ပြည်တွင်းရေးကို ဝင်စွက်စရာမလိုကြောင်း သမ္မတပြောရေးဆိုခွင့်ရှိသူဆို

မြန်မာနိုင်ငံရဲ့ လုံခြုံရေးဆိုင်ရာကိစ္စတွေနဲ့ ပတ်သက်ပြီး ဘယ်ပြင်ပအဖွဲ့အစည်းကမှ လာရောက် စုံစမ်းစစ်ဆေးစရာမလိုကြောင်း သမ္မတပြောခွင့်ရပုဂ္ဂိုလ် ဦးရဲထွဋ်က မနေ့ကပြောလိုက်ပါတယ်။

OIC ခေါ်  အစ္စလာမ်မစ် ပူးပေါင်းဆောင်ရွက်ရေးအဖွဲ့ အတွင်းရေးမှူးချုပ်က မြန်မာအစိုးရဟာ  ဗုဒ္ဓဘာသာဝင်တွေနဲ့ လူနည်းစုမူဆလင် အသိုင်းအဝိုင်းကြားဖြစ်ပွားခဲ့တဲ့  ပြဿနာ အပေါ် ကောင်းကောင်းမွန်မွန် မကိုင်တွယ်ခဲ့ကြောင်း  တနင်္ဂနွေနေ့က ပြောဆိုခဲ့ပါတယ်။

ဒီကိစ္စနဲ့ ပတ်သက်ပြီး  သမ္မတပြောခွင့်ရပုဂ္ဂိုလ် ဦးရဲထွဋ်က အမျိုးသားလုံခြုံရေးဟာ  ပြည်တွင်းရေး ကိစ္စဖြစ်တဲ့အကြောင်း၊ နိုင်ငံတကာအဖွဲ့အစည်း တစ်ခုဟာ ဘယ်နည်းနဲ့မှ  ပြည်တွင်းရေးကို ဝင်စွက်စရာအကြောင်းမရှိဘူးဆိုတာ ယုံကြည်ကြောင်း  ထိုင်းနိုင်ငံအခြေစိုက် ဧရာဝတီသတင်းဌာနကို ပြောကြား ခဲ့ပါတယ်။

OIC အနေနဲ့ မြန်မာပြည်ကို ကိုယ်စားလှယ်အဖွဲ့စေလွှတ်ဖို့ တရားဝင်ပန်ကြားခဲ့တာမျိုးလည်းမရှိဘူးလို့ ဦးရဲထွဋ်က ပြောပါတယ်။