ཡུ་གུར་བས་ཕྱི་བསྐྱོད་ལག་འཁྱེར་ཞུ་བར་ཁྲག་གི་མཚོན་རྟགས་དགོས།

རྒྱ་ནག་གཞུང་ནས་ཡུ་གུར་མི་རིགས་ཚོར་ཕྱི་བསྐྱོད་ལག་འཁྱེར་ཞུ་རྒྱུར་རང་ཉིད་ཀྱི་མཛུབ་རྗེས་དང་། སྐད་ཀྱི་སྒྲ་གདངས་། ཟུངས་ཁྲག་སོགས་མཚོན་རྟགས་བཅས་སྤྲོད་དགོས་རྒྱུའི་དོ་དམ་དུ་གཏོང་རྒྱུ་ཡིན་འདུག
དེ་ཡང་རྒྱ་ནག་གཞུང་འབྲེལ་གྱི་གསར་ལམ་ཁག་ནང་། ཤིན་ཅང་ཁུལ་གནས་སྡོད་ཡུ་གུར་མི་རིགས་ཚོས་ཕྱི་བསྐྱོད་ལག་ཁྱེར་བཟོ་དགོས་རིགས་ནས་དེ་སྔ་དང་མི་འདྲ་བར་ཕྱི་ཟླ་དྲུག་པའི་ཚེས་གཅིག་ནས་བཟུང་། དོ་བདག་རང་ཉིད་སུ་ཡིན་མིན་ངོ་རྟགས་ཆོད་རྒྱུའི་DNA་ཞེས་པའི་ཁྲག་གི་མཚོན་རྟགས་དང་། དེ་བཞིན་མཛུབ་མོའི་པར་རྗེས། སྐད་ཀྱི་སྒྲ་གདངས་སོགས་ཆ་ཚང་བ་ཞིག་འབྲེལ་ཡོད་ལས་ཁུངས་སུ་འབུལ་དགོས་ཀྱི་ཡོད་འདུག ད་རེས་གཞུང་གི་སྲིད་བྱུས་གསར་པ་གསལ་བསྒྲགས་བྱས་པ་འདི་བརྒྱུད་ནས་ད་ལྟ་ཡུ་གུར་མི་རིགས་ཚོས་མི་རིགས་དབྱེ་འབྱེད་བྱེད་ཀྱི་ཡོད་པའི་དཀའ་ངལ་དང་སྐྱོན་བརྗོད་བྱེད་བཞིན་པ་དེར་ད་དུང་དཀའ་ངལ་འཕར་མ་ཞིག་ཆགས་རྒྱུའི་ཉེན་ཁ་ཡོད་འདུག་ལ་དེས་ཁོང་ཚོིའི་ལག་ཁྱེར་ཡོད་བཞིན་པ་དེ་དག་དུས་འགྱངས་ཞུ་རྒྱུར་ཡང་རྙོག་དྲ་ཆེ་རུ་འགྲོ་རྒྱུ་ཡིན་འདུག
སྤྱིར་བཏང་རྒྱ་ནག་གཞུང་ནས་ཤིན་ཅང་ཞེས་འབོད་པའི་ཁ་ཆེའི་ཡུ་གུར་མི་རིགས་ཚོར་དམ་བསྒྲགས་ཆེན་པོ་ཡོད་བཞིན་པ་དེར་ཁོང་ཚོས་ཡང་སེ་སྐྱོན་བརྗོད་དང་། ངོ་རྒོལ་གྱི་ལས་འགུལ་སྤེལ་བཞིན་ཡོད་པ་རེད། འོན་ཀྱང་རྒྱ་ནག་གཞུང་ནས་ཁོང་ཚོས་ཁ་ཆེའི་ལྟ་བ་འཁྲེགས་པོར་འཛིན་མཁན་ཚོས་ཟིང་ཆ་སློང་གི་ཡོད་པ་དང་། དེའི་ཐོག་ཕྱིའི་གནོན་ཤུགས་ཡོད་ལུགས་བཤད་ནས་དམ་བསྒྲགས་ཀྱི་སྲིད་བྱུས་འཛིན་གྱི་ཡོད་པ་རེད།

གསར་འགོད་པ་རིག་འཛིན་ཆོས་སྒྲོན།