အင်းတော်ကြီးဒေသမှာ တရားမဝင်ရွှေတူးတဲ့ စက်ယန္တရား ၃၀ ကျော်ဖမ်းမိ

"နယ်မြေထဲကိုရှင်းပြီးတော့ အင်းတော်ကြီးပတ်ဝန်းကျင် ပျက်စီးမှာစိုးလို့ဆိုပြီးတော့ အင်းတော်ကြီးဒေသကို ထိခိုက်တဲ့ အလုပ်တွေလုပ်နေလို့ ဆိုပြီးတော့ အင်းတော်ကြီးကို ထိခိုက်မှာစိုးလို့ သဘာဝပတ်ဝန်းကျင် ထိခိုက်စေတဲ့နေရာတွေအကုန်လုံးကို မလုပ်ခိုင်းဘဲနဲ့ ကန့်သတ်ထားရတာ။ ဒီဒေသတွေက ရွှေတူး တာတွေ ခိုးတူးတာတွေများတယ်။ လက်လှမ်းမီတဲ့နေရာဆိုရင်တော့ ကျနော်တို့က သတ္တုတွင်းဥပဒေ ၃၈ နဲ့ အရေးယူတယ်။ အဓိကတော့ တပ်တခုပဲခင်ဗျ။ ကျနော်တို့အဲဒီနေရာတွေက ရဲသွားဖို့ အခက်အခဲရှိတဲ့ နေရာတွေများတယ်ဗျ။ တရားစွဲဖို့အတွက် သူတို့က ကျနော်တို့ကို ဆက်ပြီးတော့ လုပ်ပါလို့ လွှဲပေးရင်တော့ လုပ်မှာပါဗျ"

အစိုးရတပ်မတော် ခလရ ၂၅၆ နဲ့ ခမရ ၅၂၁ တပ်တွေက ဇူလိုင် ၂၀ နဲ့ ၂၁ ရက်နေ့တွေမှာ မိုင်းနောင် နဲ့ မမုံကိုင်ကျေးရွာတဝိုက်ကို နယ်မြေရှင်လင်းချိန်မှာ ဘက်ဟိုးယန္တရားအစီး ၃၀ ကျော် နဲ့ ရွှေတူးရာမှာ အသုံးပြုတဲ့ ဆက်စပ်ပစ္စည်းတွေကို ဖမ်းဆီးနိုင်ခဲ့တာဖြစ်ပါတယ်။

အလားတူ ဖားကန့်မြို့နယ် ကာမိုင်းဒေသမှာလည်း ဘက်ဟိုးယန္တရား ၁၀ စီးကျော်ကို အရင်က ဖမ်းဆီးထားမိတာရှိသေးကြောင်း ရဲမှူးကြီးက ဆိုပါတယ်။

အခုလိုဖမ်းဆီးရမိတဲ့အထဲမှာ တရားဝင်လိုင်စင်ဆောင်ထားသူတွေနဲ့ တရားမဝင်အသုံးပြုနေသူတွေကို စိစစ်ပြီး ဥပဒေအတိုင်းဆောင်ရွက်ဖို့လိုကြောင်း မိုးညှင်းမြို့နယ်ရဲ့ ပြည်နယ်လွှတ်တော် ကိုယ်စားလှယ် ဦးကျော်ကျော်ဝင်း က ပြောပါတယ်။

အင်းတော်ကြီးဒေသက မိုင်းနောင်၊ မမုံကိုင်၊ နန့်ပတဲ၊ နန့်မီးလောင် စတဲ့ရွာတွေအနီးက တောတောင် တွေထဲမှာ စက်ယန္တရားတွေအသုံးပြုပြီး တရားမဝင်ရွှေတူးဖော်လို့ အဲဒီကထွက်လာတဲ့ နှုန်းအနည် အနှစ် စွန့်ပစ်မြေစာတွေဟာ ချောင်းတွေကနေတဆင့်စီးဝင်တာကြောင့် အင်းတော်ကြီးကန် တိမ်ကောလာတာဖြစ်ပါတယ်။