ကုလအတွင်းရေးမှူးချုပ်၏ အာရှခရီးစဉ်မှာ မြန်မာ့အရေး အလေးပေးမည်

အဲဒီနောက် ဗီယက်နမ် နိုင်ငံမှာ ကျင်းပမဲ့ ကုလသမဂ္ဂနဲ့ အာဆီယံ ထိပ်သီး အစည်းအဝေးကို တက်ရောက်မှာပါ။

မစ္စတာဘန်ကီးမွန်းရဲ့ အာရှခရီးစဉ်မှာ မြန်မာ့အရေးကိစ္စကို အလေးပေး ဆွေးနွေးသွားမှာ ဖြစ်တယ်လို့ ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရအမျိုးသမီး Soung-Ah Choi က ပြောပါတယ်။

အတွင်းရေးမှူးချုပ်အနေနဲ့ မြန်မာ့အိမ်နီးချင်းနိုင်ငံတွေဆီ ရောက်ရှိနေတဲ့အချိန်မှာ ကုလသမဂ္ဂက တိုက်တွန်းထားတဲ့ အချက်တွေကို မြန်မာစစ်အစိုးရဖက်က လိုက်နာ အကောင်အထည်ဖော်တာ မတွေ့ရသေးတာနဲ့ ပတ်သက်လို့ ဒေသတွင်းအစိုးရတွေနဲ့ ဆွေးနွေးဖို့ ရှိတယ်လို့ ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရအမျိုးသမီးက ပြောသွားပါတယ်။

နိုဝင်ဘာ ၇ ရက် ရွေးကောက်ပွဲ မကျင်းပခင် မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံး လွှတ်ပေးဖို့ အာဆီယံနိုင်ငံတွေအနေနဲ့ စစ်အစိုးရကို ဝိုင်းပြီးဖိအားပေးဖို့ မစ္စတာဘန်ကီမွန်းက တောင်းဆိုထားပါတယ်။

သူရဲ့ထိုင်းနိုင်ငံခရီးစဉ်မှာ မြန်မာ့အရေး လှုပ်ရှားသူတွေနဲ့ တွေ့ဆုံဖို့ ရှိတယ်လို့ သတင်းတွေ ထွက်ပေါ်နေပေမဲ့ ကုလသမဂ္ဂ အတွင်းရေးမှူးချုပ်ရုံးက အတည်ပြုပြောဆိုခြင်း မရှိပါဘူး။

ကုလသမဂ္ဂ အတွင်းရေးမှူးချုပ်ဟာ ထိုင်းကနေ ကမ္ဘောဒီယား၊ အဲဒီကမှ အောက်တိုဘာလ ၂၈ ရက် ဗီယက်နမ်နိုင်ငံမှာ ကျင်းပမဲ့ အာဆီယံ ထိပ်သီးညီလာခံကို တက်ရောက်မှာပါ။ အဲဒီနောက် တရုတ်နိုင်ငံကို အောက်တိုဘာလ ၃၀ ရက်မှာ ရောက်ရှိမှာ ဖြစ်ပါတယ်။