༸གོང་ས་མཆོག་ཨ་རུ་ན་ཅཱལ་ཁུལ་དུ་ཆིབས་བསྒྱུར་གནང་གཏན།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ན་ཅཱལ་མངའ་ཁུལ་དུ་ཆིབས་བསྒྱུར་གནང་གཏན་འཁེལ་ཡོད་འདུག

བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྱང་ཤར་ཨ་རུ་ན་ཅཱལ་མངའ་སྡེའི་ནང་ཆིབས་བསྒྱུར་གནང་འཆར་ཡོད་པའི་སྐོར་ཕྱི་ཟླ་དགུ་པའི་ནང་ནས་གསར་འགྱུར་བརྒྱུད་ལམ་ཁག་ནང་ཐོན་པ་མ་ཟད་རྒྱ་ནག་གཞུང་ནས་དེར་སྐྱོན་བརྗོད་ཀྱང་ཞུས་ཡོད་རེད། ཡིན་ནའང་རྒྱ་གར་གཞུང་གི་འབྲེལ་ཡོད་རྣམ་པས་༸གོང་ས་ཏཱ་ལའི་བླ་མ་མཆོག་ནི་རྒྱ་གར་ནང་འདས་པའི་ལོ་ངོ་ལྔ་བཅུའི་རིང་སྐུ་མགྲོན་གྱི་ཚུལ་དུ་བཞུགས་ཡོད་པ་དང་ལྷག་པར་དུ་འཛམ་གླིང་ནང་གུས་བརྩིར་འོས་པའི་ཆོས་ཕྱོགས་ཀྱི་དབུ་འཁྲིད་ཅིག་ཀྱང་ཡིན་སྟབས་རྒྱ་གར་གྱི་ས་ཕྱོགས་གང་དུ་ཕེབས་ཀྱང་དགག་ཆ་ཡོད་མ་རེད་ཅེས་འགྲེལ་བརྗོད་གནང་ཡོད་པ་རེད།

གང་ལྟར་དེ་རིང་ཚེས་ཉི་ཤུ་ཉིན་ཨེ་ཨེཕ་པི་གསར་འགྱུར་ལས་ཁང་ལ་སྐུ་སྒེར་ཡིག་ཚང་ནས་གནས་ཚུལ་ངོ་སྤྲོད་གནང་བར་ལྟར་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་བཅུ་གཅིག་པའི་ཚེས་བརྒྱད་ཉིན་ཨ་རུ་ན་ཅཱལ་མངའ་སྡེའི་ནང་ཆིབས་བསྒྱུར་གནང་ནས་ཁུལ་དེར་བདུན་ཕྲག་གཅིག་ཙམ་རིང་བཞུགས་བཞག་གནང་རྒྱུ་དང་དད་ལྡན་མང་ཚོགས་ལ་ཆོས་འབྲེལ་གནང་རྒྱུ་དང་དེ་བཞིན་སྨན་ཁང་གསར་པ་ཞིག་དབུ་འབྱེད་གནང་རྒྱུ་བཅས་ཀྱི་མཛད་འཆར་ཡོད་འདུག

དེའི་གོང་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ཐེངས་གསུམ་ཙམ་ཆིབས་བསྒྱུར་གནང་མྱོང་ཡོད་པ་རེད།