གྲོས་ཆོད་དོན་ཚན་བཅུ་གཏན་འབེབས་གནང་འདུག།

བྱང་ཨ་མི་རི་ཀའི་བོད་ཀྱི་སྐད་ཡིག་དང་རིག་གཞུང་སློབ་གྲའི་ཚོགས་ཆེན་ཐེངས་ལྔ་པ་དེ་ཚེས་༢་བར་གྱི་ཉིན་གཉིས་རིང་ཨ་རིའི་མ་ཎི་སོ་ཀྲའི་ནང་འཚོགས་ཡོད་པ་དང་། ཚོགས་ཆེན་དེའི་ཐོག་གྲོས་ཆོད་༡༠་གཏན་འབེབས་གནང་འདུག།
ཚོགས་ཆེན་དེའི་ཐོག་གཏན་འབེབས་བྱུང་བའི་གྲོས་ཆོད་ཁག་ནི་དང་པོ། སྔོན་འགྲོ་དང་འཛིན་རིམ་དང་པོ་ནས་ལྔ་བ་བར་གྱི་སློབ་དེབ་རྩོམ་སྒྲིག་གནང་མཁན་དང་། ཤེས་རིག་ལས་ཁུངས་དང་འབྲེལ་ཡོད་བསྐྱར་ཞིབ་དང་གཏན་འབེབས་ཚོགས་ཆུང་གི་ཚོགས་མི་རྣམ་པ་ཨ་རིའི་དོན་ཁང་དང་འབྲེལ་ཡོད་ཚེ་དབང་ཕུན་ཚོགས་ལགས་དང་བསྟན་འཛིན་དབྱིངས་ལགས་ལ་ལེགས་གསོའི་བཀའ་དྲིན་ཆེ་ཞུ། གཉིས་བ། ཚོགས་འདུའི་ཐོག་དམིགས་བསལ་འཛིན་རིམ་གཉིས་པའི་སློབ་དེབ་ནང་དག་ཡིག་དང་རྟགས་འཇུག བརྡ་སྤྲོད་དང་མ་མཐུན་པའི་གནད་དོན་ཁག་ཚོགས་མི་རྣམ་པས་དགོངས་ཚུལ་སྦྱང་བཤད་ཞུས་པར་གསལ་བཤད་ཀྱིས་དག་པ་རྣམས་ཕུད་གཞན་དགོངས་ཚུལ་བྱུང་བ་རྣམས་སློབ་དེབ་རྩོམ་སྒྲིག་པ་དང་། ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་ནས་བློ་ངེས་བྱུང་ཐོག་སྐབས་འཕྲལ་བརྡ་སྤྲོད་དང་མ་མཐུན་པ་ཁག་བསྒྱུར་བཅོས་ཀྱིས་ཤེས་རིག་ལས་ཁུངས་ནས་དོན་ཁང་བརྒྱུད་ས་གནས་སོ་སོར་གཏོང་རྒྱུ།
གསུམ་པ། ས་གནས་ཁག་ཅིག་གིས་སློབ་དེབ་བསྐྱར་ཞིབ་དང་འགྲེམས་སྤེལ་ཟིན་པའི་སློབ་དེབ་ས་གནས་སུ་མ་བཏང་གོང་རགས་ཟིན་ཚོད་ལྟ་གནང་ཟིན་པ་ཁག་ཕུད་ས་གནས་གཞན་སོ་སོར་སྔོན་འགྲོ་དང་འཛིན་རིམ་དང་པོའི་སློབ་དེབ་རྣམས་ལག་བསྟར་ཞུ་རྒྱུ།
འཛིན་རིམ་གཉིས་པའི་སློབ་དེབ་ནང་བརྡ་སྤྲོད་དང་མ་མཐུན་པའི་རིགས་ཕུད་གཞན་རྣམས་ཚོད་ལྟ་གནང་སྟེ་ས་གནས་སོ་སོའི་དགེ་རྒན་ཐུན་མོང་གི་བསམ་ཚུལ་ཇི་ཡོད་ཕྱི་ལོ་༢༠༡༧་ལོའི་ཕྱི་ཟླ་༢་ཚེས་༡༥་ནང་ཚུད་ཨ་རི་དོན་གཅོད་བརྒྱུད་ཤེས་རིག་ལས་ཁུངས་སུ་འབུལ་ཐུབ་པ་དགོས་རྒྱུ་སོགས་གྲོས་ཆོད་༡༠་གཏན་འབེབས་གནང་བ་དང་།
ཚོགས་འདུ་ཐེངས་དྲུག་པ་དེ་པོཌ་ལེནཌ་བོད་རིགས་སྤྱི་མཐུན་ཚོགས་པས་གོ་བསྒྲིགས་ཞུ་རྒྱུའི་ཐུགས་གཏན་འཁེལ་ཡོད་འདུག
ད་ཐེངས་བྱང་ཨ་མི་རི་ཀའི་བོད་ཀྱི་སྐད་ཡིག་དང་རིག་གཞུང་སློབ་གྲའི་ཚོགས་ཆེན་ཐེངས་ལྔ་པ་དེ་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་གིས་གོ་བསྒྲིགས་གནང་བ་དང་། མ་ཎི་སོ་ཀྲ་བོད་རིགས་སྤྱི་མཐུན་ཚོགས་པས་མཐུན་འགྱུར་གནང་བ་ཞིག་ཡིན་པ་རེད།

གསར་འགོད་པ་སེང་གེ་རི་བསོད་ནམས་ལྷ་མོ།