རྒྱ་ནག་གིས་པ་ཀིསི་ཐན་ལ་གནོན་ཤུགས་སྤྲོད་གལ་ཆེ།

ཨ་རི་དང་རྒྱ་ནག་གཉིས་ཀྱིས་པ་ཀིསི་ཐན་ཐོག་གནོན་ཤུཊ་སྤྲོད་རྒྱུ་གལ་ཆེན་ཆགས་ཀྱི་ཡོད་པ་ཨ་རིའི་ཉམས་ཞིབ་ལས་ཁང་ཞིག་གིས་སྙན་ཐོའི་ནང་བཀོད་འདུག
དེ་ཡང་འདི་ག་ཨ་རིའི་རྒྱལ་ས་ཝ་ཤིང་ཀྲོན་དུ་རྟེན་གཞི་བྱེད་པའི་ཨ་མི་རི་ཀའི་ཞི་བདེ་ལྟེ་གནས་ཁང་གིས། ཚེས་༡༤་ཉིན་གནད་དོན་འདི་དང་འབྲེལ་བའི་སྐོར་སྙན་ཐོ་ཞིག་འདོན་སྤེལ་གནང་བའི་ནང་། པ་ཀིསི་ཐན་དང་རྒྱ་གར་དབར་དམག་འཐབ་ཡོང་རྒྱུའི་ཉེན་ཁ་འགོག་ཐབས་ཀྱི་ཆེད་ཨ་རི་དང་རྒྱ་ནག་གཉིས་ཀྱིས་པ་ཀིསི་ཐན་ཐོག་གནོན་ཤུགས་སྤྲོད་དགོས་པ་གལ་འགངས་ཆེན་པོ་ཆགས་ཀྱི་ཡོད་པ་བརྗོད་ཡོད་པ་དང་། པ་ཀིསི་ཐན་ནང་རྟེན་གཞི་བྱེད་པའི་འཇིགས་སྐུལ་དྲག་སྤྱོད་སྒྲིག་འཛུགས་ཀྱི་མི་སྣས་རྒྱ་གར་ནང་གསང་འཛུལ་གྱིས་དྲག་འཐབ་ཀྱི་ལས་འགུལ་སྤེལ་བཞིན་པ་དེ་ཡིས་མ་འོངས་པར་ཡུལ་གྲུ་གཉིས་དབར་དམག་འཐབ་ཡོང་ཉེན་ཁ་ཆེན་པོ་ཡོད་པ་དང༌། དེ་ལྟར་བྱུང་བ་ཡིན་ན་ལྷོ་ཨེ་ཤེ་ཡའི་ནང་འཁྲུག་རྐྱེན་ཆེན་པོ་ཡོང་བཟོ་ཡོད་སྟབས། ཉེན་ཁ་དེ་འགོག་ཐབས་སུ་པ་ཀིསི་ཐན་གཞུང་གིས་རྒྱ་གར་ནང་འཇིགས་སྐུལ་དྲག་སྤྱོད་ཀྱི་ལས་འགུལ་སྤེལ་མཁན་ཚོའི་ཐོག་ཁྲིམས་གཅོད་དང་། དམ་དྲག་བྱེད་དགོས་པའི་གནོན་ཤུགས་ཡུལ་དེ་དང་འབྲེལ་ཐག་ཉེ་པོ་ཡོད་པའི་རྒྱ་ནག་གཞུང་གིས་སྤྲོད་དགོས་པ་ཨ་རིའི་ཕྱོགས་ནས་རྒྱ་ནག་ལ་རེ་འདུན་བཏོན་དགོས་པ་འཁོད་ཡོད་པ་རེད། ། ད་དུང་སྙན་ཐོ་དེའི་ནང་རྒྱ་གར་ཕྱོགས་ནས་ཀྱང་དེང་སྐབས་རྒྱལ་སྤྱིའི་ནང་པ་ཀིསི་ཐན་ཟུར་དུ་གྲོགས་མེད་ཁེར་རྐྱང་བཟོ་ཐབས་ཀྱི་སྲིད་བྱུས་འཛིན་བཞིན་པ་དེ་དོར་ཏེ་མ་འོངས་པར་ཡུལ་གྲུ་གཉིས་དབར་གྲོས་མོལ་བསྐྱར་གསོ་ཡོང་ཐབས་བྱེད་དགོས་པ་ལས། གལ་སྲིད་པ་ཀི་སུ་ཐན་དང་རྒྱ་གར་དབར་དམག་འཐབ་བྱུང་བ་ཡིན་ཚེ། དེ་ཡིས་ལྷོ་ཨེ་ཤེ་ཡ་ཙམ་མ་ཟད། རྒྱ་ནག་གི་བརྟན་ལྷིང་དང་བདེ་འཇགས་ལའང་ཤུགས་རྐྱེན་ཐེབས་བཟོ་ཡོད་པ་ཨ་རིའི་ཕྱོགས་ནས་རྒྱ་ནག་གི་འགོ་ཁྲིད་ཚོས་ཤེས་ཐུབ་པ་བཟོ་དགོས་པ་གལ་ཆེན་པོ་ཡིན་སྐོར་བཀོད་འདུག

གསར་འགོད་པ་ངག་ཆོས།