དབུ་མའི་ལམ་ལམ་འགྲོ་ཡོང་བའི་ཐུགས་རེ་གནང་གི་ཡོད།

༄༅། །ཉིན་ཤས་སྔོན་སྲིད་སྐྱོང་བློ་བཟང་སེངྒེ་མཆོག་ཨ་རིའི་སྲིད་འཛིན་ཟུར་པ་George W Bush མཆོག་གི་ལྟེ་གནས་ཁང་ལ་ཆེད་ཕེབས་གནང་སྐབས་བོད་མིའི་སྒྲིག་འཛུགས་ཀྱིས་བོད་ཀྱི་གནད་དོན་སེལ་ཐབས་སུ་འཛིན་པའི་གཉིས་ཕན་དབུ་མའི་ལམ་ལམ་འགྲོ་ཡོང་བའི་ཐུགས་རེ་གནང་གི་ཡོད་སྐོར་གསུངས་འདུག  སྲིད་སྐྱོང་མཁས་དབང་བློ་བཟང་སེངྒེ་མཆོག་འདི་ཟླའི་ཚེས་༡༤ཉིན་ཨ་རིའི་ལྷོ་ཕྱོགས་མངའ་སྡེ་Taxes ནང་ཡོད་ཨ་རིའི་སྲིད་འཛིན་ཟུར་པ་George W Bush མཆོག་གི་ལྟེ་གནས་ཁང་ལ་ཆེད་ཕེབས་གནང་སྐབས་བོད་ཀྱི་གནད་དོན་སེལ་ཐབས་སུ་འཛིན་པའི་དབུ་མའི་ལམ་གྱི་བཞེངས་ཕྱོགས་དེ་ལམ་ལྷོང་ཡོང་བའི་ཐུགས་རེ་གནང་གི་ཡོད་པ་དང་གང་ལ་ཞེ་ན་བཞེངས་ཕྱོགས་དེས་བོད་དང་བོད་མི་མང་ལ་མིང་དོན་མཚུངས་པའི་རང་སྐྱོང་ལྗོངས་དོན་དུ་གཉེར་གྱི་ཡོད་སྟབས་རང་སྲིང་རང་གིས་སྐྱོང་རྒྱུ་དང་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་པ་མི་ཉམས་རྒྱུན་འཛིན་ཡོང་ཐབས་ཆེད་ཡིན་སྐོར་གསུངས་འདུག ད་དུང་སྲིད་སྐྱོང་མཆོག་གིས་བོད་ནི་རྒྱ་ནག་དང་ལྷོ་ཤར་ཨེ་ཤེ་ཡའི་ཡུལ་གྲུ་ཁག་གི་བར་གནས་རྒྱལ་ཁབ་གཅིག་ཡིན་པས་མ་ཟད། ཁོར་ཡུག་ཐོག་ནས་གལ་གནད་ཆེན་པོ་ཡིན་པ་དང་། རྒྱ་མིས་བོད་ནི་ནུབ་བརྒྱུད་ཀྱི་གཏེར་མཛོད་ཅེས་འབོད་ཡོད་ཅིང་། དེའི་དོན་ནི་བོད་དེ་རྒྱུག་ཆུ་དང་རིན་ཆེན་གཏེར་མཛོད་ཀྱི་བྱུང་ཁུངས་ཡིན་པར་ཟེར་གྱི་ཡོད་རེད་ཅེས་གསུངས་འདུག ཡང་བློ་བཟང་སེངྒེ་མཆོག་སྲིད་སྐྱོང་འོས་མིར་ཡང་བསྐྱར་བཞེངས་པ་དང་འཆར་ཟླའི་ནང་འོས་ཤོག་འཕེན་གྱི་ཡོད་སྟབས། སྲིད་སྐྱོང་འོས་བསྡུའི་ལས་འགུལ་སྐོར་གནས་འདྲི་ཞུས་པར་ཁོང་ནས་མི་མང་གི་བསམ་ཚུལ་རྗེས་ཤོས་དེ་བྱས་པར་གཞིགས་ན།    འོས་གྲངས་བརྒྱ་ཆ་༧༠་ལྷག་གིས་ཁོང་ལ་རྒྱབ་སྐྱོར་བྱེད་ཀྱི་ཡོད་པ་བཏོན་ཡོད་སྐོར་གསུངས་ཡོད་པའི་གནས་ཚུལ་འདུག།

གསར་འགོད་པ་སེང་གེ་རི་བསོད་ནམས་ལྷ་མོ།