FEC လက်မှတ်များ ရုပ်သိမ်းတော့မည်

ဒါနဲ့ ပတ်သက်ပြီး အဲဒီ သတင်းစာရှင်းလင်းပွဲ တက်ရောက်ခဲ့သူတဦးက RFA ကို အခုလို ပြောပြပါတယ်။

“အဓိကကတော့ နိုင်ငံခြားငွေ အမေရိကန်ဒေါ်လာနဲ့ မြန်မာငွေကို သူတို့ နှုန်းတခု သတ်မှတ်ပြီးသွားတဲ့ အခါကျရင် FEC ကို အပြီး ရုတ်သွားလိမ့်မယ်။ ဒီမှာ နိုင်ငံခြားငွေ တရားဝင် ကိုင်ဆောင်ခွင့်လည်း ရသွားလိမ့်မယ်။ ကာလတခုမှာ သူတို့ ဆွေးနွေးညှိနှိုင်းပြီး ရုတ်မယ်လို့ ပြောတာ”

FEC ငွေကြေးကို ပြန်လည်ရုပ်သိမ်းရာမှာ လက်ဝယ်ရှိသူတွေ နစ်နာမှု မရှိရအောင် တရားဝင် သတ်မှတ်ထားတဲ့ ပေါက်ဈေးနဲ့ လဲလှယ်ပေးမယ်၊ ဒါမှမဟုတ် အမေရိကန်ဒေါ်လာနဲ့ လဲပေးမယ်လို့ ဗဟိုဘဏ်ဥက္ကဋ္ဌ ဦးသန်းငြိမ်းက သတင်းထောက်တွေကို ပြောပါတယ်။

မြန်မာအစိုးရဟာ တရုတ်နိုင်ငံကို နမူနာယူပြီး FEC လက်မှတ်တွေကို ၁၉၉၃ ခုနှစ်မှာ စတင် ထုတ်ဝေသုံးစွဲခဲ့ပြီး နိုင်ငံခြားဒေါ်လာငွေ သုံးရတဲ့ ပြည်တွင်းလုပ်ငန်းတွေမှာ FEC ကိုပဲ အသုံးပြုစေခဲ့ပါတယ်။