རྒྱ་གར་གྱི་ཨ་རུ་ན་ཅལ་ཁུལ་གྱི་རི་བོ་མཐོན་པོ་ཞིག་ལ་༧རྒྱལ་མཆོག་སྐུ་ཕྲེང་དྲུག་པའི་མཚན་རི་བོ་ཚངས་དབྱངས་རྒྱ་མཚོ་ཞེས་མིང་བཏགས་འདུག

རྒྱ་གར་གྱི་ཨ་རུ་ན་ཅལ་ཁུལ་གྱི་རི་བོ་མཐོན་པོ་ཞིག་ལ་༧རྒྱལ་མཆོག་སྐུ་ཕྲེང་དྲུག་པའི་མཚན་རི་བོ་ཚངས་དབྱངས་རྒྱ་མཚོ་ཞེས་མིང་བཏགས་ཡོད་པ།

* གནས་ཚུལ་ཁ་སྣོན་བྱས་ཡོད།

འདིར་གནན་ན་དབྱིན་ཡིག་ནང་འདིའི་སྐོར་གྱི་གནས་ཚུལ་ཞིབ་ཕྲ་ཀློག་ཐུབ།

དེ་ཡང་རྒྱ་གར་གྱི་གསར་ལམ་ཁག་ཅིག་དང་ལྷག་པར་རྒྱ་གར་རྒྱལ་ཡོངས་རི་འཛེགས་དང་རྩེད་མོའི་བསྟི་གནས་ཁང་གི་རི་འཛེགས་པ། རྒྱ་གར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་བཅས་ཀྱིས་གནས་ཚུལ་སྤེལ་བ་ལྟར་ན། རྒྱ་གར་རྒྱལ་ཡོངས་རི་འཛེགས་དང་རྩེད་མོའི་བསྟི་གནས་ཁང་གི་རི་འཛེགས་(National Institute of Mountaineering & Sports Adventure)་བསྟི་གནས་ཁང་གི་རི་འཛེགས་པའི་རུ་ཁག་ཅིག་ཨ་རུ་ན་ཅལ་མངའ་སྡེའི་རྟ་དབང་ཁུལ་གྱི་(Gorichen Range)་ཞེས་པའི་ཕྱོགས་སུ་རྒྱ་མཚོ་ངོས་ནས་མཐོ་ཚད་ཧྥུ་ཊི་(Foot)་༢༠།༩༠༠ཙམ་དང་། ད་བར་མིང་གང་ཡང་འབོད་སྲོལ་མེད་པའི་གངས་རི་མཐོན་བོ་ཞིག་སྟེང་ལམ་ལྷོང་ལྡན་པའི་ངང་འཛེགས་ཐུབ་ཡོད་པ་དང་། ཁོང་ཚོས་རི་རྩེ་དེའི་མིང་ལ་རྒྱལ་མཆོག་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་དྲན་རྟེན་གྱི་ཚུལ་དུ་མཚན་གསོལ་པ་ཡིན་ཞེས་འགྲེལ་བརྗོད་བྱས་འདུག

This untamed peak has been named "Tsangyang Gyatso Peak" in honour of His Holiness Tsangyang Gyatso, the Sixth Dalai Lama, from the Mon Tawang region.

This groundbreaking feat showcases the spirit of adventure, connecting this remote land to the world. It also opens new… pic.twitter.com/w95ut34nh1

