འབུམ་རམས་པ་རྒྱལ་ལོ་ལགས་ཀྱིས་དབྱིན་ཡུལ་གྲོས་ཚོགས་ཀྱི་འཐུས་མི་ཚོར་བོད་ནང་གི་གནས་སྟངས་གླེང་འདུག

བོད་ནང་དགེ་རྒན་ཆེན་མོ་གནང་མྱོང་བ་དང་། བོད་ཀྱི་སློབ་གསོ་བ་དང་སྤྱི་ཚོགས་རིག་པའི་ཆེད་ལས་འབུམ་རམས་པ་རྒྱལ་ལོ་ལགས་ཕྱི་ཟླ་༣ ཚེས་༢༨ནས་དབྱིན་ཡུལ་ནང་ཕེབས་ཏེ་བོད་དོན་གཏམ་བཤད་གནང་བཞིན་པ་དང་། ལྷག་པར་དུ་ཁོང་དབྱིན་ཡུལ་གྲོས་ཚོགས་ནང་སྣེ་ལེན་གནང་སྐབས། ཁོང་གིས་དེང་སང་རྒྱ་ནག་གཞུང་གིས་བོད་ནང་གི་བོད་ཕྲུག་ཚོ་སོ་སོའི་ཕ་མ་དང་ཁ་ཐག་རིང་བའི་རྒྱ་ནག་གི་སློབ་གསོ་སྤེལ་སའི་གཏན་འཇགས་སློབ་གྲྭའི་ནང་བཅུག་དང་འཇུག་བཞིན་ཡོད་པའི་གནད་དོན་སྐོར་ལ་ངོ་སྤྲོད་ཀྱི་གཏམ་བཤད་གནང་ཡོད་འདུག་ལ། དེར་གྲོས་ཚོགས་འཐུས་མི་མང་པོས་ཁོང་ལ་དགའ་བསུའི་རྣམ་པ་ཤུགས་ཆེན་བསྟན་པའི་ཁར། འཐུས་མི་དེ་དག་གིས་སོ་སོའི་སྤྱི་ཚོགས་དྲྭ་ལམ་(twitter)་སོགས་སུ་བོད་ཀྱི་གནད་དོན་ལ་རྒྱབ་སྐྱོར་དང་། བོད་ཕྲུག་མང་པོ་རྒྱ་ནག་གི་སློབ་གསོ་མྱོང་སའི་གཏན་འཇགས་སློབ་གྲྭ་ཁག་ནང་འཇུག་བཞིན་པར་བློ་ཚབས་ཡོད་པའི་རྣམ་འགྱུར་བསྟན་འདུག
དབྱིན་ཡུལ་གྲོས་ཚོགས་ཀྱི་འཐུས་མི་(Sarah Champion)་ལགས་ཀྱིས་ཁོང་གི་(twitter)་དྲྭ་བར། འབུམ་རམས་པ་རྒྱལ་ལོ་ལགས་དང་མཇལ་འཕྲད་གནང་པའི་འདྲ་པར་དང་བཅས། དགེ་རྒན་ཆེན་མོ་རྒྱལ་ལོ་ལགས་ཀྱིས་བོད་ནང་གི་བོད་ཕྲུག་རྣམས་རྒྱ་ནག་གཞུང་གིས་བཙན་གྱིས་གཏན་འཇགས་སློབ་གྲྭའི་ནང་གཟའ་འཁོར་རེར་མཚན་ལྔ་དང་ཉིན་དྲུག་ལ་བཅུག་སྟེ་བསླབ་གཞི་ཁག་རྒྱ་ཡིག་ནང་སློབ་སྦྱོང་བྱེད་དུ་འཇུག་གི་ཡོད་པའི་གནས་ཚུལ་གོ་ཐོས་བྱུང་དུས་ཧང་སངས་བ་བྱུང་། ང་ཚོས་གནད་དོན་དེའི་ཐད་དོ་གལ་ཆེན་པོ་བརྩི་དགོས་ཀྱི་འདུག་ཅེས་བྲིས་འདུག

