Amérika tashqiy ishlar ministiri özbékistanning bixeterlik jehettiki hemkarliqini medhiyiligen

Amérika tashqiy ishlar ministiri marko rubiyo (Marco Rubio) charshenbe küni özbékistanning tashqiy ishlar ministiri bextiyar sa'idow bilen washin'gtonda körüshüp, özbékistanning amérika bilen bixeterlik, meblegh sélish we bashqa jehetlerdiki hemkarliqini medhiyiligen.

Amérika tashqiy ishlar ministirliqining bayanatchisi temmi brus (Tammy Bruce) ning bildürüshiche, amérika tashqiy ishlar ministiri rubiyo bilen özbékistan tashqiy ishlar ministiri sa'idow körüshkinide, rubiyo amérika hökümitining özbékistanning musteqilliqi, igilik hoquqi we térritoriye pütünlükini dawamliq qollaydighanliqini bildürgen.

Amérika tashqiy ishlar ministirliqining bayanatchisi brus bu qétimqi körüshüshte, tashqiy ishlar ministir rubiyoning özbékistanning da'ishni yoqutush xelq'araliq birlikining toluq ezasi bolup kirgenlikini qarshi alghanliqi, shundaqla özbékistanning teshebbuskarliq bilen özining amérikagha qanunsiz kirgen wetendashlirini amérikadin élip ketkenlikige rehmet éytqanliqini bildürdi.

Tashqiy ishlar ministir rubiyo özining twittér (X) hésabida bu körüshüsh toghrisidiki yazmisida özbékistanning tashqiy ishlar ministirini medhiyilep, sa'idowning “Qanunsiz köchmenlerning kirishini chekleshte we térrorizmgha qarshi turushtiki bir küchlük shérikimiz” dégen.

Rubiyo yazmisining dawamida yene, “Biz amérikaning ronaq tépishi we xewpsizlikini birinchi orun'gha dawamliq qoyushimizda bu xil shériklik munasiwet nahayiti muhim orunda turidu. Bizning ikki dölet arisida meblegh sélish, halqiliq minérallar we bashqa sahelerde hemkarlishish jehette aldimizda zor yoshurun küch bar” dégen.

Amérika tashqiy ishlar ministirliqining bayanatchisi brusning bildürüshiche, bu ikki tashqiy ishlar ministirliri yene yadro énérgiye téxnikisini zamaniwilashturush mesilisi üstide toxtalghan, shundaqla ikkila terepning istratégiyelik sana'etlerde iqtisadiy hemkarlishish pursetlirini köpeytishning muhimliqini otturigha qoyghan.