ཁེ་ཎ་ཌའི་གྲོས་ཚོགས་ཀྱི་ཚོགས་ཁང་ནང་དུ་བོད་ཀྱི་ཉིན་མོ་སྲུང་བརྩི་གནང་འདུག

འདི་ཚེས་༡༣ཉིན་ཁེ་ཎ་ཌའི་དབུས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་(Arif Virani)་ལགས་ཀྱི་དབུ་ཁྲིད་འོག གུ་ཡངས་ཆབ་སྲིད་ཚོགས་པའི་འཐུས་མི་སྐུ་ཞབས་(James Melony)་ལགས་དང་། རྙིང་ཞེན་ཆབ་སྲིད་ཚོགས་པའི་འཐུས་མི་སྐུ་ཞབས་(Garnett Genius)་ལགས། བོད་རིགས་གཞོན་སྐྱེས་ཁག་ཅིག་བཅས་ཀྱི་གོ་སྒྲིག་འོག་ཁེ་ཎ་ཌའི་གྲོས་ཚོགས་ཀྱི་ཚོགས་ཁང་ནང་དུ། ཨོན་ཏྲེ་རི་ཡོ་བོད་རིགས་སྤྱི་མཐུན་ཚོགས་པ། ཁེ་ཎ་ཌའི་བོད་དོན་ལྷན་ཚོགས། ཀྲོ་རོན་ཀྲོ་ས་གནས་གཞོན་ནུ་ལྷན་ཚོགས། ཨོན་ཌེ་རི་ཡོ་ས་གནས་བུད་མེད་ལྷན་ཚོགས། ཨོ་ཌ་ཝ་བོད་རིགས་སྤྱི་མཐུན་ཚོགས་པ་བཅས་ཀྱི་འཐུས་མི་ཁག་གཅིག་ལྷན་ཞུགས་གནང་ནས་བོད་ཀྱི་ཉིན་མོ་སྲུང་བརྩི་གནང་བ་ཨོན་ཏྲེ་རི་ཡོ་བོད་རིགས་སྤྱི་མཐུན་ཚོགས་པའི་ཆབ་སྲིད་འབྲེལ་མཐུད་པ་གཡུ་དྲུང་བསྟན་འཛིན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

སྐབས་དེར་ཁེ་ཎ་ཌའི་རྒྱལ་སའི་ཁུལ་དུ་གྲོས་ཚོགས་ཀྱི་འཐུས་མི་ཁག་ཅིག་དང་ལྷན་དུ་ཟབ་སྦྱོང་གནང་མཁན་བོད་མི་གཞོན་སྐྱེས་ཁག་ཅིག་གིས། ཟླ་བ་གཉིས་ལྷག་རིང་ཁེ་ན་ཌའི་གྲོས་ཚོགས་ཀྱི་འཐུས་མི་ཚོའི་ལས་དོན་གནང་ཕྱོགས་དང་། བོད་ཀྱི་རྩ་དོན་དང་འབྲེལ་བའི་པར་རིས་སོགས་འགྲེམས་སྟོན། བོད་ནང་གི་གནས་སྟངས་ཐད་མྱོང་ཚོར་བརྗེ་རེས། བོད་པའི་ཟས་རིགས་གསོལ་སྟོན། དེ་བཞིན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་ཅིག་གིས་བོད་དོན་དང་འབྲེལ་བའི་གཏམ་བཤད་གནང་བ། བོད་ནང་གི་ཛ་དྲག་གི་གནས་སྟངས་གླེང་སློང་སོགས་གནང་ཡོད་པ་ཁེ་ཎ་ཌའི་བོད་དོན་ལྷན་ཚོགས་ཀྱི་འགན་འཛིན་ཤེས་རབ་མཐར་ཕྱིན་ལགས་ཀྱིས་གསུངས་བྱུང་།
དེའི་ཐད་གྲོས་ཚོགས་འཐུས་མི་སྐུ་ཞབས་(Arif Virani)་ལགས་ཀྱི་ངོ་དེབ་སྟེང་། ད་རེས་བོད་ཀྱི་ཉིན་མོ་སྲུང་བརྩི་ལམ་ལྷོང་ཡག་པོ་བྱུང་། གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཚོའི་འོག་ཟབ་སྦྱོང་གནང་མཁན་རྣམ་པས་བོད་པའི་རིག་གཞུང་དང་རྒྱལ་རབས་བཅས་ལ་གོ་རྟོགས་སྤེལ་བར་ཐུགས་རྗེ་ཆེ་ཞེས་བྲིས་ཡོད་འདུག
དེ་བཞིན་འཐུས་མི་སྐུ་ཞབས་(Garnet Genius)་ལགས་ནས་ཀྱང་ཁོང་གི་ངོ་དེབ་སྟེང་། བོད་ཀྱི་ཉིན་མོར་ཆེ་མཐོང་དང་མཉམ། ལོ་སྔོན་མར་ཁོང་གིས་བོད་རྒྱ་ཞི་མོལ་ལ་རྒྱབ་སྐྱོར་གྱི་གྲོས་འཆར་ལ་རྒྱབ་སྐྱོར་ཐོབ་པ། དེ་མིན་བོད་དང་ཁེ་ན་ཌའི་བོད་མིའི་ཆེད་མུ་མཐུད་རྒྱབ་སྐྱོར་གནང་རྒྱུ་ཡིན་པ་བྲིས་འདུག

གསར་འགོད་པ། ཨྱོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།