བོད་ཀྱི་གཞོན་ནུ་ལྷན་ཚོགས་ཀྱི་ངོ་རྒོལ་ལས་འགུལ་སྐོར།

༄༅༎རྒྱ་གར་གྱི་རྒྱལ་ས་ལྡི་ལིའི་ནང་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་ རྒྱ་ནག་གཞུང་ལ་ངོ་རྒོལ་གྱི་ལས་འགུལ་མུ་འཐུད་སྤེལ་བཞིན་ཡོད་པ་དང་ ལས་འགུལ་འདི་ནི་ཕྱི་ཟླ་བདུན་པའི་ཟླ་མཇུག་ནས་འགོ་བཙུགས་པའི་ མི་དམངས་མདུན་བསྐྱོད་ཆེན་མོའི་ལས་འགུལ་ཞེས་པ་དེའི་ཆ་ཤས་ཤིག་ཡིན་ཞིང་ དེ་རིང་གཟའ་མིག་དམར་ཉིན་བོད་མི་གསུམ་བརྒྱ་སྐོར་ཞིག་གིས་ རྒྱ་གར་གྱི་རྒྱལ་ས་ལྡི་ལིའི་ས་གནས་ རམ་ལི་ལ་ཞེས་པ་ནས་ཇན་ཏར་མན་ཏར་བར་ངོ་རྒོལ་གྱི་འབོད་ཚིག་སྒྲོགས་པ་དང་ ལག་ཏུ་བོད་རང་བཙན་གྱི་འཕྲེད་དར་སོགས་འཁྱེར་སྟེ་གོམ་བགྲོད་ཀྱི་ལས་འགུལ་ཞིག་སྤེལ་འདུག མི་དམངས་མདུན་བསྐྱོད་ཆེན་པོ་ཞེས་པའི་ལས་འགུལ་འདི་ རྒྱ་ནག་ཏུ་ཨོ་ལིམ་པིག་གི་རྩེད་འགྲན་མཇུག་མ་བསྒྲིལ་བར་སྤེལ་རྒྱུ་ཡིན་པ་རེད་

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་ རྒྱ་ནག་གིས་ཨོ་ལིམ་པིག་འདི་དགའ་སྤྲོའི་ངང་ཚུགས་བཞིན་པ་དུས་མཚུངས་ བོད་ནང་བོད་མི་སྟོང་ཕྲག་མང་པོ་དཀའ་སྡུག་མྱོང་བཞིན་ཡོད་པར་མ་ཟད་ བོད་མིའི་འཐབ་རྩོད་འདི་ནི་རྒྱལ་ཁབ་ཅིག་གི་འཐབ་རྩོད་ཡིན་པ་དང་ རྒྱལ་ཁབ་དེ་དང་དེའི་ནང་གི་མི་རིགས་གཉིས་ཀ་རྩ་མེད་དུ་འགྲོ་རྒྱུའི་ཉེན་ཁའི་མཚམས་སུ་སླེབས་པའི་ཛ་དྲག་གི་གནས་སྟངས་དེ་མདུན་དུ་འདོན་ཐབས་བྱས་སྟེ་ ཇི་སྲིད་དུ་འཛམ་གླིང་འདིའིའ་ནང་བོད་མི་གཅིག་ལས་མ་ལྷག་པའི་དུས་ཚོད་ཅིག་སླེབས་ཀྱང་ བོད་མི་དེས་བོད་སྐྱོབ་རྒྱུར་འཐབ་རྩོད་བྱེད་ཀྱི་རེད་ཅེས་གསུངས་འདུག

ལྡི་ལིའི་ནང་བོད་མི་དྲུག་གིས་བཟའ་བཏུང་མི་བྱེད་པའི་ཟས་བཅད་ངོ་རྒོལ་གནང་བཞིན་ཡོད་པ་དང་ དེ་རིང་ཉི་མ་བཞི་པ་ཡིན་ཞིང་ ལས་འགུལ་འདིའི་ནང་ཞུགས་མཁན་ལོ་ན་བཅུ་དགུར་སོན་པའི་ ཐུབ་བསྟན་ཚེ་དབང་ལགས་ཀྱིས་ ངས་དཀྲེས་སྐོམས་དང་ན་ཟུག་ལ་སོགས་པ་གང་ཡང་ཚོར་ཐུབ་ཀྱི་མིན་འདུག འོན་ཀྱང་རང་ཉིད་ཀྱི་ཕ་ཡུལ་སྐྱོབས་ཐབས་དང་ བོད་ནང་གི་བོད་མི་ཚོར་གདུང་སེམས་མཉམ་བསྐྱེད་མཚོན་ཆེད་རང་ཉིད་ལས་འགུལ་འདིའི་ནང་བློས་གཏོང་གྱིས་ཞུགས་པ་ཡིན་ཞེས་གསུངས་འདུག།