— Pema Khandu པདྨ་མཁའ་འགྲོ་། (@PemaKhanduBJP) September 25, 2024

ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་ལགས་ཀྱིས་ཁོང་གི་(X)་སྤྱི་ཚོགས་དྲྭ་བའི་སྟེང་འདྲ་པར་དང་བཅས། ད་རེས་རི་འཛེགས་པ་རྣམས་ཀྱིས་སྔར་ཚོད་ལྟ་བྱས་མ་མྱོང་བའི་རི་བོ་ཞིག་གི་སྟེང་ལམ་ལྷོང་ལྡན་པའི་ངང་འཛེགས་ཐུབ་པ་བྱུང་བ་དེ་གཟི་བརྗིད་ལྡན་པ་རེད། ད་བར་མིང་མེད་པའི་རི་བོ་མཐོན་པོ་འདིའི་མིང་མོན་རྟ་དབང་ནས་འཁྲུངས་པ་རྒྱལ་མཆོག་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་དྲན་རྟེན་གྱི་ཚུལ་དུ་རི་བོ་ཚངས་དབྱངས་རྒྱ་མཚོ་ཞེས་མིང་བཏགས་པ་ཡིན། འདིས་ཨ་རུ་ན་ཅལ་མངའ་སྡེའི་རིག་གཞུང་ཕྱུག་པོ་དེ་དག་འཛམ་གླིང་གི་མཐོང་ཆོས་སུ་གྱུར་བ་མ་ཟད། མ་འོངས་པར་ཡུལ་སྐོར་སྤྲོ་འཆམ་གྱི་ངོ་བོའི་ཐོག་ནས་མངའ་སྡེའི་ནང་རི་འཛེགས་དང་གཞན་ཡང་སྤྲོ་འཆམ་དུ་ཡོང་མཁན་གྱི་གྲངས་ཚད་ཀྱང་མང་དུ་འགྲོ་རྒྱུའི་རེ་བ་ཡོད་པ་ཞིག་རེད་ཅེས་བཀོད་འདུག

གནས་ཚུལ་དེའི་ཐད་(AFP)་གསར་ལས་ཁང་གིས་པེ་ཅིན་དུ་ཚོགས་པའི་གསར་འགོད་ལྷན་ཚོགས་ཐོག་འདྲི་རྩད་བྱས་སྐབས་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་(Lin Jian)་ཀྱིས། གནས་ཚུལ་དེ་ཤེས་རྟོགས་མེད་ཚུལ་བཤད་པ་དང་མཉམ། དེ་ནི་བོད་ཀྱི་ལྷོ་ཕྱོགས་རྒྱ་ནག་གི་མངའ་ཁོངས་རེད། དེར་རྒྱ་གར་གྱི་ངོས་ནས་ཨ་རུ་ན་ཅལ་ཟེར་བའི་མངའ་སྡེ་བཙུགས་པ་ནི་ཁྲིམས་འགལ་དང་ནུས་བ་མི་ཐོན་པའི་ལས་དོན་ཞིག་རེད། ང་ཚོས་དེ་ལ་རྒྱ་སྐད་ཐོག་(Zangnan)་ཞེས་བོད་ལྷོ་ཁུལ་འབོད་ཀྱི་ཡོད། མངའ་ཁོངས་དང་ས་མཚམས་ཀྱི་གནད་དོན་ཐད་རྒྱ་ནག་གི་ལངས་ཕྱོགས་ཁ་གསལ་དང་སྲ་བརྟན་ཡིན་ཞེས་ལན་འདེབས་བྱས་འདུག
གནས་ཚུལ་ལྟར་ན། གོང་ཞུས་བསྟི་གནས་ཁང་དེས་རི་བོ་དེར་༧རྒྱལ་མཆོག་ཚངས་དབྱངས་རྒྱ་མཚོའི་རི་བོ་ཞེས་མཚན་མ་གསོལ་གོང་རྒྱ་གར་རྒྱལ་ཡོངས་རི་འཛེགས་ཐེབས་རྩ་ཁང་ལ་ཆོག་མཆན་ཞུས་ཏེ་བཀའ་འཁྲོལ་ཐོབ་པ་ཞིག་ཡིན་ལུགས་བཀོད་འདུག་ལ་ད་ཆ་དངོས་སུ་རྒྱ་གར་གྱི་རི་བོའི་ས་ཁྲའི་སྟེང་འཁོད་ཐུབ་པ་ཡང་བྱུང་ཡོད་འདུག
སྤྱིར་བཏང་རི་བོ་དེ་བཞིན་འཁྱགས་རོམ་ཅན་ཞིག་ཡིན་སྟབས་རི་འཛེགས་པ་རྣམས་ཀྱིས་དཀའ་ངལ་གདོང་ལེན་ཆེན་པོ་བྱེད་དགོས་བྱུང་ཡོད་འདུག

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།