်းထဲမှာ ရွှေရှာရင်းနဲ့ ရေတိုက်စားပြီး ချောင်းကမ်းပါး ပြိုကျလာတာ။ အမျိုးသမီး တစ်ယောက် သေဆုံးတယ်။ အဲဒီနား ပတ်၀န်းကျင်ကသူတွေ အကုန် ထိခိုက်ဒဏ်ရာရတယ်။ ဒဏ်ရာရတဲ့သူတွေက မြေပိပြီး ပေါင်ကျိုးတယ်။ လက်ကျိုးတယ်"

သေဆုံးသူဟာ အသက် ၄၀ ဝန်းကျင်အရွယ် အမျိုးသမီးတစ်ဦးဖြစ်ပြီး ဒဏ်ရာရသူတွေကိုတော့ ရမည်းသင်းဆေးရုံကို ပို့ဆောင်ထားတယ်လို့ ဒေသခံတွေက ပြောပါတယ်။

ဒီအခြေအနေတွေနဲ့ ပတ်သက်လို့ စစ်ကောင်စီရဲ့ မန္တလေးတိုင်း ပြောခွင့်ရသူ တိုင်းစီးပွားရေးဝန်ကြီး ဦးသိန်းဌေးကို RFA က တယ်လီဖုန်းနဲ့ ဆက်သွယ်ပေမဲ့ လက်ခံဖြေကြားတာ မရှိပါဘူး။

စက်တင်ဘာလ ၁၀ ရက်နေ့ကစလို့ ရမည်းသင်းမြို့နယ် အရှေ့ဘက်ခြမ်းက တောင်ပေါ်ရွာတွေနဲ့ မိုးထိမိုးမိ ရွှေလုပ်ကွက်အနီးတစ်၀ိုက်က ရွာတွေမှာ ရေကြီးရေလျှံမှုနဲ့ မြေပြိုမှုတွေကြောင့် သေဆုံးသူ ခုနစ်ဆယ်ခန့်ရှိခဲ့ပြီး ပျောက်ဆုံးနေသူ ရာနဲ့ချီ ရှိနေပါတယ်။

မန္တလေးတိုင်းက ရေကြီးရေလျှံမှုမှာ လူပေါင်း ၁၃၄ ဦး သေဆုံးခဲ့တဲ့တယ်လို့ စစ်ကောင်စီက စက်တင်ဘာလ ၂၁ ရက်နေ့မှာ ထုတ်ပြန်ထားပါတယ်။