မန္တလေးမြို့ ရွှေဆိုင်တစ်ခုမှာ ရွှေနှစ်ပိဿာကျော် ဓားပြတိုက်ခံရ

မန္တလေးမြို့ မန်းမြို့ဈေးအတွင်းမှာ ဖွင့်လှစ်ထားတဲ့ ဆယ်သန်းရွှေဆိုင်ကို မေလ ၃၁ ရက်နေ့ ညနေပိုင်းမှာ သေနတ်တွေ ကိုင်ဆောင်ထားတဲ့ လူတစ်စု ဝင်ရောက်ဓားပြတိုက်ခဲ့ပြီး ရွှေနှစ်ပိဿာကျော် ယူသွားတယ်လို့ မြို့ခံတွေနဲ့ ရွှေဆိုင်ဘက်က ပြောပါတယ်။

ဘယ်သူဘယ်ဝါ မသိရသေးတဲ့ အမျိုးသားခုနစ်ဦး ကားနဲ့ရောက်လာပြီး လေးဦးက သေနတ်တွေနဲ့အတူ ဆိုင်ထဲဝင်ရောက်ကာ ရွှေထည်တွေယူသွားတာလို့ ဆယ်သန်းဆိုင် တာဝန်ရှိသူတစ်ဦးက RFA ကို ပြောပါတယ်။

“သူတို့လာတဲ့သူက ခုနစ်ယောက်ရှိမယ်။ ဆိုင်ထဲဝင်လာတာက လေးယောက်ပေါ့။ အဲထဲမှာ တစ်ယောက်က သေနတ်အရှည် ကိုင်ထားတယ်။ ဝန်ထမ်းတွေကို မလှုပ်နဲ့ဆိုပြီး ပစ္စည်းတွေထုတ်ခိုင်းတယ်။ ပြီးတော့ သူတို့ဘာသာ ပစ္စည်းတွေယူပြီးထွက်သွားတယ်။ ဘာမှမကြာဘူး ခဏပဲ”

အဲဒီရွှေဆိုင်ဟာ အခုနှစ်ထဲမှာတင် ဓားပြတိုက်ခံရတာ နှစ်ကြိမ်ရှိပြီဖြစ်ပြီး ပထမတစ်ကြိမ်ကလည်း ရွှေနှစ်ပိဿာလောက် ပါသွားတယ်လို့ ဆိုပါတယ်။

ဒီအပေါ်တုံ့ပြန်ချက်ရဖို့ စစ်ကောင်စီရဲ့ မန္တလေးတိုင်းပြောခွင့်ရှိသူ စီးပွားရေးဝန်ကြီး ဦးသိန်းဌေးကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုခြင်း မရှိပါဘူး။

မန္တလေးမြို့မှာ ရွှေဆိုင်နဲ့ဘဏ်တွေ မကြာခဏ ဓားပြတိုက်ခံနေရပေမဲ့ အခုအချိန်အထိ ကျူးလွန်သူတွေကို မမိဘူးလို့ မြို့ခံတွေက ပြောပါတယ်။