မွန်ပြည်နယ်က လိုင်စင်မရှိတဲ့ ကျောက်မိုင်းတွေကို အရေးယူမယ်

မွန်ပြည်နယ်အတွင်း လိုင်စင်မရှိဘဲ တရားမဝင် ကျောက်မိုင်းနဲ့ သတ္ထုတူးဖော်ရေး လုပ်ကိုင်နေသူတွေကို တည်ဆဲဥပဒေတွေအရ အရေးယူဆောင်ရွက်သွားမယ်လို့ မွန်ပြည်နယ် နယ်စပ်ရေးရာနဲ့ လုံခြုံရေးဝန်ကြီး ဗိုလ်မှူးကြီး ဝင်းနိုင်ဦး က ပြောပါတယ်။

ဒီနေ့ မွန်ပြည်နယ်လွှတ်တော်မှာ ဘီးလင်းမြို့နယ် အမှတ် ၁ မဲဆန္ဒနယ်မြေ လွှတ်တော်ကိုယ်စားလှယ် ဒေါက်တာ ခင်နိုင်ဦး က ပြည်နယ်အတွင်း လိုင်စင်မရှိဘဲ ကျောက်မိုင်းထုတ်နေတာတွေကို အရေးယူဖို့ ရှိ မရှိ မေးမြန်းရာမှာ ဗိုလ်မှူးကြီး ဝင်းနိုင်ဦးက အခုလိုဖြေကြားခဲ့တာပါ။

မွန်ပြည်နယ်မှာ ၂၀၁၆ခုနှစ်အတွင်း ကျောက်မိုင်းလုပ်ကိုင်ခွင့် ၁၁၅ ခု လျှောက်ထားပြီး မြို့နယ်အဆင့် ၇၇ ခု၊ ခရိုင်အဆင့် ၅ ခု၊ ပြည်နယ်အဆင့် ၃ ခုကို စိစစ်ဆဲဖြစ်တယ်လို့ ဝန်ကြီးက ပြောပါတယ်။

ကျောက်မိုင်းလုပ်ကိုင်တဲ့လူတွေအနေနဲ့ လုပ်ပိုင်ခွင့်လျှောက်ထားနေစဉ်နဲ့ သက်တမ်းတိုးနေတဲ့အချိန်မှာ လုပ်ကိုင်ခွင့်မရှိဘဲ ပြုလုပ်ပါက အရေးယူသွားမယ်လို့ ပြောပါတယ်။

အလားတူ ဒီနေ့လွှတ်တော်မှာ ဘီးလင်းမြို့နယ် ကေလာသ သဘာဝ နယ်မြေအတွင်း အကျဉ်းဦးစီး အပါအဝင် ကုမ္ပဏီ ၆ ခုမှ ကျောက်ထုတ်နေတာတွေကို လုံးဝရပ်ဆိုင်းဖို့ တိုက်တွန်းကြောင်းအဆိုကို လွှတ်တော်မှာ အတည်ပြုခဲ့ပါတယ်။