စစ်တပ်သတင်းပေး ငါးဦးကို ဖမ်းဆီးစစ်ဆေးနေတယ်လို့ ကရင်နီပြည်ရဲဌာန ထုတ်ပြန်

ကယားပြည်နယ်မှာ ပြီးခဲ့တဲ့ရက်ပိုင်း မသင်္ကာလို့ဖမ်းဆီးထားတဲ့ ဆယ်ဦးထဲက စစ်ကောင်စီသတင်းပေး ငါးဦးကို ဆက်လက်ဖမ်းဆီးစစ်ဆေးနေတယ်လို့ အာဏာဖီဆန်ရေး (CDM) ရဲ အယောက် ၃၀၀ ကျော်နဲ့ ဖွဲ့စည်းထားတဲ့ ကရင်နီပြည်ရဲဌာန (KSP) က စက်တင်ဘာလ ၃၀ ရက် ဒီကနေ့မှာ သတင်းထုတ်ပြန်ပါတယ်။

ကရင်နီပြည်ရဲဌာန (KSP) အနေနဲ့ သက်ဆိုင်ရာအဖွဲ့တွေနဲ့ ပူးပေါင်းပြီး ပြီးခဲ့တဲ့ရက်ပိုင်းက မသင်္ကာစရာ အမျိုးသား ကိုးဦးနဲ့ အမျိုးသမီး တစ်ဦးတို့ကို ခေါ်ယူစစ်ဆေးခဲ့ပြီး စစ်ကောင်စီ သတင်းပေးမဟုတ်တဲ့ ငါးဦးကိုတော့ မိသားစုထံ ပြန်လည်လွှဲပြောင်းပေးခဲ့တယ်လို့ ထုတ်ပြန်ချက်မှာ ပါရှိပါတယ်။

အဲဒီအထဲက အမျိုးသား လေးဦးနဲ့ အမျိုးသမီး တစ်ဦးကတော့ စစ်ကောင်စီအတွက် သတင်းပေးဒလန် လုပ်နေကြောင်း ခိုင်လုံတဲ့သက်သေ အထောက်အထားတွေ တွေ့ရတာကြောင့် လက်ရှိ ကရင်နီပြည် ရဲအချုပ်မှာ ဖမ်းဆီးထားပြီး လိုအပ်သလို ဆက်လက်အရေးယူ ဆောင်ရွက်သွားမယ်လို့ ဆိုပါတယ်။