နာမည်ကျော် အဆိုတော် မာမာအေး ကွယ်လွန်

ဂန္ထဝင်အဆိုတော် မာမာအေးဟာ ဇန်နဝါရီလ ၉ ရက် ဒီနေ့ မနက် ၆ နာရီဝန်းကျင်က အမေရိကန်ပြည်ထောင်စု အင်ဒီယားနားပြည်နယ် ဖို့ဒ်ဝိန်းမြို့က နေအိမ်မှာ ကွယ်လွန်သွားပါတယ်။

ဒေါ်မာမာအေးဟာ ဧရာဝတီတိုင်း မြောင်းမြမြို့ ဇာတိဖြစ်ပြီး ကွယ်လွန်ချိန်မှာ အသက် ၈၂ နှစ်အရွယ်ရှိနေပါပြီ။

သူ့စျာပန ကျင်းပမယ့်ရက်ကို ကြေညာပေးမယ်လို့ ဖို့ဒ်ဝိန်းမြို့ မှာ နေထိုင်တဲ့ ဒေါ်မာမာအေးနဲ့ ရင်းနှီးသူတွေက ပြောပါတယ်။

ဒေါ်မာမာအေးဟာ ဗိုလ်ချုပ်မှူးကြီး သန်းရွှေ စစ်အစိုးရလက်ထက် ၁၉၉၈ ခုနှစ်မှာ မြန်မာပြည်က ထွက်ခွာလာခဲ့ရပြီး အမေရိကန် ပြည်ထောင်စုမှာ အခြေချ နေထိုင်ခွင့် ရခဲ့ပါတယ်။ ၂၀၀၇ ရွှေဝါရောင် သံဃာ့လှုပ်ရှားမှု ကာလမှာ “သံဃာတော်တွေ သွေးမြေကျရပြီတဲ့ တကြော်ကြော် ဟစ်ကြွေးကြသံများ”ဆိုတဲ့ သီချင်းကို သီဆို ထုတ်လွှင့်ခဲ့ပါတယ်။

အဆိုတော် မာမာအေးဟာ မောင့်အချစ်မြား၊ နှင်းပျောက်တဲ့နွေ၊ မေ့ကွက်ကိုရှာ၊ သက်ဆိုင်သူသို့ အစရှိတဲ့ နာမည်ကျော် သီချင်းပေါင်း များစွာကို သီဆိုခဲ့တဲ့ တစ်ခေတ်တစ်ခါက ဂန္ထဝင်အဆိုတော်ကြီး ဖြစ်ပါတယ်။