འབྱོར་ལྡན་རྒྱལ་ཁབ་ཚོས་ནད་ཡམས་འགོག་ཁབ་གསོག་ཉར་བྱེད་བཞིན་པར་རྒྱལ་ཚོགས་ནང་སྐྱོན་བརྗོད་བྱས་འདུག

དེ་ཡང་བདུན་ཕྲག་འདིའི་ནང་ཨ་རིའི་ནང་ཚོགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐོག་ཚོགས་བཅར་ཞུས་པའི་འཛམ་གླིང་ནང་ཡར་རྒྱས་འགྲོ་བཞིན་པ་དང་འབྱོར་ལྡན་རྒྱལ་ཁབ་ཚོའི་དབུ་ཁྲིད་ཚོས། དེང་སྐབས་མུ་མཐུད་དུ་ཀོ་ཝིཌ་༡༩་ཏོག་དབྱིབས་ནད་ཡམས་རྒྱལ་ཁབ་མང་པོའི་ནང་ཁྱབ་གདལ་འགྲོ་བཞིན་ཡོད་ཀྱང་འབྱོར་ལྡན་རྒྱལ་ཁབ་ཚོས་ཏོག་དབྱིབས་ནད་ཡམས་འགོག་ཁབ་གསོག་ཉར་བྱས་རྐྱེན་རྣམ་པ་འགྱུར་བའི་ཏོག་དབྱིབས་ནད་ཡམས་གསར་པ་ཤུགས་ཆེར་ཁྱབ་གདལ་འགྲོ་བཞིན་པ་དང་། རྒྱལ་ཁབ་སྐྱོ་བོ་ཁག་གི་ནང་འགོག་ཁབ་མི་འདེང་བའི་དཀའ་ངལ་ཡོད་པ་སོགས་ཀྱི་སྐྱོན་བརྗོད་བྱས་འདུག
ཧྥེ་ལི་པེན་སུ་(Philippines)་ཡི་སྲིད་འཛིན་(Rodrigo Duterte)་ཡིས་རྒྱལ་ཚོགས་ཀྱི་ལྷན་ཚོགས་ཐོག འབྱོར་ལྡན་རྒྱལ་ཁབ་ཚོས་འགྲོ་བ་མིའི་ཚེ་སྲོག་སྐྱོབ་བྱེད་ནད་ཡམས་སྔོན་འགོག་སྨན་ཁབ་གསོག་ཉར་བྱེད་བཞིན་པ་དང་། རྒྱལ་ཁབ་སྐྱོ་བོ་ཚོས་སྔོན་འགོག་སྨན་ཁབ་རག་རྒྱུར་ངང་སྒུག་བྱས་ནས་བསྡད་ཡོད། ད་ཆ་འཛམ་གླིང་གི་ཡར་རྒྱས་འགྲོ་བཞིན་པའི་རྒྱལ་ཁབ་ཁག་གིས་ཏོག་དབྱིབས་ནད་ཡམས་ཀྱི་འགོག་ཁབ་ཐུན་ཕྱེད་ཀ་རྒྱག་ཐུབ་པའི་བསམ་བློ་གཏོང་བཞིན་པའི་སྐབས་འདིར། འབྱོར་ལྡན་རྒྱལ་ཁབ་ཚོས་ད་ལྟ་ཏོག་དབྱིབས་སྔོན་འགོག་གི་སྨན་ཁབ་འཕར་མ་རིམ་པ་གསུམ་པ་དེ་རྒྱག་རྒྱུའི་གྲ་སྒྲིག་བྱེད་བཞིན་པ་དེ་ནི་ཡིད་ཆེས་དཀའ་བ་དང་། རང་འདོད་ཆེ་བའི་བྱ་སྤྱོད་དེ་རིགས་རྒྱུ་མཚན་མི་ལྡན་པ་དང་སྤྱོད་བཟང་དང་མི་མཐུན་པས་ངེས་པར་དུ་སྐྱོན་བརྗོད་བྱ་དགོས་པའི་སྐོར་གསུངས་ཡོད་པ་རེད།
འཛམ་གླིང་གི་མི་འབོར་བརྒྱ་ཆ་༣༥་ལ་ཉུང་མཐར་ཏོག་དབྱིབས་ནད་ཡམས་འགོག་ཁབ་སྨན་ཐུན་དང་པོ་རག་པ་རྣམས་འབྱོར་ལྡན་རྒྱལ་ཁབ་ནས་ཡིན་ཞིང་། ཉུང་མཐར་བརྒྱ་ཆ་༢༨་ནི་ཡོ་རོབ་དང་། བྱང་ཨ་མི་རི་ཀ་ནས་ཡིན་པའི་སྐོར་རོའུ་ཀྲར་གསར་ལས་ཁང་གིས་གནས་ཚུལ་སྤེལ་འདུག་ལ། གནས་ཚུལ་ནང་། ཏོག་དབྱིབས་ནད་ཡམས་སྔོན་འགོག་གི་སྨན་ཁབ་(Hati)་དང་། (Congo)་སྤྱི་མཐུན་རྒྱལ་ཁབ་ལྟ་བུའི་ནང་མི་འབོར་གྱི་བརྒྱ་ཆ་གཅིག་ལས་ཉུང་བར་མ་གཏོགས་རག་མེད་པ་དང་། དེ་མིན་ཨ་ཧྥེ་རི་ཀའི་རྒྱལ་ཁབ་ཁག་ནང་མི་འབོར་ས་ཡ་༩༠༠་ཙམ་ལ་སྔོན་འགོག་གི་སྨན་ཁབ་དགོས་གལ་ཆེ་བའི་གནས་སུ་ཡོད་པ་རེད་འདུག

གསར་འགོད་པ། གཡུ་སྒྲོན།
རྩོམ་སྒྲིག་པ། འབེན་པ་སྟོབས་རྒྱལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།