မလေးရှားနဲ့ မြန်မာ အကျဉ်းသား လဲလှယ်ဖို့ စီစဉ်

မလေးရှားနိုင်ငံ ကွာလာလမ်ပူမြို့တွင် ရဲလာခေါ် အရပ်သား လုံခြုံရေး တပ်ဖွဲ့ဝင်များက ညသန်းခေါင်ကျော် စစ်ဆင်ရေးဖြင့် တရားမဝင် နိုင်ငံခြား အလုပ်သမားများကို ဖမ်းဆီးထားသော မှတ်တမ်း ဓာတ်ပုံ ဖြစ်ပါသည်။ (Photo: AFP)

မလေးရှားနိုင်ငံက လူဝင်မှု ထိန်းသိမ်းရေး စခန်းတွေမှာ ထိန်းသိမ်းခံထားရသူ အရေအတွက်ကို လျှော့ချဖို့ အခုလို စီစဉ်တာ ဖြစ်ကြောင်း မြန်မာ နိုင်ငံခြားရေး ဒုတိယ ဝန်ကြီး ဦးမောင်မြင့်နဲ့ တွေ့ဆုံ အပြီးမှာ မလေးရှား ပြည်ထဲရေး ဝန်ကြီးက အခုလို ပြောကြားလိုက်တာပါ။

ဒါပေမယ့် မြန်မာနိုင်ငံမှာ မလေးရှား နိုင်ငံသား ဘယ်နှစ်ယောက် ဖမ်းဆီး ထိန်းသိမ်းခံထားရတယ် ဆိုတာတော့ မသိရှိတဲ့ အကြောင်း မလေးရှား ပြည်ထဲရေး ဝန်ကြီးက ပြောပါတယ်။

မလေးရှားနိုင်ငံက လူဝင်မှု ထိန်းသိမ်းရေး စခန်းတွေမှာ ထိန်းသိမ်းခံထားရတဲ့ မြန်မာနိုင်ငံသား တထောင် လောက်ရှိကြောင်း၊ အများစုဟာ ဆိုးဝါးတဲ့ ပြစ်မှု ကျူးလွန်သူတွေ မဟုတ်ကြောင်း၊ ဗီဇာ ရက်ကျော်လွန် နေထိုင်သူတွေနဲ့ တခြား လူဝင်မှု ဥပဒေ ချိုးဖေါက်သူတွေ ပါဝင်ကြောင်း မလေးရှား အရာရှိတွေက ပြောပါတယ်။