စစ်ကောင်စီတိုက်ခိုက်မှုကြောင့် နောင်ချိုမြို့နယ်က အမျိုးသမီးတစ်ဦး ထိခိုက်ဒဏ်ရာရ

ရှမ်းပြည်နယ်(မြောက်ပိုင်း) နောင်ချိုမြို့နယ်က သုံးဆယ်ရွာကို စစ်ကောင်စီတပ်က လက်နက်ကြီးနဲ့ ပစ်ခတ်တိုက်ခိုက်တာကြောင့် အမျိုးသမီး တစ်ဦးထိခိုက်ဒဏ်ရာရပြီး နေအိမ်နှစ်လုံးထိခိုက်ပျက်စီးခဲ့ကြောင်း တအာင်းအမျိုးသားလွတ်မြောက်ရေးတပ်မတော် (TNLA) က ဧပြီ ၂၉ ရက်နေ့မှာ သတင်းထုတ်ပြန်ပါတယ်။

ထိခိုက်ဒဏ်ရာရသူဟာ အသက် ၆၀ အရွယ် အမျိုးသမီးဖြစ်ပြီး မျက်နှာနဲ့လက်မှာ ထိမှန်ဒဏ်ရာရခဲ့တာလို့ TNLA က ပြောပါတယ်။

အုမ္မတီးနဲ့ တန်ဘိုရွာမှာ တပ်စွဲထားတဲ့ စစ်ကောင်စီတပ်က သုံးဆယ်ကျေးရွာကို လက်နက်ကြီးနဲ့ ဧပြီ ၂၇ ရက်နေ့က သုံးကြိမ်နဲ့ ဧပြီ ၂၈ ရက်နေ့က သုံးကြိမ် ပစ်ခတ်တိုက်ခိုက်ခဲ့ရာမှာ ထိခိုက်ခဲ့တာဖြစ်ပါတယ်။

နောင်ချိုမြို့နယ်မှာ တိုက်ပွဲဖြစ်တာမရှိဘဲ လေယာဥ်နဲ့ ပစ်ခတ်တိုက်ခိုက်တာ၊ လက်နက်ကြီး ပစ်ခတ်တာတွေလုပ်နေတာဟာ စစ်ကောင်စီရဲ့ လူ့အခွင့်အရေးချိုးဖောက်မှုတွေဖြစ်ကြောင်း TNLA က စွပ်စွဲထားပါတယ်။

ပြီးခဲ့တဲ့ ဧပြီလ ၁၉ ရက်နေ့နဲ့ ၂၀ ရက်နေ့ကလည်း စစ်ကောင်စီတပ်ဟာ မိုးမိတ်မြို့နယ် ရေပုံးရွာကို ဂျက်ဖိုက်တာ လေယာဥ်နဲ့ လေးကြိမ် လာရောက်ပစ်ခတ်တိုက်ခိုက်ခဲ့တယ်လို့ TNLA ထုတ်ပြန်ချက်မှာ ပြောထားပါတယ်။

TNLA ထုတ်ပြန်ပြောဆိုချက်နဲ့ ပတ်သက်ပြီး စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကို RFA က မေးမြန်းဖို့ ဖုန်းဆက်ခဲ့ပေမဲ့ လက်ခံဖြေဆိုတာမရှိပါဘူး။