မြင်းခြံမြို့နယ်မှာ လက်နက်ကြီးကြောင့် တစ်ဦးသေ၊ လေးဦးဒဏ်ရာရ

မန္တလေးတိုင်း၊ မြင်းခြံမြို့နယ်နဲ့ အရှေ့ဘက်တစ်မိုင်ကျော်မှာရှိတဲ့ ကျောက်ရံရွာကို နိုဝင်ဘာ ၁၄ ရက်နေ့မှာ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် အသက်မပြည့်သေးတဲ့ ကလေးငယ်တစ်ဦး သေဆုံးပြီး လေးဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

အသက် ၉ နှစ်အရွယ် မအိပြည့်ပြည့်ဖြိုးသေဆုံးခဲ့ပြီး၊ အသက် ၃၆ နှစ်အရွယ် မကြေးမုံဝင်း၊ အသက် ၃၃ နှစ်အရွယ် မဝင်းနွယ်၊ အသက် ၄၂ နှစ်အရွယ် မသင်းသင်းအေးနဲ့ ၄၄ နှစ်အရွယ် မရီဝင်းတို့ ဒဏ်ရာရခဲ့တယ်လို့ ဆိုပါတယ်။

တိုက်ပွဲဖြစ်နေတာ မရှိပေမဲ့ ကာကွယ်ရေးတပ်တွေ ရှိနေတယ် ဆိုတဲ့အကြောင်းပြချက်နဲ့ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာလို့ အမည်မဖော်လိုတဲ့ မြင်းခြံဒေသခံတစ်ဦးက RFA ကို ပြောပါတယ်။

“ဘာတိုက်ပွဲမှ မရှိပါဘူး။ သူတို့ဘက်က ဘယ်သူ့ထိထိဆိုပြီး ပစ်ကြတာ။ ရွာမှာလည်း ဘယ်သူမှ မနေကြတော့ဘူး။ အကုန်လုံး နီးစပ်ရာကို တိမ်းရှောင်နေကြတယ်။ ဒဏ်ရာရတဲ့သူတွေကလည်း အခြေအနေကောင်းတယ်လို့ ကြားပါတယ်”

ဒီကိစ္စနဲ့ပတ်သက်ပြီး တုံ့ပြန်မှုရဖို့ စစ်ကောင်စီရဲ့ မန္တလေးတိုင်းပြောခွင့်ရသူ တိုင်းစီးပွားရေးဝန်ကြီး ဦးသိန်းဌေးကို RFA က တယ်လီဖုန်းနဲ့ဆက်သွယ်ခဲ့ပေမဲ့ လက်ခံဖြေကြားတာ မရှိပါဘူး။

ဒါ့အပြင် စစ်ကောင်စီတပ်ဟာ ကာကွယ်ရေးတပ်ဖွဲ့တွေ စိုးမိုးထားတဲ့ နေရာတွေကို နိုဝင်ဘာ ၁၁ ရက်နေ့ကစပြီး လေကြောင်းကနေ နေ့စဥ် ပစ်ခတ်နေတယ်လို့ ဒေသခံတွေက ပြောပါတယ်။

နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) ရဲ့ နိုဝင်ဘာ ၁၄ ရက်နေ့အထိ စာရင်းအရ အာဏာသိမ်းသုံးနှစ်ကျော်အတွင်း စစ်ကောင်စီတပ်ကြောင့် နိုင်ငံတစ်ဝန်းမှာ အရပ်သား ခြောက်ထောင်နီးပါး (၅,၉၄၅) သေဆုံးခဲ့ပါတယ်။