I’m rarely lost for words, but hearing Dr Gyal Lo@jltib88 describe 4-6year old #Tibetan children being forced to go to boarding school 5 nights/6 days a week to learn Chinese floored me. We need to keep a spotlight on this #FreeTibet ⁦@ipacglobal⁩ pic.twitter.com/iUbopq7d30

— Sarah Champion (@SarahChampionMP) March 28, 2023

དབྱིན་ཡུལ་ནང་ཡོད་པའི་(Free Tibet)་ཞེས་བོད་རང་དབང་ཚོགས་པས་གནས་ཚུལ་སྤེལ་བའི་ནང་། ཉེ་ཆར་དབྱིན་ཡུལ་གྲོས་ཚོགས་ནང་རྒྱ་ནག་གི་བྱེད་བབ་སྐོར་བགྲོ་གླེང་བྱས་སྐབས། བོད་ཀྱི་སྐོར་ལ་གནས་ཚུལ་ཤུགས་ཆེན་གླེང་སློང་གནང་མཁན་དབྱིན་ཡུལ་གྲོས་ཚོགས་ཀྱི་ཆོས་དད་རང་དབང་ཚོགས་ཆུང་གི་ཚོགས་གཙོ་(Jim Shannon)་ལགས་གྱིས། བོད་ཀྱི་སློབ་གསོ་བ་རྒྱལ་ལོ་ལགས་དང་ཐུག་འཕྲད་ཀྱིས་རྒྱ་ནག་གཞུང་གིས་བཙན་བཟུང་བྱེད་བཞིན་པའི་བོད་ནང་གི་བོད་ཕྲུག་ཚོ་རྒྱ་ནག་གི་གཏན་འཇགས་སློབ་གྲྭར་འཇུག་བཞིན་པའི་གནད་དོན་དང་ཉེན་ཁའི་སྐོར་ཀྱི་གནས་ཚུལ་རྣམས་ཐད་ཀར་རྒྱུས་ལོན་བྱེད་རྒྱུ་བྱུང་ཞེས་བརྗོད་འདུག

We thank @timloughton MP, Co-Chair of the All Party Parliamentary Group for #Tibet, for joining us. Dr Gyal Lo briefed him on the network of Chinese #colonial boarding schools throughout Tibet, Tim has expressed deep concern and intends to raise the matter at the highest levels. pic.twitter.com/WdmbvbEooh

— Free Tibet (@freetibetorg) March 30, 2023

དེ་བཞིན་ཡང་ཡུན་རིང་བོད་དོན་རྒྱབ་སྐྱོར་གནང་མཁན་དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་(Kerry Mccarthy)་ལགས་ཀྱིས། རྒྱལ་ལོ་ལགས་དབྱིན་ཡུལ་གྲོས་ཚོགས་སུ་སྣེ་ལེན་སྐབས་མཇལ་འཕྲད་གནང་བ་དང་། གྲོས་ཚོགས་འཐུས་མི་(John Mann)་ལགས་ཀྱིས་གྲོས་ཚོགས་ནང་རྒྱལ་ལོ་ལགས་སུ་ཆེ་བསྟོད་ཞུས་ཏེ་ཁོང་གིས་བོད་དོན་ཐད་ལ་རྒྱབ་སྐྱོར་ཡོད་པའི་གཏམ་བཤད་གནང་ཡོད་འདུག
གནས་ཚུལ་ལྟར་ན། ད་རེས་དབྱིན་ཡུལ་གྲོས་ཚོགས་ནང་འབུམ་རམས་པ་རྒྱལ་ལོ་ལགས་སྣེ་ལེན་གནང་ནས་བོད་དང་འབྲེལ་བའི་བྱེད་སྒོ་སྤེལ་སྐབས། དབྱིན་ཡུལ་གྱི་གྲོས་ཚོགས་འཐུས་མི་(Chris Law)་དང་། (Rachel Hopkis) (Afzal Khan) (Wera Hobhouse)་སོགས་མཉམ་ཞུགས་གནང་ཡོད་པ་དང་། བོད་དང་འབྲེལ་བའི་བྱེད་སྒོ་དེ་ནི་དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་(Navendu Mishra)་ལགས་ཀྱིས་གོ་སྒྲིག་གནང་ཡོད་འདུག

གསར་འགོད་པ། གུ་རུ་ཆོས་སྐྱིད།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།