པ་ཀི་སི་ཐན་གྱིས་རྡུལ་ཕྲན་ནུས་པའི་མེ་ཤུཌ་འཕུར་མདེལ་ཚོད་ལྟ།

༄༅༎དེ་རིང་རེས་གཟའ་མིག་དམར་ཉིན་པ་ཀི་སི་ཐན་གྱིས་རྡུལ་ཕྲན་གོ་མཚོན་གྱི་ནུས་ཤུགས་ལྡན་པའི་མེ་ཤུགས་འཕུར་མདེལ་ཞིག་ཚོད་ལྟ་བྱས་པ་ལམ་ལྷོང་བྱུང་ཡོད་པའི་གནས་ཚུལ་ཐོན་བཞག

དེ་ཡང་པ་ཀི་སི་ཐན་གྱི་དམག་དོན་ལས་ཁང་གིས་གསལ་བསྒྲགས་ཤིག་སྤེལ་བའི་ནང༌། མེ་ཤུགས་འཕུར་མདེལ་དེ་ནི་རྡུལ་ཕྲན་གོ་མཚོན་འཁྱེར་ཐུབ་པའི་ནུས་ཤུགས་ལྡན་པའི་ཁར་གོ་མཚོན་ཐོགས་པའི་མེ་ཤུགས་འཕུར་མདེལ་ཞིག་ཡིན་པ་དང༌། དེའང་རྒྱང་ཚད་ཀི་ལོ་མི་ཊར་ཆིག་སྟོང་གསུམ་རྒྱ་ཙམ་འཕེན་ཐུབ་པའི་ནུས་པ་ལྡན་ཡོད་པའི་སྐོར་བཀོད་ཡོད་པ་མ་ཟད། ད་རེས་ཀྱི་ཚོད་ལྟའི་ལས་དོན་དེ་ནི་པ་ཀི་སི་ཐན་གྱི་དམག་དོན་ཐབས་ཇུས་ལས་ཁང་གིས་ས་ཐོག་གི་དམག་རྩལ་སྦྱོང་བརྡར་གྱི་ལས་དོན་མཇུག་སྒྲིལ་བའི་ཉིན་བྱས་པའི་གནས་ཚུལ་བཀོད་ཡོད་པ་རེད། པ་ཀི་སི་ཐན་གྱི་སྲིད་བློན་ཡུ་སུཕ་ར་ཛི་གི་ལ་ནི་དང༌། དམག་སྤྱི་ཀ་ལིརྡ་ཤའ་མིན་ དེ་བཞིན་མཐོ་རིམ་དམག་དཔོན་ཁག་ཅིག་བཅས་མེ་ཤུགས་འཕུར་མདེལ་ཚོད་ལྟའི་ལས་དོན་ནང་གཟིགས་རྟོགས་གནང་བར་ཕེབས་ཡོད་པ་དང༌། སྲིད་བློན་མཆོག་གིས། ང་ཚོས་ད་རེས་མེ་ཤུགས་འཕུར་མདེལ་ཚོད་ལྟའི་ལས་དོན་ལམ་ལྷོང་བྱུང་བ་ནི་ང་ཚོའི་རྒྱལ་ཁབ་ཀྱི་སྤོབས་པ་་ཡིན་པ་དང༌། ང་ཚོའི་ཕུལ་བྱུང་གི་ལས་ཀའི་གྲུབ་འབྲས་ལ་གུས་བཏུད་ཞུ་རྒྱུ་ཡིན་ཞེས་དང༌། ང་ཚོ་པ་ཀི་སི་ཐན་ངོས་ནས་རང་གི་རྒྱལ་ཁབ་རྒྱལ་སྲུང་ཐུབ་པའི་ནུས་སྟོབས་ལྡན་ཡོད་པ་དེ་བློ་སྟོབས་སྐྱེས་གཞི་ཡིན་པ་མ་ཟད། ང་ཚོའི་སྲུང་སྐྱོབ་ཀྱི་སྲིད་ཇུས་ལ་ལོ་རྒྱུས་ཀྱི་ལེའུ་གསར་པ་ཞིག་དང་རྒྱལ་ནང་ཞི་བདེ་སྐྲུན་ཐབས་ལ་ཡིད་ཆེས་སྐྲུན་ཐུབ་པ་ཞིག་ཡིན་པའི་ཁར། ད་རེས་ཀྱི་ཚོད་ལྟའི་ལས་དོན་དེ་ཡིས་པ་ཀི་སི་ཐན་རྒྱལ་ཁབ་རྒྱལ་སྲུང་གི་ནུས་སྟོབས་་ལྡན་ཡོད་པ་རྒྱལ་སྤྱིའི་སྤྱི་ཚོགས་ལ་གོ་བརྡ་གསལ་པོ་ཞིག་སྤྲད་ཡོད་ཅེས་གསུངས་ཡོད་པ་རེད།