རྒྱ་གཞུང་ནས་ཡུ་གུར་མི་རིཌ་ལ་དྲག་གནོན་བྱས་པར་སྐྱོན་བརྗོད།

༄༅༎རྒྱ་ནག་གཞུང་གིས་ཡུ་གུར་མི་རིགས་ཚོའི་ཐོག་དྲག་གནོན་བྱེད་བཞིན་པའི་གནས་སྟངས་ལ་ཀྲར་ཀིའི་གཞུང་ནས་སླར་ཡང་སྐྱོན་བརྗོད་བྱས་ཡོད་འདུག

རེས་གཟའ་ཉི་མའི་ཉིན་རྒྱ་ནག་གི་ནུབ་རྒྱུད་ཤིན་ཅང་མངའ་ཁུལ་དུ་རྒྱ་ཧན་མི་རིགས་དང་ཡུ་གུར་མི་རིགས་ཚོའི་དབར་འཁོན་འཛིན་བྱུང་བའི་སྐབས་རྒྱ་མིའི་ཉེན་རྟོག་དམག་མིས་ཁྲོམ་གཞུང་ནང་ཡུ་གུར་མི་རིགས་ཚོའི་ཐོག་དྲག་ཤུགས་སྤེལ་བའི་གནད་དོན་ལ་དེ་རིང་ཀྲར་ཀིའི་གཞུང་ནས་སྐྱོན་བརྗོད་བྱས་ཡོད་འདུག

དེ་ཡང་ཀྲར་ཀིའི་སྲིད་བློན་གཞོན་པ་སྦུ་ལེན་དྲ་ཨ་རིན་ཀི་མཆོག་གིས་རྒྱ་ནག་གཞུང་ནས་དྲག་གནོན་འོག་རྒྱལ་ས་ཨུ་རུམ་ཆིའི་ནང་བདེ་འཇགས་མེད་པ་བཟོས་པ་དང་མི་གྲངས་བརྒྱ་དང་ལྔ་བཅུ་ང་དྲུག་ཙམ་རྐྱེན་ལམ་དུ་ཕྱིན་པའི་གནས་ཚུལ་དེ་དག་གསང་ཐབས་བྱེད་རྒྱུར་དཔལ་འབྱོར་གྱི་སྟོབས་ཤུགས་བརྒྱུད་ནས་འཛམ་གླིང་ལ་མགོ་བསྐོར་བསླུ་འཁྲིད་བྱེད་ཀྱི་ཡོད་ལུགས་སྐྱོན་བརྗོད་གནང་འདུག

ཁ་ས་ཀྲར་ཀིའི་སྲིད་བློན་མཆོག་ནས་ཀྱང་རྒྱ་ནག་གཞུང་ནས་ཡུ་གུར་མི་རིགས་ཚོའི་ཐོག་དྲག་གནོན་བྱེད་བཞིན་པའི་གནད་དོན་དེ་དག་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྲུང་སྐྱོབ་ལྷན་ཚོགས་ཀྱི་ནང་གླེང་སློང་གནང་གི་ཡིན་ཞེས་རྒྱ་ནག་གཞུང་ནས་ཡུ་གུར་གྲངས་ཉུང་མི་རིགས་ཚོའི་ཐོག་སྟངས་འཛིན་བྱེད་ཕྱོགས་ལ་སྐྱོན་བརྗོད་ཤུགས་ཆེ་གནང་ཡོད་པ་རེད།

སྤྱིར་བཏང་རྒྱ་ནག་གཞུང་ནས་འབོད་པའི་ཤིན་ཅང་ཞེས་པའི་མངའ་ཁུལ་འདིའི་ནང་གི་ས་སྐྱེས་རྡོ་སྐྱེས་ཀྱི་མི་རིགས་ཚོ་ནི་ཏུར་ཀིའི་མི་རིགས་ཡིན་པ་དང་དེ་སྔ་ཤར་ཏུར་ཀི་སི་ཐན་ཞེས་ཟེར་གྱི་ཡོད་པ་ཞིག་ཡིན་པ་རེད།