ཨ་རིའི་རྒྱལ་སྲུང་སློབ་སྟོན་པས་རྒྱ་གར་གྱི་སྲིད་བློན་དང་ཕྱི་སྲིད་བློན་ཆེན་བཅས་དང་མཇལ་འཕྲད་གནང་འདུག

འདི་ཚེས་༦གཟའ་ཟླ་བ་ཉིན་རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ཇཱེ་ཤང་ཀར་(Jaishankar)་ལགས་དང་ཨ་རིའི་རྒྱལ་སྲུང་སློབ་སྟོན་པ་(Jake Sullivan)་ལགས་གཉིས་རྒྱ་གར་གྱི་རྒྱལ་ས་ལྡི་ལིར་མཇལ་འཕྲད་གནང་ནས་རྒྱ་ཆེ་བའི་ཐབས་ཇུས་དང་མངའ་ཁུལ་ཕྱོགས་གཉིས་ཀྱི་གནད་དོན་བཅས་ཐད་གྲོས་བསྡུར་གནང་ཡོད་འདུག
ཨ་རིའི་རྒྱལ་སྲུང་སློབ་སྟོན་པ་(Jake Sullivan)་ལགས་ཀྱིས་ཁོང་གི་ལས་ཡུན་རྫོགས་ལ་ཉེ་བའི་དུས་སྐབས་འདིར་རྒྱ་གར་ནང་ཉིན་གཉིས་རིང་འཚམས་གཟིགས་གནང་འགོ་བཙུགས་ཡོད་པ་དང་། འདི་ནི་ཨ་རིའི་བདམས་ཐོན་སྲིད་འཛིན་ཌོལ་ནལཌི་ཀྲོརམ་(Donald Trump) ཡིས་ཟླ་བ་འདིའི་ཕྱི་ཚེས་༢༠ཉིན་ཨ་རིའི་སྲིད་འཛིན་སྐབས ༤༧ པའི་འགན་འཁུར་མ་བཞེས་གོང་ད་ལྟའི་ལས་ཐོག་སྲིད་འཛིན་འཇཱོ་སྦཡེ་ཌེན་(Joe Biden)་སྲིད་གཞུང་གི་ཆེས་མཐའ་མཇུག་གི་མཐོ་རིམ་དབུ་ཁྲིད་ཀྱི་མཛད་འཆར་ཞིག་ཆགས་ཀྱི་ཡོད་འདུག
ཨ་རིའི་རྒྱལ་སྲུང་སློབ་སྟོན་པ་(Jake Sullivan)་ལགས་ཀྱི་འཚམས་འདྲིའི་དམིགས་ཡུལ་ནི་རྒྱལ་ཁབ་གཉིས་ཀྱི་ཐབས་ཇུས་འབྲེལ་བ་རྒྱ་བསྐྱེད་གཏོང་བའི་མཉམ་ལས་སྒྲོམ་གཞི་གལ་ཆེན་ཞིག་ཡིན་པའི་རྒྱ་གར་དང་། ཨ་རིའི་གལ་ཆེ་གསར་དུ་ཐོན་པའི་འཕྲུལ་རིག་ལས་གཞི་(iCET)་ལ་བསྐྱར་ཞིབ་བྱེད་རྒྱུ་དེ་ཡིན་འདུག
དབུ་ཁྲིད་རྣམ་གཉིས་ཀྱི་མཇལ་འཕྲད་སྐབས། ཨ་རིའི་རྒྱལ་སྲུང་སློབ་སྟོན་པ་(Jake Sullivan)་ལགས་ཀྱིས་(iCET)་ལས་གཞི་ལག་བསྟར་སྐོར་ལ་བསྐྱར་ཞིབ་གནང་རྒྱུ་དང་། རྒྱ་གར་རྒྱ་མཚོ་དང་ཞི་བདེ་རྒྱ་མཚོའི་མངའ་ཁུལ་གྱི་མཁའ་དབྱིངས་དང་། རྒྱལ་སྲུང། ཐབས་ཇུས་ལག་རྩལ། རྒྱལ་ཁབ་གཉིས་ཀའི་ཐུན་མོང་གི་བདེ་འཇགས་གལ་གནད་སོགས་ཀྱི་ཁྱབ་ཁོངས་ནང་མཉམ་ལས་གནང་ཕྱོགས་སྐོར་ལ་གྲོས་བསྡུར་གནང་གི་ཡོད་པར་ངོས་འཛིན་བྱེད་ཀྱིན་ཡོད་འདུག

དེའི་རྗེས་སུ་ཨ་རིའི་རྒྱལ་སྲུང་སློབ་སྟོན་པ་(Jake Sullivan)་ལགས་དང་རྒྱ་གར་གྱི་སྲིད་བློན་ན་རེནདྲ་མོ་དྷི་ (Narendra Modi) ལགས་རྣམ་གཉིས་མཇལ་འཕྲད་གནང་འདུག་ལ། དེའི་ཐད་སྲིད་བློན་(Narendra Modi) ལགས་ཀྱིས་(x)་སྤྱི་ཚོགས་དྲྭ་རྒྱར། རྒྱ་གར་དང་ཨ་རིའི་ཕྱོགས་བསྡུས་ཐབས་ཇུས་དང་། མཉམ་ལས། འཕྲུལ་རིག་ལག་རྩལ་བཅས་ཀྱི་བང་རིམ་མཐོ་སར་སླེབས་ཡོད་ལ། ང་ཚོའི་དམངས་གཙོ་ཡུལ་གྲུ་གཉིས་བར་གྱི་འབྲེལ་བས་ང་ཚོའི་མི་དམངས་དང་འཛམ་གླིང་གི་བདེ་སྐྱིད་འཕེལ་རྒྱས་གཏོང་རྒྱུ་ཡིན་པ་བཀོད་འདུག

གསར་འགོད་པ། རྡོ་རྗེ་མཚོ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།